ސިފައިންގެ ކުލަބު، އެޗްޑީސީ އަދި ހުރާ މޮޅުވެއްޖެ

ވޮލީ ބޯޅަ އެސޯސިއޭޝަން އޮފް މޯލްޑިވްސް (ވީއޭއެމް) ކަޕްގެ ފިރިހެން ޑިވިޝަންގައި ދިވެހި ސިފައިންގެ ކުލަބާއި، ކުލަބު އެޗްޑީސީ އަދި ހުރާ ކޮމިއުނިޓީ ކުލަބުން ކުޅުނު ފުރަތަމަ މެޗުން މޮޅުވެއްޖެ އެވެ.

ބުދަ ދުވަހުގެ ހަވީރު ކުޅުނު ފުރަތަމަ މެޗުގައި ބައްދަލު ކޮށްފައި ވަނީ ސިފައިންގެ ކުލަބާއި، ދަނޑިމަގު ސްޕޯޓްސް އެންޑް ރެކްރިއޭޝަން ކުލަބާ އެވެ. އެ މެޗު ދިވެހި ސިފައިންގެ ކުލަބުން ކާމިޔާބު ކޮށްފައި ވަނީ ސީދާ ތިން ސެޓުންނެވެ. މެޗުގެ ސެޓުތައް ސިފައިންގެ ކުލަބުން ކާމިޔާބު ކުރީ 25-21، 25-23 އަދި 25-21 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ ސިފައިންގެ ކުލަބުގެ ބިދޭސީ ކުޅުންތެރިޔާ ލުއިޒް ފެލިޕޭ ފެރެއިރާ ޕެރޯޓޯ އެވެ.

ދެ ވަނަ މެޗުގައި ބައްދަލު ކޮށްފައި ވަނީ އެޗްޑީސީ އާއި ބްލޫ ފޯ ވޮލީބޯލް އެވެ. މި މެޗު އެޗްޑީސީ އިން ކާމިޔާބު ކުރީ ސީދާ ތިން ސެޓުންނެވެ. މެޗުގެ ސެޓުތައް އެޗްޑީސީ އިން ކާމިޔާބު ކުރީ 28-26، 25-15 އަދި 25-20 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ އެޗްޑީސީގެ ޝަމާއީލް ޙުސެއިން އެވެ.

ތިން ވަނަ މެޗުގައި ބުދަ ދުވަހުގެ ރޭ ބައްދަލު ކޮށްފައި ވަނީ ހުރާ ކޮމިއުނިޓީ ކުލަބު އަދި ސްޕޯޓްސް ކުލަބު ސިޓީ އެވެ. މި މެޗު ހުރާ އިން ކާމިޔާބު ކުރީ ސީދާ ތިން ސެޓުންނެވެ. އެ ޓީމުން މެޗުގެ ސެޓުތައް ކާމިޔާބު ކުރީ 25-11، 25-17 އަދި 25-21 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ ހުރާ ޓީމުގެ ސެޓަރު އިޝާން މުޙައްމަދު އެވެ.