ރަސްމާލެ މަޝްރޫއާ ގުޅިގެން ރައީސް މުއިއްޒު އަށް ޖިނާއީ ދައުވާކުރަން ޖެހޭ: އަލީ ހުސައިން

ރަސްމާލެ މަޝްރޫއުގެ ދަށުން ބިން ކުއްޔަށް ދިނުމާއި ވިއްކުމާ ގުޅޭގޮތުން މި ސަރުކާރުން ނިންމާފައިވާ ނިންމުންތަކަކީ ކޮރަޕްޝަނަށް މަގުފަހިވާ ކަންކަން ކަމަށާއި، މި މައްސަލައިގައި ރައީސް ޑރ. މުހައްމަދު މުއިއްޒުގެ މައްޗަށް ޖިނާއީ ދައުވާ ކުރަންޖެހޭ ކަމަށް ކުރީގެ މަޖިލިސް މެންބަރު އަދި ޤާނޫނީ ވަކީލު އަލީ ހުސައިން ވިދާޅުވެއްޖެ އެވެ.

ރާއްޖެ ޓީވީގެ ޓީވީ ޓޯކްގެ މިހަފްތާގެ ޕްރޮގްރާމްގައި ވާހަކަދައްކަވަމުން އަލީ ހުސައިން ވިދާޅުވީ، ރާއްޖޭގެ ބިމުން ވެލިފުކެއް އަދި އިމުން އިންޗިއެއް ވެސް ދޫނުކުރައްވާނެ ކަމަށާއި ދިވެހިންގެ ބަރަށް ރަންކިރިޔަސް ޤައުމު ވިއްކައިނުލައްވާނެ ކަމަށް ވިދާޅުވެ ވެރިކަމަށް ވަޑައިގެންނެވި ރައީސް މުއިއްޒު މިއަދު އަމަލުކުރައްވަނީ އެއާ ޚިލާފަށް ކަމަށެވެ. އަދި ރަސްމާލެ މަޝްރޫއުގެ ދަށުން 500 ހެކްޓަރުގެ ބިން 99 އަހަރަށް ދިނުމަކީ އިސްތިއުމާރީ 'އީސްޓް އިންޑިއާ ކުންފުންޏަށް' ޤައުމުގެ ބިން ވިއްކާލުން ފަދަ ކަމެއްގެ ގޮތުގައި އޭނާ ސިފަކުރައްވަ އެވެ. އޭނާ ވިދާޅުވީ 99 އަހަރަށް ބިން ކުއްޔަށް ދިނުމަކީ ހަޤީޤަތުގައި އެ ބިން އެއްކޮށް ވިއްކާލުން ކަމަށާއި، މިއަދު އެ އެއްބަސްވުމުގައި ސޮއިކުރާއިރު ވާނުވާ ބަލަން ތިބި އެއްވެސް މީހަކު މީގެ 99 އަހަރު ފަހުން ދުނިޔޭގައި ނުތިބޭނެ ކަމަށެވެ.

Advertisement

އަލީ ހުސައިން އިތުރަށް ފާހަގަކުރެއްވި ގޮތުގައި، ރަސްމާލެ ހިއްކަން ފެށިއިރު ދައުލަތުގެ ބަޖެޓުން ލޯލާރިއެއް ވެސް ޚަރަދުނުވާނެ ކަމަށް ސަރުކާރުން ބުނި ނަމަވެސް، ކުރީ ސަރުކާރުން 250 ނުވަތަ 300 މިލިއަން ޑޮލަރަށް ހިއްކެން އޮތް ތަނެއް މި ސަރުކާރުން މި ހިއްކަނީ ރައްޔިތުންގެ ފައިސާއިން ގާތްގަނޑަކަށް 650 މިލިއަން ޑޮލަރު ޚަރަދުކޮށްގެންނެވެ. އަދި އަތޮޅުތަކުގެ ރަށްރަށުގައި ހިނގަމުންދިޔަ ފެނާއި ނަރުދަމާ ފަދަ އަސާސީ އެތައް މަޝްރޫއެއް ހުއްޓާލައި، ދައުލަތަށް ލިބުނުހާ ފައިސާއެއް މިދިޔަ ދުވަސްތަކުގައި ޚަރަދުކުރީ ފުށިދިއްގަރު ފަޅު ހިއްކުމަށް ކަމަށް އޭނާ ވިދާޅުވި އެވެ.

ރައްޔިތުން މިކަމާ މާބޮޑަށް އަޑުނުއުފުލައި ތިބީ 60،000 ހައުސިންގ ޔުނިޓް އަޅައި، މާލޭގައި ކުލިދައްކައިގެން ގަނަތެޅޭ އާއިލާތަކަށް އަގުހެޔޮ ބޯހިޔާވަހިކަމެއް ލިބިދާނެ ކަމުގެ އުންމީދު އޮތުމުން ކަމަށާއި، ނަމަވެސް މި މަޝްރޫއުގެ ސަބަބުން ޤައުމަށް ގެއްލިގެންދިޔަ ފުރުސަތުތަކުގެ އަގު އިންތިހާއަށް ބޮޑު ކަމަށް އޭނާ ފާހަގަކުރެއްވި އެވެ. އަދި މި ބިން މިހާރު ދޫކުރަން އުޅޭ ބޭރުގެ ކުންފުންޏަކީ އެހެން ބޮޑެތި ޤައުމުތަކުގައި ޓައުންތައް ހަދަން ދިޔުމުން ވެސް އެ ޤައުމުތަކުގެ ރައްޔިތުން އެކަމާ ދެކޮޅަށް އިހުތިޖާޖުކޮށްފައިވާ ބައެއް ކަމަށް ވެސް ވިދާޅުވި އެވެ.

ތިނަދޫގެ ބިމެއް ކުއްޔަށް ދިން މައްސަލައިގައި ކޮރަޕްޝަނަށް މަގުފަހިވާ ކަމަށް ބުނެ މި ސަރުކާރުން ޕީޖީ މެދުވެރިކޮށް އެ ރަށުގެ މޭޔަރުގެ މައްޗަށް ދައުވާކުރާކަން ފާހަގަކުރައްވައި އަލީ ހުސައިން ވިދާޅުވީ، ރަސްމާލެ މައްސަލައިގައި ވެސް މިހާރުން މިހާރަށް ދައުވާ ތައްޔާރުކުރަންޖެހޭ ކަމަށެވެ. އަދި 2028 ގައި ނުވަތަ 2033 ގެ ފަހުން އަންނަ ވެރިކަމެއްގައި ވިޔަސް، މި ސަރުކާރު ނިމި ރައީސުލްޖުމްހޫރިއްޔާ ވެރިކަމުން ފައިބައިވަޑައިގަންނަވާ ދުވަހުން ފެށިގެން މި މައްސަލައިގައި އެމަނިކުފާނުގެ މައްޗަށް ޖިނާއީ ދައުވާ އުފުލަންޖެހޭނެ ކަމަށް އަލީ ހުސައިން ވިދާޅުވި އެވެ.