ހޮންކޮންގ ރަންވޭއިން ކައްސާލައިގެން ކާގޯ މަތިންދާބޯޓެއް މޫދަށް ވެއްޓި ދެމީހަކު މަރުވެއްޖެ

ހޮންކޮންގ ރަންވޭއިން ކައްސާލައިގެން ކާގޯ މަތިންދާބޯޓެއް މޫދަށް ވެއްޓި ދެމީހަކު މަރުވެއްޖެ އެވެ.

ހާދިސާގައި މަރުވީ ހޮންކޮންގ ވައިގެ ބަނދަރުގެ ސެކިއުރިޓީގެ ދެމުވައްޒަފެއް ކަމަށް ރިޕޯޓުތައް ބުނެއެވެ. އެމީހުން މަރުވީ ކާގޯ މަތިންދާބޯޓު ރަންވޭއިން ބޭރަށް ކައްސާލައިގެން ގޮސް ޕެޓްރޯލް ކުރަން އުޅުނު ވެހިކަލްއާ ޖެހުމުގެ ސަބަބުންނެވެ.

ދުބާއީ އިން ދަތުރު ކުރި އެމިރޭޓްސްގެ ފްލައިޓް އީކޭ 9788 އަށް މިހާދިސާ ކުރިމަތިވީ ގާތްގަނޑަކަށް ހެނދުނު 3:50 ގައެވެ. މި ބޯޓު ރަންވޭ އިން ކައްސާލައިގެން ގޮސް، ސަރަޙައްދު ވަކިކުރާ ފެންސް ވައްޓާލައި، ސެކިއުރިޓީ ވެހިކަލް އަކާ ޖެހި، އެ ވެހިކަލް ވެސް މޫދަށް ވެއްޓުނެވެ.

ބޯއިންގ 747 މަތިންދާބޯޓު މޫދަށް ވެއްޓުނު ނަމަވެސް ބޯޓުގައި ތިބި ހަތަރު ފަޅުވެރިން ސަލާމަތްވިއެވެ.

ހާދިސާގައި މަރުވެފައި ވަނީ ދެ ސެކިއުރިޓީ އޮފިސަރުންނެވެ. އެއީ އުމުރުން 30 އަހަރުގެ މީހަކާއި، 41 އަހަރުގެ މީހެކެވެ. މީގެ ތެރެއިން އެކަކު ހަތް އަހަރު އަދި އަނެކަކު 12 އަހަރު ވަންދެން އެއަރޕޯޓުގައި މަސައްކަތް ކޮށްފައިވާއިރު، ދެ މީހުންނަކީ ވެސް ވަރަށް ތަޖުރިބާކާރު ދެ މީހުން ކަމަށް ބުނެފައިވެ އެވެ.

ހާދިސާ އަށް ފަހު ދެ މީހުންގެ ހަށިގަނޑު ހޯދިއިރު ވެސް، ދެ މީހުން ވަނީ މަރުވެފަ އެވެ. ހާދިސާގައި އެކްސިޑެންޓުވި ވެހިކަލް އޮތީ ގޮނޑޮދޮށުން ފަސް މީޓަރު ދުރުން، ހަތް މީޓަރު އަޑީގައި ކަމަށް ރިޕޯޓުތައް ބުނެ އެވެ.

އެއާޕޯޓު އޮޕަރޭޝަންސްގެ އެގްޒެކްޓިވް ޑިރެކްޓަރު ސްޓީވަން ޔިއު ވިދާޅުވެފައިވާ ގޮތުގައި ހާދިސާ ހިނގިއިރު، ޕެޓްރޯލް ކާރު ދުއްވަމުން ދިޔައީ ރަންވޭއިން ރައްކާތެރި ދުރު މިނެއްގައި، ފެންސުން ބޭރުގައި އޮންނަ މަގުންނެވެ.

މި ހާދިސާއާ ގުޅިގެން މޫސުމުގެ ޙާލަތާއި، ރަންވޭގެ ޙާލަތާއި، މަތިންދާ ބޯޓާއި ކުރޫގެ ޙާލަތު ބަލައި ތަހުގީގު ކުރިއަށް ގެންދަމުން އަންނަ ކަމަށް އޮފިޝަލުން ވަނީ ހާމަ ކޮށްފަ އެވެ. އެކަމާ ގުޅިގެން ފުލުހުން ބުނެފައި ވަނީ ޖިނާއީ ތަހުގީގެއް ކުރިއަށް ގެންދިޔުމުގެ ފުރުސަތު ވެސް އެކަމުގައި އޮތް ކަމަށެވެ.

ބީބީސީ އަށް މައުލޫމާތު ދެމުން އެމިރޭޓްސް އިން ބުނެފައި ވަނީ ބޯއިންގް 747-481 ކާގޯ މަތިންދާ ބޯޓަކީ ޓާކިޝް ކެރިއާ އެކްޓް އެއާލައިންސް އިން ވެޓް ލީސް ކޮށްފައިވާ ބޯޓެއް ކަމަށެވެ. ބޯޓުގައި އެއްވެސް ކާގޯއެއް ނެތް ކަމަށާއި، ކުރޫ މެމްބަރުން ރައްކާތެރި ކަމާ އެކު ސަލާމަތްވެފައިވާ ކަމަށް ވެސް ވަނީ ހާމަ ކޮށްފަ އެވެ

މިއީ ރަނގަޅު ސަލާމަތީ ރެކޯޑެއް އޮތް ހޮންކޮންގ އިންޓަރނޭޝަނަލް އެއަރޕޯޓުގައި މި ފަހުގެ ތާރީޚެއްގައި ހިނގި އެންމެ ނުރައްކާތެރި ވައިގެ ދަތުރުފަތުރުގެ ހާދިސާތަކުގެ ތެރެެއިން ހާދިސާ އެކެވެ.