"ސުޕަރޖަމްބޯ" ގެ ނަމުން މަޝްހޫރުވެފައިވާ ބިޔަ އޭ380 މަތިންދާބޯޓުތަކުގެ ޒަމާން ނިމުމަކަށް އަންނަނީބާ؟

ކުއަންޓަސް އެއަރލައިނުން އެ ކުންފުނީގެ އޭ380 މަރުކާގެ ބޯޓުތައް ބޭނުންކުރުން ހުއްޓާލުމަށް ނިންމައިފި އެވެ. މިއާއެކު އުފެދޭ ސުވާލަކީ، "ސުޕަރޖަމްބޯ" ގެ ނަމުން މަޝްހޫރުވެފައިވާ މި ބިޔަ ބޯޓުތަކަށް އަލްވަދާއު ކިޔަންވީ ވަގުތު ޖެހުނީ ހެއްޔެވެ؟

މިއީ އާދަޔާޚިލާފަށް ބޮޑު ބޯޓެކެވެ. ދަތުރުވެރިންގެ މެދުގައި ނުހަނު މަގުބޫލު ބޯޓެކެވެ. ނަމަވެސް، މި ބޯޓުގެ ރަންޒަމާން މާޒީވެފައިވާކަން މިހާރު ވަނީ ސާފުކޮށް ފެންނާށެވެ. އަދި މިއީ އެތައް ފަހަރަކު އޭގެ ބޭނުން ކެނޑި، އަލުން އަނބުރާ ޚިދުމަތަށް ނެރެފައިވާ ބޯޓެއްވެސް މެ އެވެ.

އޮސްޓްރޭލިއާގެ ގައުމީ އެއަރލައިން، ކުއަންޓަސްއިން އެ ކުންފުނީގެ އެއަރބަސް އޭ380 ސުޕަރޖަމްބޯ ފްލީޓް އެއްކޮށް ރިޓަޔަރ ކުރަން ތައްޔާރުވަމުންދާއިރު، ދެ ބުރިއަށް ފަރުމާކޮށްފައިވާ މި ބިޔަ ބޯޓުތަކުގެ ޒަމާން މިހާރު މިއޮތީ ނިމުމަކަށް އައިސްފައި ހެއްޔެވެ؟

މިދިޔަ އޯގަސްޓް މަހު ކުއަންޓަސްއިން ހާމަކުރި ގޮތުގައި، އެ ކުންފުނީގެ އަތުގައި ހުރި 10 އޭ380 ބޯޓު 2028 ވަނަ އަހަރުން ފެށިގެން ބޭނުންކުރުން ހުއްޓާލާނެ އެވެ. މިއީ ކުރިން ތާވަލުކުރި ތާރީޚަށްވުރެ ހަތަރު އަހަރު އަވަސް ނިންމުމެކެވެ. މި ނިންމުން ނިންމީ ބޯޓުތައް މަރާމާތުކުރުމުގެ ޚަރަދާއި ތެލުގެ ޚަރަދު ބޮޑުވުމުގެ ސަބަބުންނެވެ. މިއީ މި ބިޔަ ބޯޓުތައް މިހާރުވެސް ބޭނުންކުރަމުންދާ އެހެން އެއަރލައިންތަކުންވެސް ފާހަގަކުރަމުންދާ ބޮޑު ކަންބޮޑުވުމެކެވެ.

ކުއަންޓަސްގެ މި ނިންމުމަކީ ސުޕަރޖަމްބޯ ޖެޓުތަކުގެ މުސްތަގުބަލަށް އެޅުނު އިތުރު ހުރަހެކެވެ. އޭވިއޭޝަން އެނަލިޓިކްސް ފާމެއް ކަމަށްވާ "ސީރިއަމް" ގެ ތަފާސްހިސާބުތަކުން ދައްކާގޮތުގައި، 2010 ގެ ފަހުކޮޅު ދުނިޔޭގައި 230 އަށްވުރެ ގިނަ އޭ380 ބޯޓު އޮޕަރޭޓް ކުރަމުންދިޔަ ނަމަވެސް، މިހާރު ޚިދުމަތުގައި އޮތީ އެންމެ 171 ބޯޓެވެ. އޯޑަރުތައް މަދުވުމުގެ ސަބަބުން އެއަރބަސް ކުންފުނިން 2021 ވަނަ އަހަރު މި ބޯޓު އުފެއްދުން ވަނީ ހުއްޓާލާފަ އެވެ. އަދި ކޮވިޑް-19 ގެ ބަލިމަޑުކަމާ ގުޅިގެން، އެއަރ ފްރާންސް އަދި ތައި އެއަރވޭސް ފަދަ އެއަރލައިންތަކުން ވަނީ އެ ކުންފުނިތަކުގެ އޭ380 ފްލީޓް އެއްކޮށް ރިޓަޔަރ ކޮށްފަ އެވެ.

މިއީ ލަގްޒަރީ އޭވިއޭޝަންގެ ދާއިރާއަށް އަންނަމުންދާ ބަދަލުތައްވެސް ރަމްޒުކޮށްދޭ ކަމެކެވެ. އޭ380 ބޯޓުތައް އެންމެ ފުރަތަމަ ތައާރަފުވިއިރު، މެދުއިރުމަތީގެ އެއަރލައިންތަކުން މި ބޯޓު ބޭނުންކުރީ އެގްޒެކެޓިވް ޓްރެވަލް މާކެޓުގެ ބޮޑު ބައެއް ކޮންޓްރޯލް ކުރުމަށެވެ. ނަމަވެސް، މިހާރު އެހެން އެއަރލައިންތަކުން އާ އުސޫލުތަކަށް ހޭނެމުންދާއިރު، އޭ380 އަކީ ކުރިން އޮތް ފަދަ ވަރުގަދަ ބާރެއް ނޫނެވެ.

އޭ380 ބޯޓުތަކަށް މީގެ ކުރިންވެސް މިފަދަ ގޮންޖެހުންތަކާ ކުރިމަތިވެފައިވެ އެވެ.

ކޮވިޑްގެ ދުވަސްވަރު ވައިގެ ދަތުރުފަތުރު ހުއްޓިފައި އޮތްއިރު، ގިނަ ބަޔަކު ގަބޫލުކުރީ އޭ380 ގެ ޒަމާން ނިމުނީ ކަމަށެވެ. އަދި ކުރިއަށް އޮތީ ތެޔޮ ޚަރަދު ކުޑަ، ކުދި ބޯޓުތަކުގެ ޒަމާން ކަމަށް ބެލެވުނެވެ. ނަމަވެސް، މި ބޯޓަށް އޮތް މަގުބޫލުކަމުގެ ސަބަބުންނާއި، އެއަރބަސް އަދި ބޯއިންގްގެ އާ ބޯޓުތައް އުފެއްދުން ލަސްވުމާ ގުޅިގެން، އޭ380 އަލުން ޚިދުމަތަށް ނެރުނެވެ.

ކުއަންޓަސްއިން އެ ކުންފުނީގެ "ފްލައިންގް ކެންގަރޫ" ލޯގޯ ޖަހާފައިވާ އޭ380 ބޯޓުތައް ދަތުރު ހުއްޓާލާނެ ސީދާ ތާރީޚެއް އަދި ކަނޑަނޭޅި ނަމަވެސް، މި ބޯޓަށް ބޮޑު ލޯތްބެއް އޮތް ކުއަންޓަސްގެ ނިންމުމަކީ މި ބޯޓުގެ މުސްތަގުބަލު އޮތް ގޮތް އަންގައިދޭ ނިޝާނެކެވެ.

"މިއީ 2021 ވަނަ އަހަރުން ފެށިގެން އުފެއްދުން ހުއްޓާލާފައިވާ ބޯޓެއް،" ކުއަންޓަސް އިންޓަރނޭޝަނަލް އެންޑް ފްރައިޓްގެ ސީއީއޯ ކޭމް ވޮލަސް ދާދިފަހުން އިންވެސްޓަރުންނަށް ވިދާޅުވި އެވެ. "މިހާރުވެސް ސަޕްލައި ޗެއިންގެ ދަތިތައް އެބަހުރި، އަދި ކުރިއަށް އޮތް ތަނުގައި މި ދަތިތައް އިތުރުވާނެކަން އަޅުގަނޑުމެންނަށް އެނގޭ."

އޮމާން އަރާމު ދަތުރެއް

މިއީ އޭ380 ބޯޓަށް ޚާއްސަ ލޯތްބެއް އޮންނަ ދަތުރުވެރިންނަށް ލިބޭނެ ދެރަ ޚަބަރެކެވެ. މި ބޯޓަކީ އެހެން ބޯޓުތަކާ ނުބައްދަލު ހަމަޖެހުމާއި އަރާމު ދަތުރެއް ލިބޭ ބޯޓެއްގެ ގޮތުގައި މަޝްހޫރު ބޯޓެކެވެ. ބޯޓުގެ މަތީ ބުރިއަށް އެރުމުގެ ތަފާތު ތަޖުރިބާއާއި، 500 އަށްވުރެ ގިނަ މީހުންނަށް ފަސޭހަކަމާއެކު ތިބެވޭ ފަދަ ތަނަވަސް ޖާގައަކީ މި ބޯޓުގެ ޚާއްސަ ސިފަތަކެވެ.

ސިންގަޕޫރު އެއާލައިންސް ފަދަ އެއާލައިންތަކުން، އޭ380 މަރުކާގެ ބޯޓުތަކުގައި ޑަބަލް ބެޑް ނުވަތަ ދެމީހުންނަށް އެކުގައި ނިދޭނެ އެނދު ހިމެނޭހެން ފަސްޓް ކްލާސްގެ އެންމެ މަތީ ފަންތީގެ ޚިދުމަތްތައް ތައާރަފުކުރުމާ ގުޅިގެން، އެ މަރުކާގެ ބޯޓުތަކަކީ ވައިގެ ދަތުރުފަތުރުގެ ދާއިރާގައި މުއްސަނދި އަދި އަރާމު ޚިދުމަތްތަކުގެ ރަމްޒަކަށް ވެގެންގޮސްފައިވޭ | ގެޓީ އިމޭޖަސް

ބޯޓުތަކަށް ޝައުގުވެރިވާ "ޕްލޭންސްޕޮޓަރުން" ވެސް މިކަމާ މާޔޫސްވާނެ އެވެ. މި ބިޔަ ބޯޓު ވައިގެ ތެރޭގައި އުދުހިފައިދާއިރު ފެންނަ ހިތްގައިމު މަންޒަރަކީ އެހެން އެއްވެސް ވިޔަފާރި ބޯޓަކުން ފެންނަ މަންޒަރެއް ނޫނެވެ.

"މިއީ އަޅުގަނޑު އެންމެ ގަޔާވާ ބޯޓު،" އޮސްޓްރޭލިއާގެ މެލްބަންއަށް ނިސްބަތްވާ، ކުއަންޓަސްއިން ގަވާއިދުން ދަތުރުކުރާ ސެބަސްޓިއަން ބާނީ ބުންޏެވެ. އޭނާ ބުނި ގޮތުގައި އެހެން ބޯޓުތަކަށްވުރެ އޭ380 ގައި ދަތުރުކުރާއިރު ޖާގަ ތަނަވަސްވެފައި، ދަތުރު މާ އޮމާނެވެ.

އުފާވެރި ޚަބަރަކީ، މި ބޯޓުތައް އުވާލުމުގެ މަސައްކަތް ފެށުނު ނަމަވެސް، ކުރިއަށް އޮތް މަދު އަހަރުތަކެއްގައި އަދި މި ބޯޓުތައް ފެންނާނެ ކަމެވެ.

ސީރިއަމްގެ އެއަރކްރާފްޓް ވެލުއޭޝަންސްގެ ގްލޯބަލް ހެޑް ޖޯޖް ޑިމިޓްރޮފް ވިދާޅުވި ގޮތުގައި، އޭ380 ބޭނުންކުރުމުގައި މިހާރު އޮތީ ދެ ގޮތެކެވެ. އެއީ އެމިރޭޓްސް އެއަރލައިންގެ ގޮތާއި، ދެން ހުރި އެހެން އެއަރލައިންތަކުގެ ގޮތެވެ.

އެންމެ ގިނަ އޭ380 ބޯޓު ގެންގުޅޭ އެމިރޭޓްސްއިން ވަނީ ދުބާއީގެ އެއަރޕޯޓުގައި މި ބޯޓުތަކަށް ޚާއްސަކޮށްގެން މުޅި ޓާމިނަލްތައް ފަރުމާކޮށްފަ އެވެ. ނަމަވެސް، މަދު ބޯޓުކޮޅެއް ގެންގުޅޭ އެހެން އެއަރލައިންތަކުން މި ބޯޓު ބޭނުންކުރަނީ ހަމައެކަނި އެންމެ ގިނަ މީހުން ދަތުރުކުރާ މުހިންމު ރޫޓުތަކުގަ އެވެ.

އެއަރބަސް އޭ380 މަރުކާގެ ބޯޓުތައް އުފައްދައި ބާޒާރަށް ނެރުނުއިރު، އެ ކުންފުނިން އުންމީދުކުރި މިންވަރާ ގާތަށްވެސް އެ ބޯޓުތައް ވިކިފައެއް ނުވެއެވެ. މިކަމާ ގުޅިގެން، އެ މަރުކާގެ ބޯޓުތައް އުފެއްދުން 2021 ވަނަ އަހަރު އެ ކުންފުނިން ވަނީ ހުއްޓާލާފައި | ގެޓީ އިމޭޖަސް

"މަދު އަދަދަކަށް އޭ380 ގެންގުޅޭ އެއަރލައިންތަކުން އެ ބޯޓުތައް ރިޓަޔަރ ކުރާނެ،" ޑިމިޓްރޮފް ވިދާޅުވި އެވެ. "ޚާއްސަކޮށް މުޅި އިންޑަސްޓްރީ ޕްރީމިއަމް ދަތުރުތަކަށް އަމާޒު ހިފާފައިވާ ދަނޑިވަޅެއްގައި." އޭނާ އިތުރަށް ވިދާޅުވި ގޮތުގައި، މުސްތަގުބަލުގައި މިއީ ހަމައެކަނި އެމިރޭޓްސްއިން ބޭނުންކުރާ ބޯޓަކަށް ވެގެންދާނެ އެވެ.

އެހެން މާހިރުންވެސް އެއްބަސްވާ ގޮތުގައި، އޭ380 ބޭނުންކުރާ އެންމެ ފަހު އެއަރލައިނަކަށް ވާނީ އެމިރޭޓްސް އެވެ. ސީރިއަމްގެ ތަފާސްހިސާބުތަކުން ދައްކާގޮތުގައި، އެމިރޭޓްސްއިން މިހާރުވެސް 101 ބޯޓު އޮޕަރޭޓް ކުރާއިރު، 15 ބޯޓު ރޭކްކޮށްފައި އެބަހުއްޓެވެ. މިހާރު ބޯޓުތައް އުފައްދާ ރޭޓަށް ބަލާއިރު، މިހާ ގިނަ އަދަދެއްގެ ބޯޓު ބަދަލުކުރުމަށްވެސް ގާތްގަނޑަކަށް 10 އަހަރު ނަގާނެ އެވެ.

"އެމިރޭޓްސްގެ އަމާޒަކީ 2040 ގެ ކުރީކޮޅާ ހަމައަށް އޭ380 ބޭނުންކުރުން. އެހެންވެ އަޅުގަނޑުމެން ދަނީ ބިލިއަނުން ޚަރަދުކޮށްގެން ބޯޓުތަކުގެ އެތެރެ އާކޮށް، ސްޓާލިންކް ފަދަ އާ ޓެކްނޮލޮޖީތައް ގާއިމުކުރަމުން،" އެމިރޭޓްސްގެ ރައީސް ޓިމް ކްލާކް ވިދާޅުވި އެވެ.

އޭނާ އިތުރަށް ވިދާޅުވީ، އެމިރޭޓްސް އޭ380 އަކީ އަދިވެސް ކަސްޓަމަރުންގެ މެދުގައި ބޮޑު މަގުބޫލުކަމެއް އޮތް، އަދި ޑިމާންޑާ އެއްވަރަށް މީހުން އުފުލުމުގެ ގާބިލުކަން ހުރި ބޯޓެއް ކަމަށެވެ.

އެންމެ ފަހުން އުފެއްދި އޭ380 ބޯޓުވެސް 2021 ވަނަ އަހަރު ހަވާލުކުރީ އެމިރޭޓްސްއާ އެވެ.

އެހެން އެއަރލައިންތަކުން މި ބޯޓަށް އެހާ ބޮޑަށް ބަރޯސާނުވި ނަމަވެސް، ބައެއް އެއަރލައިންތަކުން ވަނީ ކުރިއަށް އޮތް 10 އަހަރު ދުވަހު މި ބޯޓު ބޭނުންކުރާނެ ކަމަށް ބުނެފަ އެވެ.

ލުފްތަންސާ ގްރޫޕުގެ ސީއީއޯ ކާސްޓަން ސްޕޯރ 2021 ގައި ވިދާޅުވީ އޭ380 ބޯޓުތައް ދާއިމީކޮށް ހުއްޓާލާފައިވާ ކަމަށެވެ. ނަމަވެސް، ދެ އަހަރު ފަހުން އެ ބޯޓުތައް އަލުން ޚިދުމަތަށް ނެރުނީ އެއަރބަސް އަދި ބޯއިންގްގެ އާ ބޯޓުތައް، ޚާއްސަކޮށް 777X އުފެއްދުން ލަސްވުމާ ގުޅިގެންނެވެ.

އެއާބަސް އޭ380 މަރުކާގެ ބޯޓުތަކަކީ ވިޔަފާރީގެ ގޮތުން ބޮޑު ކާމިޔާބީއެއް ހޯދާފައިވާ ބޯޓުތަކަކަށް ނުވި ނަމަވެސް، މިއީ އޭވިއޭޝަން ދާއިރާއަށް ލޯބިކުރާ ފަރާތްތަކާއި ދަތުރުވެރިންގެ މެދުގައި ނުހަނު މަގުބޫލު ބޯޓެކެއް | ގެޓީ އިމޭޖަސް

މިއަދު ލުފްތަންސާއިން ދަނީ އެ ކުންފުނީގެ އަތުގައި ހުރި އަށް އޭ380 ބޯޓުގެ ބިޒްނަސް ކްލާސް ސޫޓްތަކާއި މުނިފޫހިފިލުވުމުގެ ނިޒާމުތައް އަޕްގްރޭޑް ކުރަމުންނެވެ. މިއީ އެ ބޯޓުތައް އަދި ދުވަސްކޮޅަކު ގެންގުޅޭނެ ކަމުގެ ނިޝާނެކެވެ. އެ އެއަރލައިނުން ބުނި ގޮތުގައި 2030 ގެ އަހަރުތަކުގެ ތެރޭގައިވެސް އޭ380 ބޭނުންކުރާނެ އެވެ.

އޯލް ނިޕޯން އެއަރވޭސް، ބްރިޓިޝް އެއަރވޭސް އަދި ސިންގަޕޯ އެއަރލައިންސް ފަދަ އެއަރލައިންތަކުންވެސް މި ބޯޓުތައް ވަގުތުން ހުއްޓާލުމުގެ ވިސްނުމެއް ނެތެވެ. ސިންގަޕޯ އެއަރލައިންސްއިން ބުނި ގޮތުގައި މިއީ އަދިވެސް އެންމެ މަގުބޫލު އެއް ބޯޓެވެ.

އެހެންކަމުން، ލަންޑަން، މިއުނިކް، ދުބާއީ އަދި ސިންގަޕޯ ފަދަ ބޮޑެތި އެއަރޕޯޓުތަކުން އަދިވެސް އޭ380 ފެންނާނެ އެވެ.

އޭ380 ގެ ޒަމާން ނިމުމަކަށް އަންނަން ދިމާވި އެއް ސަބަބަކީ ލަގްޒަރީ ދަތުރުފަތުރަށް އައި ބަދަލެވެ. އޭ380 އެންމެ ކުރިއަރައިދިޔަ ދުވަސްވަރު، މާކެޓުގައި ގިނައީ އަގުހެޔޮ އިކޮނޮމީ ސީޓުތަކެވެ.

ނަމަވެސް ގަލްފް އެއަރލައިންތަކުން މިކަން ބަދަލުކޮށް، އޭ380 ބޭނުންކޮށްގެން މުއްސަނދި ދަތުރުވެރިންނަށް ޚާއްސަ ޕްރީމިއަމް ޚިދުމަތްތަކެއް ތައާރަފުކުރި އެވެ. އެމިރޭޓްސްއިން ބޯޓު ތެރޭގައި ފުރަތަމަ ފަހަރަށް ފެންވަރާނެ ތަނެއް ހެދި އެވެ. އިއްތިހާދު އެއަރވޭސްއިން ތިން ކޮޓަރީގެ "ދަ ރެސިޑެންސް" ތައާރަފުކުރި އެވެ.

ނަމަވެސް މިހާރު ޕްރީމިއަމް ދަތުރުތައް ވަނީ ބަދަލުވެފަ އެވެ. މިހާރު އެހެން އެއަރލައިންތަކުންވެސް ވަނީ އެމީހުންގެ ޚިދުމަތްތައް ވަރަށް ބޮޑަށް ރަނގަޅުކޮށްފަ އެވެ. މިހާރު އަމިއްލަ މިނީ ސޫޓުތަކަކީ އާންމު ކަމެކެވެ. ނަމަވެސް ވައިގެ ތެރޭގައި ފެންވެރުމުގެ ޚިދުމަތަކީ އެހާ ބޮޑު ތަރުހީބެއް ލިބުނު ކަމެއް ނޫނެވެ.

ކުއަންޓަސްއިންވެސް އޭ380 ގެ ބަދަލުގައި ގެންނަ ބޯޓުތަކުގައި ޕްރީމިއަމް ޚިދުމަތްތައް އިތުރުކުރާނެ އެވެ. ސީއީއޯ ވޮލަސް ވިދާޅުވި ގޮތުގައި، އާ އެއަރބަސް އޭ350-1000 ބޯޓުތަކުގައި ފަސްޓް ކްލާސް، ބިޒްނަސް އަދި ޕްރީމިއަމް އިކޮނޮމީ ސީޓުތައް ގިނަވާނެ އެވެ. މީގެ މާނައަކީ އަރާމު ދަތުރަކަށް ބޮޑު އަގުދޭން ތައްޔާރަށް ތިބި މީހުންނަށް ޚާއްސަ ސީޓުތައް އިތުރުވުމެވެ.

ޕްރީމިއަމް ކެބިންތައް ބޮޑުވުމުން، ބޯޓުގެ ފަހަތުގައި ހުންނަ އިކޮނޮމީ ސީޓުތައް މަދުވެ، އެ ސީޓުތަކުގެ އަގު ބޮޑުވުމަކީ އެކަށީގެންވާ ކަމެކެވެ. މިއީ ބަޖެޓް ދަތުރުވެރިންނަށް އެހާ ރަނގަޅު ކަމެއް ނޫނެވެ.

މީގެ ކުރިން ބޯއިންގް 747 އަށް ވީގޮތަށް، އޭ380 ވެސް މަޑުމަޑުން އުވާލެވެމުން ގޮސް، އެންމެ ފަހުން އޮންނާނީ ހަމައެކަނި އެމިރޭޓްސްގަ އެވެ. ބައެއް ކުދި އެއަރލައިންތަކުން މި ބޯޓު ބޭނުންކުރަން އުޅުނު ނަމަވެސް، މިއީ މާ ބޮޑު މާކެޓަކަށް ވާނެ ކަމަކަށް މާހިރުން ގަބޫލެއް ނުކުރެ އެވެ.

ލަފާކުރެވޭ ގޮތުގައި 2030 ގެ މެދުތެރޭގައި އޭ380 ވެގެންދާނީ ހަމައެކަނި އެމިރޭޓްސްއިން ބޭނުންކުރާ ބޯޓަކަށެވެ.

އޭ380 ބޭނުންކުރުން ހުއްޓާލުމަކީ އެއަރލައިންތަކުގެ ޝަރަފަށް އުނިކަމެއް އަތުވެދާނެ ކަމެއް ނަމަވެސް، މާހިރުން ބުނާ ގޮތުގައި އެއަރލައިންތަކުން މިހާރު އެކަމަކަށް މާ ބޮޑު ފަރުވާލެއް ނުބަހައްޓަ އެވެ.

"މިއަދު އެއަރލައިންތަކުން ދަތުރުކުރަނީ ފައިދާ ހޯދަން، ޝަރަފަކަށް ނޫން،" އެޓްމޮސްފިއަރ ރިސާޗް ގްރޫޕުގެ ރައީސް ހެންރީ ހާޓްވެލްޑް ވިދާޅުވި އެވެ. "ފައިދާ ނުލިބޭނަމަ، ހަމައެކަނި ދެއްކުންތެރިކަމަށް ބޯޓެއް ގެންގުޅުމުގެ ޝައުގުވެރިކަމެއް އެއަރލައިންތަކަކު ނެތް."

އޭނާ ތަފްސީލުކޮށްދެއްވި ގޮތުގައި، އޭ380 އަކީ އެއަރބަސްގެ ކާމިޔާބީ ދައްކައިދޭން އުފެއްދި ބޯޓެކެވެ. ނަމަވެސް، އެއަރބަސްއިން އުންމީދުކުރި ވަރަށް މި ބޯޓު ނުވިކުނެވެ. އަދި މިއަށްވުރެ ރަނގަޅު އާ ބޯޓުތައް މާކެޓަށް އައުމުން، މި ބޯޓުގެ މަގާމު ގެއްލުނެވެ.

"އޭ380 އަކީ ޓެކްނޮލޮޖީގެ ގޮތުން ފާހަގަކޮށްލެވޭ މޮޅު އުފެއްދުމެއް، ނަމަވެސް ވިޔަފާރީގެ ގޮތުން މިއީ އެއަރބަސްއަށް ލިބުނު މާޔޫސްކަމެއް،" ހާޓްވެލްޑް ވިދާޅުވި އެވެ. "ތެޔޮ މަދުން ހިނގާ، ދުރު ރާސްތާއަށް ދަތުރުކުރާ އާ ބޯޓުތައް ލިބެން ފެށުމުން، އެއަރލައިންތަކަށް މިހާރު ވިސްނެނީ ބޮޑު ބޯޓަކަށްވުރެ ކުޑަ ބޯޓެއް މާ ފައިދާ ބޮޑު ކަމަށް."