މިހާރު ކުރިއަށްދާ، ވޮލީ ބޯޅަ އެސޯސިއޭޝަން އޮފް މޯލްޑިވްސް (ވީއޭއެމް) ކަޕްގައި ހޮނިހިރު ދުވަހު ކުލަބު އެޗްޑީސީ، ޕޮލިސް ކުލަބު އަދި ހުރާ ކޮމިއުނިޓީ އިން ކުޅުނު މެޗުތަކުން ތިން ޓީމު ވެސް މޮޅުވެއްޖެ އެވެ.

ޒުވާނުންގެ މަރުކަޒުގެ އެތެރޭ ކޯޓުގައި ކުޅުނު ފުރަތަމަ މެޗުގައި ބައްދަލު ކޮށްފައި ވަނީ އެޗްޑީސީ އާއި ސްޕޯޓްސް ކުލަބު ސިޓީ އެވެ. މި މެޗު އެޗްޑީސީ އިން ކާމިޔާބު ކުރީ ސީދާ ތިން ސެޓުންނެވެ. މެޗުގެ ސެޓުތައް އެޗްޑީސީ އިން ކާމިޔާބު ކުރީ 25-17، 25-22 އަދި 25-18 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ އެޗްޑީސީގެ އިސްމާއީލް ސާޖިދު (ކުޑަކާއްޓޭ) އެވެ.

ދެ ވަނަ މެޗުގައި ބައްދަލު ކޮށްފައި ވަނީ ޕޮލިސް ކުލަބާއި ސަދާން ސްޕޯޓްސް ކުލަބެވެ. މި މެޗު ޕޮލިސް ކުލަބުން ކާމިޔާބު ކުރީ ސީދާ ތިން ސެޓުންނެވެ. އެ ޓީމުން މެޗުގެ ސެޓުތައް ކާމިޔާބު ކުރީ 25-22، 25-18 އަދި 25-20 އިންނެވެ. މި މެޗުގެ މޮޅު ކުޅުންތެރިޔަަކަށް ހޮވުނީ ޕޮލިސް ކުލަބުގެ ޗިރާގް އެވެ.

ތިން ވަނަ މެޗުގައި ހޮނިހިރު ދުވަހުގެ ރޭ ބައްދަލު ކޮށްފައި ވަނީ ހުރާ ކޮމިއުނިޓީ ކުލަބާއި ބްލޫސް ފޯ ވޮލީބޯލް އެވެ. ހުރާ އިން މި މެޗު ކާމިޔާބު ކުރީ ސީދާ ތިން ސެޓުންނެވެ. މެޗުގެ ސެޓުތައް ހުރާ އިން ގެންދިޔައީ 25-16، 25-18 އަދި 25-19 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ ހުރާގެ މިކަލް ވޮޖިކް އެވެ.