ލަންޑަނުން ފުރި އެމިރޭޓްސް ގެ ބޯޓެއް މައްސަލަ ޖެހި އަނބުރާ ލަންޑަނަށް ޖައްސައިފި

އާ އަހަރު ވިލޭރޭ އިރާކޮޅު އެމިރޭޓްސް އެއާލައިންގެ ބޯޓެއް އުދުހެމުން ދަނިކޮށް ދިމާވި ޓެކްނިކަލް މައްސަލައަކާ ގުޅިގެން، ލަންޑަންގެ މަތީގައި 90 މިނެޓު ވަންދެން ބުރުޖަހަން ޖެހި، އެންމެ ފަހުން ހީތުރޯ އެއާޕޯޓަށް އަނބުރާ ޖައްސައިފިއެވެ.

ބޯޓު ފުރިތާ ކުޑަވަގުތުކޮޅެއްގެ ތެރޭގައި، ބޯޓުގެ ފުރޮޅު ނެރޭ ކެންޑުމަށް މައްސަލައެއް ދިމާވެފައިވާކަން ކުރޫން ރިޕޯޓްކުރިއެވެ. އެ ވަގުތު ބޯޓު އޮތީ ރައްކާތެރިކަމާއެކު ޖެއްސުމަށް އެކަށައަޅާފައި އޮންނަ ބަރުދަނަށް ވުރެ މާ ބަރުކޮށް ކަމަށްވާތީ، ބޯޓުގެ އޮނިގަނޑަށް ގެއްލުމެއް ލިބުނަ ނުދިނުމަށާއި ރައްކާތެރިކަމާއެކު ޖެއްސުމަށްޓަކައި، ބޯޓުގައި ހުރި ތެޔޮ އަންދައިގެން ބަރުދަން ލުއިކުރަން ޖެހުނެވެ.

"ޑެއިލީ މެއިލް" އިން ރިޕޯޓްކޮށްފައިވާ ގޮތުގައި، މި މައްސަލައާ ގުޅިގެން ބޯޓަށް ވަކި ސަރަޙައްދެއްގެ މަތީގައި ބުރުޖަހަން ޖެހުނެވެ. ބޯޓުގެ ބަރުދަން ލުއިކުރުމަށްޓަކައި އިންޖީނުތަކުން ތެޔޮ އަންދާ ހުސްކުރުމަށް، ލަންޑަންގެ އިރުދެކުނުގައި އޮންނަ އޯޕިންގްޓަން ސަރަޙައްދުގެ 10،000 ފޫޓު މަތީގައި ގާތްގަނޑަކަށް 90 މިނެޓު ވަންދެން ބޯޓު ބުރުޖެހި ކަމަށް އެ ނޫހުން ބުނެފައިވެއެވެ.

ބޯޓުގެ ބަރުދަން ރައްކާތެރި މިންވަރަކަށް ތިރިވުމުން، ހީތުރޯ އެއާޕޯޓަށް ޖެއްސުމުގެ ހުއްދަ ލިބި، ފުރިތާ ގާތްގަނޑަކަށް ދެ ގަޑިއިރު ފަހުން ބޯޓު ވަނީ ރައްކައުތެރި ކަމާ އެކު ބިމަށް ތިރިކޮށްފައެވެ.

އާންމުގޮތެއްގައި އޭ380 މަރުކާގެ ބޯޓެއް ރައްކާތެރިކަމާއެކު ޖެއްސޭނެ އެންމެ މަތީ ބަރުދަނަކީ 386،000 އާއި 394،000 ކިލޯގްރާމާ ދެމެދުގެ މިންވަރެކެވެ.