ވީއޭއެމް ވިމެންސް ކަޕް: ފައިނަލްގައި އެމްޓީސީސީ އާއި ވެމްކޯ

މިހާރު ކުރިއަށްދާ ވޮލީބޯޅަ އެސޯސިއޭޝަން އޮފް މޯލްޑިވްސް (ވީއޭއެމް) ކަޕްގެ ފައިނަލްގެ ޖާގަ ކުލަބު އެމްޓީސީސީ އާއި ކުލަބު ވެމްކޯ އިން ހޯދައިފި އެވެ. 

އާދީއްތަ ދުވަހުގެ ހަވީރު ޒުވާނުންގެ މަރުކަޒުގެ އެތެރޭ ކޯޓުގައި ކުޅުނު ސެމީ ފައިނަލްގެ ފުރަތަމަ މެޗުގައި އެމްޓީސީސީ އިން ވަނީ ހުރާ ކޮމިއުނިޓީ ކުލަބުގެ މައްޗަށް ތިން ސެޓު ދެ ސެޓުން ކުރި ހޯދައިފަ އެވެ.

ފޯރިގަދަ މެޗުގެ ފުރަތަމަ ސެޓު ހުރާ އިން ކާމިޔާބު ކުރީ 25-23 އިންނެވެ. ނަމަވެސް އެމްޓީސީސީ އިން ވަނީ 15-25 އިން ދެ ވަނަ ސެޓު ކާމިޔާބުކޮށްފަ އެވެ. ތިން ވަނަ ސެޓުގައި ހުރާ އިން 25-20 އިން ކުރި ހޯދިއިރު، ހަތަރު ވަނަ ސެޓުގައި އެމްޓީސީސީ އިން ކުރި ހޯދީ 15-25 އިންނެވެ. ނަތީޖާ ނެރުމަށް ކުޅުނު ފަސް ވަނަ ސެޓުގައި ވެސް ވާާދަވެރި ކުޅުމެއް ފެނުނުއިރު، އެމްޓީސީސީ އިން މި ސެޓު ކާމިޔާބު ކުރީ 12-15 އިންނެވެ. 

ސެމީ ފައިނަލްގެ ދެ ވަނަ މެޗުގައި އާދީއްތަ ދުވަހުގެރޭ ވެމްކޯ އިން ވަނީ ސީދާ ތިން ސެޓުން ޕޮލިސް ކުލަބުގެ މައްޗަށް ކުރި ހޯދައިފަ އެވެ. އެ މެޗުގެ ސެޓުތައް ވެމްކޯ އިން ކާމިޔާބުކޮށްފައި ވަނީ، 25-21، 25-19 އަދި 25-12 އިންނެވެ. 

ފައިނަލްގައި އެމްޓީސީސީ އާއި ވެމްކޯ ބައްދަލު ކުރާ މެޗު އޮތީ ހޯމަ ދުވަހުގެރޭ އެވެ. ވެމްކޯ އަކީ މުބާރާތުގެ އެންމެ ފަހުގެ ޗެމްޕިއަނުންނަށް ވިއިރު، އެ ޓީމުން ވަނީ ޖުމުލަ ފަސް ފަހަރު މުބާރާތް ކާމިޔާބުކޮށްފަ އެވެ. ފައިނަލްގެ ކުރިން މުބާރާތުގެ ގުރޫޕު ސްޓޭޖުގައި ވެސް މި ދެ ޓީމު ބައްދަލުކުރި އެވެ. އެ މެޗު ކާމިޔާބު ކުރީ ވެމްކޯ އިންނެވެ.