މި ސަރުކާރުން ރާއްޖޭގައި އޮތް އެންމެ ބޮޑު ރަށުގެ މެދުތެރެއިން ޒަޔަނިސްޓުންނަށް ޖާގަ ދިނުމުގެ މަސައްކަތް ދަނީ ކުރަމުން: އަލީ ހުސެއިން
26 ސެޕްޓެމްބަރު 2026 | ހޮނިހިރު 07:02ރަސްމާލެ މަޝްރޫއުގެ ބޮޑު ބައެއް ބޭރުގެ ކުންފުންޏަކަށް ދިނުމަށް ސޮއިކުރި އެއްބަސްވުމުގެ ސަބަބުން ރާއްޖޭގެ ޝަރުއީ އިހުތިސާސް ގެއްލިދާނެ ކަމަށް ވިދާޅުވެ، ކުރީގެ މެންބަރު އަލީ ހުސައިން ވަނީ ކަންބޮޑުވުން ފާޅުކުރައްވާފައި. މި މުއާމަލާތަކީ ކޮރަޕްޝަނަށް މަގުފަހިވާ ކަމެއް ކަމަށް ތުހުމަތުކުރައްވައި، މިކަމުގައި ޒިންމާވާ ފަރާތްތަކުގެ މައްޗަށް ޖިނާއީ ދައުވާ ކުރަންޖެހޭނެ ކަމަށް އޭނާ ވިދާޅުވި
ރަސްމާލެ މަޝްރޫއުގެ ސައިޓް-އޭ ހިއްކުމުގެ މަސައްކަތް ކުރަމުންދަނިކޮށް ނަގާފައިވާ ފޮޓޯއެއް | އެމްއޭސީއެލް
ރައީސް ޑރ. މުހައްމަދު މުއިއްޒުގެ ސަރުކާރުން ރާއްޖޭގައި އޮތް އެންމެ ބޮޑު ރަށުގެ މެދުތެރެއިން ޒަޔަނިސްޓުންނަށް ޖާގަ ދިނުމުގެ މަސައްކަތް ކުރަމުންދާ ކަމަށާއި، މިކަން ދިވެހި ރައްޔިތުން ހުއްޓުވަން ޖެހޭ ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެންބަރު އަދި ގާނޫނީ ވަކީލު އަލީ ހުސައިން ވިދާޅުވެއްޖެ އެވެ.
ރަސްމާލެ މަޝްރޫއުގެ ބޮޑުބައެއް އަބޫދާބީގެ އީގަލް ހިލްސް ކުންފުންޏަށް ދިނުމަށް ނިންމާފައިވާ އެއްބަސްވުމާ ގުޅިގެން ކަންބޮޑުވުން ފާޅުކުރައްވާ ރާއްޖެޓީވީގެ ޓީވީޓޯކް ޕްރޮގްރާމްގައި އަލީ ހުސެއިން ވިދާޅުވީ، މި އެއްބަސްވުމުގެ ސަބަބުން ރާއްޖޭގެ ޝަރުއީ ނިޒާމާއި ކޯޓުތަކުގެ އިހުތިސާސް އެއްފަރާތް ކުރެވިގެންދާ ކަމަށެވެ. އަދި ބޭރުގެ ފަރާތްތަކާ އެކު މިފަދަ އެއްބަސްވުންތަކުގައި ސޮއިކުރަނީ ރާއްޖޭން ބޭރުގައި ކަމަށްވާތީ، އެ އެއްބަސްވުމުގެ މައްޗަށް ހިނގާނީ ބޭރުގެ ގާނޫނުތައް ކަމަށާއި އާބިޓްރޭޝަނަށް ވެސް ދާންޖެހޭނީ ރާއްޖޭން ބޭރަށް ކަމަށް އޭނާ ވިދާޅުވި އެވެ.
އަލީ ހުސައިން އިތުރަށް ވިދާޅުވީ، ރާއްޖޭގެ ބިމަކާ ގުޅޭގޮތުން، ހާއްސަކޮށް 500 ހެކްޓަރުގެ ބޮޑު ބިމަކާ ގުޅޭ އެއްބަސްވުމެއްގައި ސޮއިކުރަންވާނީ ދިވެހި ފަސްގަނޑުގައި ކަމަށެވެ. މިފަދަ ކަންކަމުގައި ގާނޫނީ ގޮތުން ދިމާވެދާނެ ނަތީޖާތަކަށް ބަލައި ދުނިޔޭގެ ބޮޑެތި ލޯފާމްތައް ހަޔަރުކޮށްގެން މަސައްކަތް ކުރަމުންދާ ކަމަށާއި، އެހެންކަމުން ސޮއިކުރާ ތަނާއި އިހުތިސާސަކީ ވަރަށް މުހިންމު ކަންކަން ކަމަށް އޭނާ ވިދާޅުވި އެވެ.
އެހެންވީމާ ސަލާމަތްނުވާވަރުގެ އެއްޗެއް މިއީ. ދިވެހީން އެބަޖެހޭ ތެދުވާ އެނގޭތޯ. ދިވެހިރާއްޖޭގެ ބިމެއް ކުއްޔަށް ދޭއިރުގައި އަދި މި އެ ބޭފުޅުން އަޅުގަނޑު ގަބޫލުކުރަނީ ވިއްކާލީއޭ. ދިވެހިރާއްޖޭގެ ބިމެއް ވިއްކާލިޔަސް ކުއްޔަށް ދޭއިރު ދިވެހިންގެ ބިމަކާ ގުޅޭގޮތުން ސޮއިކުރާއިރުގައި އަދި އަމުދުން މިވަރުގެ 500 ހެކްޓަރުގެ ބޮޑު ބިމެއްގައި ސޮއިކުރާއިރު، ކޮންމެ ގޮތެއް ވިޔަސް ދިވެހި ފަސްގަނޑުގައި ނޫން ގޮތަކަށް ސޮއިކޮށްގެން ނުވާނެ. އޭގެ އިމްޕްލިކޭޝަންސް ހުރީމައި. ލީގަލް އިމްޕްލިކޭޝަން އެ މީހުން ބަލާފައި އެނގިގެންނޭ، އެނގިގެން އެ ޒަޔަނިސްޓުންނޭ ޒަޔައިނިސްޓުން ތިބޭނެ. އެ މީހުންނަށް އެކަމާ ގުޅޭ ދުނިޔޭގެ ބޮޑެތި ލޯފާމްތަކުން އެ މީހުން ހަޔަރކޮށްފައި ތިބޭނެ. އެ ސޮއިކުރާ ތަން ވެސް މެޓަރވާނެއަލީ ހުސައިން
މިއީ ޖަރީމާއެއްގެ ގޮތުގައި ސިފަކުރައްވައި އަލީ ހުސެއިން ވިދާޅުވީ، މިކަމުގައި ޒިންމާވާ ފަރާތްތަކުގެ މައްޗަށް ދައުވާ ކުރެވެން ޖެހޭނެ ކަމަށެވެ.
އެގޮތުން ރަސްމާލެ މަޝްރޫއުގެ ދަށުން ބިން ކުއްޔަށް ދިނުމާއި ވިއްކުމާ ގުޅޭގޮތުން މި ސަރުކާރުން ނިންމާފައިވާ ނިންމުންތަކަކީ ކޮރަޕްޝަނަށް މަގުފަހިވާ ކަންކަން ކަމަށާއި، މި މައްސަލައިގައި ރައީސް ޑރ. މުހައްމަދު މުއިއްޒުގެ މައްޗަށް ޖިނާއީ ދައުވާ ކުރަންޖެހޭ ކަމަށް އަލީ ހުސެއިން ވިދާޅުވި އެވެ.
ރާއްޖޭގައި އޮތް އެންމެ ބޮޑު ރަށުގެ މެދުތެރެއިން ޒަކަޔަނިސްޓުންނަށް ޖާގަ ހަދައިދިނުމުގެ މަސައްކަތް ކުރަމުންދާ ކަމަށް އަލީ ހުސެއިން ވިދާޅުވިއިރު، އަބޫދާބީގެ އީގަލް ހިލްސް ކުންފުންޏަކީ ކޮންމެ ދުވަހަކު ވެސް، ކުށެއް ނެތް އެތައް މުސްލިމުންނެއް މަރަމުން ގެންދާ ޔަހޫދީ ޞަހްޔޫނީ އިސްރާއީލަށް ފަންޑުކުރާ ކުންފުންޏަކެވެ.
ޔޫއޭއީގެ މަހުޖަނު އަދި އީމާރު ކުންފުންޏާއި އީގަލް ހިލްސް ކުންފުނީގެ ބާނީ މުޙައްމަދު އަލް-ޢައްބާރް އާއި އިސްރާއީލާ ދެމެދު، ވިޔަފާރި އާއި ސިޔާސީ ގޮތުން ފާހަގަކޮށްލެވޭ ބޮޑު ގުޅުމެއް އޮވެ އެވެ. އަދި 2020 ވަނަ އަހަރު ޔޫއޭއީ އާއި އިސްރާއީލާ ދެމެދު ގާއިމުކުރި "އަބްރަހަމް އެކޯޑްސް" (އިބްރާހީމްގެފާނުގެ މުއާހަދާ ނުވަތަ އިސްރާއީލާއި މުސްލިމުން ގުޅުން ބަދަހިކުރުމުގެ އެއްބަސްވުން) އަށް ފަހު، އިސްރާއީލާއެކު އޮންނަ ގުޅުން، އޭނާ ވަރަށް ބޮޑަށް ހާމަކުރައްވާފައިވެ އެވެ.
