ސްރީ ލަންކާއިން މަތިންދާބޯޓު ގަތުމުގެ މުއާމަލާތެއްގައި 100 މިލިއަން ރުޕީސްގެ ރިޝްވަތު ގަބޫލުކުރި ކަމުގެ ތުހުމަތުގައި ހައްޔަރުކުރި ނަމާލްގެ ތަހުގީގަށް އޮސްޓްރޭލިއާ، ސިންގަޕޫރު، ފްރާންސް އަދި އެމެރިކާގެ އެހީތެރިކަން ވަނީ ދީފައި

އެއާބަސް މަތިންދާބޯޓު ގަތުމުގެ މުއާމަލާތަކާ ގުޅިގެން 100 މިލިއަން ރުޕީސްގެ ރިޝްވަތު ގަބޫލުކުރި ކަމުގެ ތުހުމަތުގައި ކޮރަޕްޝަން އެންޑް ބްރައިބަރީ ކޮމިޝަނުން ހައްޔަރުކުރި އެ ގައުމުގެ ރައްޔިތުންގެ މަޖިލީހުގެ މެންބަރު ނަމާލް ރާޖަޕަކްސަ، މި މަހުގެ 18 ވަނަ ދުވަހުގެ ނިޔަލަށް ބަންދުގައި ބެހެއްޓުމަށް ކޮލަމްބޯގެ ޗީފް މެޖިސްޓްރޭޓް އަސަންގަ އެސް ބޮޑަރަގަމަ އިއްޔެ އަމުރުކޮށްފި އެވެ.

މި މައްސަލައިގެ ތަހުގީގަށް އޮސްޓްރޭލިއާ، ސިންގަޕޫރު، ފްރާންސް އަދި އެމެރިކާގެ އެހީތެރިކަން ލިބިފައިވާ ކަމަށް އެ ގައުމުގެ ޑެޕިއުޓީ ސޮލިސިޓަރ ޖެނެރަލް ވަނީ ވިދާޅުވެފަ އެވެ.

ކޮރަޕްޝަން އެންޑް ބްރައިބަރީ ކޮމިޝަނުގެ އޮފިސަރުން، ނަމާލް ރާޖަޕަކްސަ ބުރާސްފަތި ދުވަހު ހަވީރު 4:00 އެހާއިރު ކޮލަމްބޯ ޗީފް މެޖިސްޓްރޭޓް ކޯޓަށް ހާޒިރުކުރި އެވެ.

ކޮރަޕްޝަން އެންޑް ބްރައިބަރީ ކޮމިޝަނުގެ ފަރާތުން ކޯޓުގައި ވާހަކަދައްކަވަމުން ޑެޕިއުޓީ ސޮލިސިޓަރ ޖެނެރަލް ޖަނަކަ ބަންޑާރަ ވިދާޅުވީ، ނަމާލް ހައްޔަރުކުރީ އެއާބަސްގެ މުއާމަލާތާ ގުޅޭ ގޮތުން ކްރިމިނަލް އިންވެސްޓިގޭޝަން ޑިޕާޓްމަންޓާއި (ސީއައިޑީ) ކޮރަޕްޝަން އެންޑް ބްރައިބަރީ ކޮމިޝަނުން ގުޅިގެން ހިންގި ތަހުގީގަކަށް ފަހު ކަމަށެވެ.

"އޮސްޓްރޭލިއާ، ސިންގަޕޫރު، ފްރާންސް އަދި އެމެރިކާގެ އެހީތެރިކަމާއެކު މި ތަހުގީގު މިހާރު އޮތީ ފަހު މަރުހަލާގަ އެވެ. މި މުއާމަލާތުގެ އެއްބަސްވުމުގައި އޮތީ ކޮންމެ މަތިންދާބޯޓަކަށް އެއް މިލިއަން އެމެރިކާ ޑޮލަރުގެ ރިޝްވަތެއް ހޯދުމަށެވެ،" ޑެޕިއުޓީ ސޮލިސިޓަރ ޖެނެރަލް ވިދާޅުވި އެވެ.

އެއާބަސްގެ މި މުއާމަލާތުގައި ރިޝްވަތުގެ ގޮތުގައި ދިން 1.454 މިލިއަން ޔޫރޯ ޖަމާކޮށްފައިވަނީ ސިންގަޕޫރުގެ ސްޓޭންޑަޑް ޗާޓަރޑް ބޭންކުގައި ހުޅުވާފައިވާ "ބީއައިޒެޑް ސޮލިއުޝަންސް އިންކް" ނަމަކަށް ކިޔާ އެކައުންޓަކަށެވެ. މި އެކައުންޓަކީ ސްރީލަންކަން އެއާލައިންސްގެ ކުރީގެ ސީއީއޯ ކަޕިލަ ޗަންދްރަސޭނާގެ އަންހެނުން ޕްރިޔަންގާ ނިޔޯމާލީ ވިޖޭނަޔަކަގެ ފުރިހަމަ މިލްކުވެރިކަން އޮންނަ އެކައުންޓެއް ކަމަށް ރިޕޯޓުކޮށްފައިވެ އެވެ.

އެ އެކައުންޓުން 2014 ވަނަ އަހަރުގެ ނޮވެމްބަރު 19 އަދި ޑިސެމްބަރު 22 ގައި ދެ ފަހަރެއްގެ މަތިން ފައިސާ ޖަމާކޮށްފައިވަނީ ސިންގަޕޫރުގެ އޯސީބީސީ ބޭންކުގައި ހުޅުވާފައިވާ "ސޭބަރ ވިޝަން ހޯލްޑިންގް ލިމިޓެޑް" ގެ އެކައުންޓަށެވެ. މިއީ ނިމާލް ޕެރޭރާ ރިޔާސަތު ބަލަހައްޓާ ކުންފުންޏެކެވެ.

މި މައްސަލައިގެ ތަހުގީގު ޓީމުން ދާދިފަހުން ވަނީ އޮސްޓްރޭލިއާގައި ދިރިއުޅެމުންދާ ނިމާލް ޕެރޭރާ ހޯދައި، އޭނާގެ ބަޔާން ނަގާފަ އެވެ. އޭނާއަށް މަރުގެ އިންޒާރު ލިބެމުންދާތީ ސްރީލަންކާއަށް އައުމަށް އިންކާރުކުރުމާ ގުޅިގެން، އޭނާ ވަނީ ކޮރަޕްޝަން އެންޑް ބްރައިބަރީ ކޮމިޝަނުގެ އޮފިސަރުންނަށް ބަޔާނެއް ދީފަ އެވެ.

އޭނާ ބުނެފައިވާ ގޮތުގައި "ބީއައިޒެޑް ސޮލިއުޝަންސް އިންކް" އެކައުންޓުން އޭނާގެ "ސޭބަރ ވިޝަން ހޯލްޑިންގް ލިމިޓެޑް" އެކައުންޓަށް ލިބުނު 800,000 އެމެރިކާ ޑޮލަރު، ލަކްޝްމަން ނަމާލް ރާޖަޕަކްސައާ ވަނީ ހަވާލުކޮށްފަ އެވެ. މިއީ ސްރީލަންކާގެ ފައިސާއިން ބަލާނަމަ 100 މިލިއަން ރުޕީސް އެވެ.

ކޯޓުގައި ދައުލަތުގެ ފަރާތުން ބުނެފައިވަނީ އެއާބަސްގެ މައި ކުންފުނިން މިހާރު ވަނީ މި މައްސަލައިގެ ތަހުގީގަށް އެއްބާރުލުން ދިނުމަށް އެއްބަސްވެފައި ކަމަށެވެ. އެގޮތުން އެއާބަސްގެ އިސް އޮފިޝަލުން ތިން ފަހަރެއްގެ މަތިން ސްރީލަންކާއަށް ޒިޔާރަތްކޮށް، ހަތަރު ބަޔާނެއް ދީފައިވާ ކަމަށާއި، މި މުއާމަލާތާ ގުޅޭ ގިނަ ލިޔެކިޔުންތަކެއް ތަހުގީގު ކުރާ ފަރާތްތަކާ ހަވާލުކޮށްފައިވާ ކަމަށް ޑެޕިއުޓީ ސޮލިސިޓަރ ޖެނެރަލް ވިދާޅުވި އެވެ.

މި ލިޔެކިޔުންތަކުން އެއާބަސް ކުންފުންޏާއި ތުހުމަތުކުރެވޭ ނަމާލް ރާޖަޕަކްސައާ ދެމެދު އޮތް ގުޅުން ހާމަވެފައިވާ ކަމަށާއި، އޭނާ ހައްޔަރުކުރީ މި ހުރިހާ ކަމަކަށް ރިއާޔަތްކުރުމަށް ފަހު ކަމަށްވެސް ކޯޓުގައި ދައުލަތުގެ ފަރާތުން ބުނެފައިވެ އެވެ.

ނަމާލް ކަފާލާތުގެ ދަށުން ދޫނުކޮށް ބަންދުގައި ބެހެއްޓުމަށް ޕްރޮސެކިއުޝަނުން އެދުނެވެ.

ނަމާލް ރާޖަޕަކްސަގެ ދިފާއީ ވަކީލު،ސަމްޕަތު މެންޑިސް ކޯޓުގައި ބުނީ، ނަމާލް ހައްޔަރުކޮށް ކޯޓަށް ހާޒިރުކޮށްފައިވަނީ ހަމައެކަނި ނިމާލް ޕެރޭރާ ކިޔާ މީހަކު ދީފައިވާ ބަޔާނެއްގެ މައްޗަށް ބިނާކޮށެވެ. ފްރާންސްގެ އޮފިޝަލުންނެއް ނުވަތަ އެއާބަސްގެ އޮފިޝަލުންނެއްވެސް އޭނާއަށް ފައިސާ ދިން ކަމަކަށް ބުނެފައި ނުވާ ކަމަށް ވެސް ވަކީލު ބުންޏެވެ. އަދި އެ މީހާއަކީ އިތުބާރުކުރެވޭ ހެކިވެރިއެއް ނޫން ކަމަށް ވަކީލު ކޯޓުގައި ބުނެފައިވެ އެވެ. ނަމާލްގެ ވަކީލު އެދުނީ ހާއްސަ ހާލަތެއްގެ ގޮތުގައި ބަލައި، ނަމާލް ކަފާލާތުގެ ދަށުން ދޫކޮށްލުމަށެވެ.

ދެ ފަރާތުގެ ވާހަކަތަކަށް ރިއާޔަތްކުރުމަށްފަހު މެޖިސްޓްރޭޓް ވިދާޅުވީ، ތުހުމަތުކުރެވޭ ފަރާތުގެ މައްޗަށް ދައުވާ އުފުލާފައިވަނީ އެންޓި-ކޮރަޕްޝަން ގާނޫނުގެ 149 ވަނަ މާއްދާގެ ދަށުންނެވެ. އެހެންކަމުން، ކަފާލާތުގެ ދަށުން ދޫކޮށްލެވޭނީ ހާއްސަ ހާލަތްތަކެއް ހުށަހެޅުމުންނެވެ.

ހާއްސަ ހާލަތެއްގެ ގޮތުގައި ދިފާއީ ވަކީލު ފާހަގަކުރީ ހެކިބަސް ދިން މީހާގެ ވާހަކައިގެ އިތުބާރު ހުރި މިންވަރެވެ. ނަމަވެސް، ހެކިބަހުގެ އިތުބާރު ހުރި މިންވަރަކީ ހަމައެކަނި ހެކީގެ ހުލާސާއަކަށް ބަލައިގެން ކޯޓަށް ނިންމޭނެ ކަމެއް ނޫން ކަމަށާއި ހެކިބަހުގެ އިތުބާރު ހުރި މިންވަރާ މެދު ގޮތެއް ނިންމޭނީ ޝަރީއަތް ފެށުމުންން ކަމަށް މެޖިސްޓްރޭޓް ވިދާޅުވި އެވެ.

އެ މަރުހަލާގައި، ތުހުމަތުކުރެވޭ ފަރާތުން ހެކިބަސް ދިނުމުންނާއި ހެކިންނާ ސުވާލުކޮށް ކްރޮސް-އެގްޒަމިން ކުރުމުން، އެ ހެކިބަހަކީ އިތުބާރު ހުރި އެއްޗެއްތޯ ނުވަތަ ނޫންތޯ ކަނޑައެޅޭނެ ކަމަށް މެޖިސްޓްރޭޓް ވިދާޅުވި އެވެ.

އެހެންކަމުން، ހެކިބަސް ދޭ މީހާގެ އިތުބާރު ހުރި މިންވަރަކީ ހާއްސަ ހާލަތެއް ކަމަށް ނުބެލެވޭނެ ކަމަށާއި، އަދި އެހެން އެއްވެސް ހާއްސަ ހާލަތެއް ހުށަހަޅާފައި ނުވާތީ، ކަފާލާތުގެ ދަށުން ދޫކޮށްލާނެ އެއްވެސް އަސާސެއް ނެތް ކަމަށް މެޖިސްޓްރޭޓް ވަނީ ކަނޑައަޅުއްވާފަ އެވެ.