ރާއްޖެޓީވީގެ އާރްޓީއައި ތަކަށް ޖަވާބުދޭން ރައީސް އޮފީހަށް 7 ދުވަސް ދީ، ޖަވާބު ނުދޭނަމަ ދައުވާކުރާނެކަމުގެ އިންޒާރު ދީފި!
13 ޖުލައި 2026 | ހޯމަ 11:30ރާއްޖެޓީވީން ހުށަހަޅާފައިވާ އާރްޓީއައިތަކަށް ރައީސް އޮފީހުން ޖަވާބު ދިނުމުގައި ބޮޑެތި ލަސްތަކެއްވެ، އައިކޮމްގެ އެންގުންތަކަށް އަމަލުކޮށްފައި ނުވާތީ އިންފޮމޭޝަން ކޮމިޝަނަރު ވަނީ ނުރުހުން ފާޅުކުރައްވާފައި. އެހެންކަމުން، ޖަވާބު ނުދީ ހުރި ހުރިހާ މައްސަލަތަކަށް ހަތް ދުވަސް ތެރޭގައި ޖަވާބު ދިނުމަށް އަމުރުކޮށް، އެ މުއްދަތުގައި ޖަވާބު ނުދީފިނަމަ ދައުވާ ކުރާނެ ކަމުގެ އިންޒާރު ރައީސް އޮފީހަށް ވަނީ ދީފައި.
އިންފޮމޭޝަން ކޮމިޝަނަރު އަޙްމަދު އާހިދު ރަޝީދު. | ސަން އޮންލައިން
މައުލޫމާތު ހޯދައި ލިބިގަތުމުގެ ޙައްޤުގެ ޤާނޫނުގެ ދަށުން ރައީސް އޮފީހަށް ރައްދުވާ ގޮތަށް ރާއްޖެޓީވީން އިންފޮމޭޝަން ކޮމިޝަނަރުގެ އޮފީހަށް ހުށަހަޅާފައިވާ މައްސަލަތަކުގައި 7 ދުވަސް ތެރޭގައި ޖަވާބު ދިނުމަށް އައިކޮމްއިން ރައީސް އޮފީހަށް އަމުރުކޮށްފި އެވެ.
ރާއްޖެޓީވީން މައުލޫމާތު ހޯދައި ލިބިގަތުމުގެ ޙައްޤުގެ ޤާނޫނުގެ ދަށުން ރައީސް އޮފީހަށް ރައްދުވާ ގޮތަށް ގިނަ މައްސަލަތަކެއް ހުށަހަޅާފައިވެ އެވެ. ނަމަވެސް އޭގެ ޖަވާބުތައް ރައީސް އޮފީހުން ފޮނުވާފައި ވަނީ ވެސް އައިކޮމް އަށް ހުށަހެޅޭ މައްސަލަތަކުގައި ޖަވާބު ފޮނުވަން ޖެހޭ މުއްދަތުގެ ފަހުންނެވެ.
އޭގެ ތެރެއިން އެއް މައްސަލައަކީ ރައީސްގެ ދަތުރުފުޅުތަކާ ގުޅޭގޮތުން ރާއްޖެޓީވީން 28 އޮކްޓޯބަރު 2025 ގައި ހުށަހެޅި މައްސަލައެވެ. އެ އާރްޓީއައިއަށް ރައީސް އޮފީހުން ޖަވާބު ދީފައިވަނީ 8 ޖުލައި 2026 ގަ އެވެ.
މީގެ އިތުރުން، 12 ނޮވެމްބަރު 2025 ގައި ރާއްޖެޓީވީން ހުށަހަޅާފައިވާ އާރްޓީއައި އާއި ގުޅޭގޮތުންވެސް މި އަޑުއެހުމުގައި ވާހަކަ ދައްކާފައިވެ އެވެ. އެގޮތުން އެ މައްސަލައަކީ މެދުފަންތިއާއި ދަށު ފަންތީގެ މީހުން ކޮރަޕްޝަން ހިންގާކަމަށް ރައީސް ޑރ މުޙައްމަދު މުއިއްޒު ޖުމްހޫރީ ދުވަހުގެ ޖަލްސާގައި ވިދާޅުވެފައިވާތީ އެކަމާ ގުޅޭގޮތުން މައުލޫމާތު ސާފު ކުރުމަށް ރާއްޖެޓީވީން އައިކޮމްއަށް ހުށަހެޅި މައްސަލައެކެވެ.
މި އާރްޓީއައި އަށް ރައީސް އޮފީހުން ޖަވާބު ދިނީ މިއަހަރުގެ ޖެނުއަރީ މަހުއެވެ. ނަމަވެސް އެ ޖަވާބު ފުރިހަމަނުވާތީ އޭޕްރީލް މަހު ބޭއްވި އަޑުއެހުމުގައި އައިކޮމްއިން ވަނީ ޖަވާބު އިސްލާޙުކޮށް، އަލުން ޖަވާބު ދިނުމަށް ރައީސް އޮފީހަށް 10 ދުވަހުގެ މުއްދަތެއް ދީފަ އެވެ. އެއީ 26 އޭޕްރީލް 2026 ގަ އެވެ.
މައުލޫމާތު ހޯދައި ލިބިގަތުމުގެ ޙައްޤުގެ ޤާނޫނުގެ ދަށުން ރައީސް އޮފީހަށް ރައްދުވާ ގޮތަށް ރާއްޖެޓީވީން އިންފޮމޭޝަން ކޮމިޝަނަރުގެ އޮފީހަށް ހުށަހަޅާފައިވާ މައްސަލައިގެ އަޑުއެހުން | ރާއްޖެ އެމްވީ
އެހެންނަމަވެސް އެ މުއްދަތުގެ ތެރޭގައި އައިކޮމްގެ އެންގުމާ އެއްގޮތަށް ރައީސް އޮފީހުން އަމަލުކޮށްފައި ނުވާތީ އައިކޮމް ގެ ރައީސް އާހިދު ރަޝީދު ނުރުހުން ފާޅު ކުރެއްވި އެވެ.
ޗާގޯސް މައްސަލައިގައި ރާއްޖެޓީވީން ހުށަހެޅި އާރްޓީއައިއަށް ޖަވާބު ދިނުމަށްވެސް 10 ދުވަހުގެ މުހުލަތެއް ދީފައިވާއިރު، އެ އެންގުމަށްވެސް ރައީސް އޮފީހުން އަމަލުކޮށްފައިނުވެ އެވެ. އެ އާރްޓީއައި ގައި އެދިފައި އޮތީ ޗާގޯސް އާއި ގުޅޭގޮތުން ރައީސް މުއިއްޒު މަޝްވަރާއެއް ކުރައްވާފައިވޭތޯ ނުވަތަ ނޫންތޯ ސާފުކުރުމަށެވެ.
އައިކޮމްއިން ވަނީ ޖަވާބު ނުދީ ހުރި ހުރިހާ އާރްޓީއައި އަކަށް 7 ދުވަހުގެ ތެރޭގައި ޖަވާބު ދިނުމަށް ރައީސް އޮފީހަށް އަންގާފަ އެވެ. އަދި ޖަވާބު ނުދޭނަމަ، ދައުވާ ކުރާނެކަމުގެ އިންޒާރު އައިކޮމްގެ ރައީސް ދެއްވި އެވެ.
