ވޮލީ ބޯޅަ އެސޯސިއޭޝަން އޮފް މޯލްޑިވްސް (ވީއޭއެމް) ކަޕްގައި ޕޮލިސް ކުލަބާއި، ދަޑިމަގު ސްޕޯޓްސް އެންޑް ރެކްރިއޭޝަން ކުލަބު އަދި ކުލަބު އެޗްޑީސީ އިން ކުޅުނު މެޗުތަކުން މޮޅުވެއްޖެ އެވެ.

އާދީއްތަ ދުވަހުގެ ފުރަތަމަ މެޗުގައި ބައްދަލު ކުރީ ދިވެހި ސިފައިންގެ ކުލަބާއި ޕޮލިސް ކުލަބެވެ. މި މެޗު ޕޮލިސް ކުލަބުން ކާމިޔާބު ކުރީ ތިން ސެޓު ދެ ސެޓުންނެވެ. މެޗުގެ ފުރަތަމަ ސެޓު ޕޮލިސް ކުލަބުން ކާމިޔާބު ކުރީ 25-19 އިންނެވެ. ނަމަވެސް، ސިފައިންގެ ކުލަބުން ވަނީ 19-25 އިން ދެ ވަނަ ސެޓު ކާމިޔާބު ކޮށްފަ އެވެ.

ތިން ވަނަ ސެޓުގައި ސިފައިންގެ ކުލަބުން ވަނީ 21-25 އިން ޕޮލިސްގެ މައްޗަށް ކުރި ހޯދައިފަ އެވެ. ނަމަވެސް ހަތަރު ވަނަ ސެޓުގައި ޕޮލިހުން ވަނީ 25-17 އިން ކުރި ހޯދައިފަ އެވެ. އަދި ނަތީޖާ ނެރުމަށް ކުޅުނު ފަސް ވަނަ ސެޓު ޕޮލިހުން ކާމިޔާބު ކުރީ 15-08 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ ޕޮލިސް ކުލަބުގެ ޗިރަގް އެވެ.

ދެ ވަނަ މެޗުގައި ބައްދަލު ކޮށްފައި ވަނީ ދަޑިމަގު އަދި ސަދާން ސްޕޯޓްސް ކުލަބެވެ. މި މެޗު ދަޑިމަގުން ކާމިޔާބު ކރުީ ސީދާ ތިން ސެޓުންނެވެ. މެޗުގެ ސެޓުތައް އެ ޓީމުން ކާމިޔާބު ކުރީ 25-20، 25-12 އަދި 25-19 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ ދަޑިމަގުގެ ބަޓުރް ބަޓްސުރީ އެވެ.

ތިން ވަނަ މެޗުގައި އާދީއްތަ ދުވަހުގެ ރޭ ބައްދަލު ކުރީ އެޗްޑީސީ އާއި ހުރާ ކޮމިއުނިޓީ ކުލަބެވެ. މި މެޗު އެޗްޑީސި އިން ކާމިޔާބު ކުރީ ތިން ސެޓު އެއް ސެޓުންނެވެ. މެޗުގެ ފުރަތަމަ ސެޓު ހުރާ އިން ކާމިޔާބު ކުރީ 25-22 އިންނެވެ. ނަމަވެސް އެޗްޑީސީ އިން ވަނީ ދެން ކުޅުނު ތިން ސެޓު ވެސް ކާމިޔާބު ކޮށްފަ އެވެ. އެއީ 23-25، 26-28 އަދި 22-25 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ އެޗްޑީސީގެ ޝަމާއީލް ޙުސެއިން އެވެ.