ރާއްޖޭގެ ކުޅުންތެރިންނަށް ނިސްބަތްކޮށް ބޭއަދަބީ ބަހުރުވަ ބޭނުންކުރި ލަންކާގެ އެސިސްޓެންޓް ކޯޗު މަގާމުން ވަކިކޮށްފި

އޭއެފްސީ 20 އަހަރުން ދަށުގެ އޭޝިއަން ކަޕް ކޮލިފައިންގެ ޑިވެލޮޕްމަންޓް ފޭސްގައި ދިވެހިރާއްޖެ އާއި ސްރީ ލަންކާ ބައްދަލުކުރި މެޗަށް ފަހު، ރާއްޖޭގެ ކުޅުންތެރިންނާއި ޓީމަށް ނިސްބަތްކޮށް ބޭއަދަބީ ބަހުރުވައިން ވާހަކަ ދެއްކި ލަންކާގެ އެސިސްޓެންޓް ކޯޗަށް ފިޔަވަޅު އަޅައިފި އެވެ.

ރާއްޖެ އިން 4-0 އިން ލަންކާ ބަލި ކުރި މެޗަށް ފަހު، ލަންކާގެ އެސިސްޓެންޓް ކޯޗު މުހައްމަދު އިމްރާން ވަނީ ވަރަށް ބޭއަދަބީ ބަހުރުވައިން ވާހަކަ ދައްކައި، އިޝާރާތްކޮށްފަ އެވެ. ރާއްޖޭގެ ޓީމާއި ކުޅުންތެރިންނަށް އިޝާރާތްކޮށް އޭނާ އެހެން މުއާމަލާތް ކުރުމުން، އެތައް ބައެއްގެ ފާޑު ކިޔުން އޭނާ އަށް އަމާޒުވި އެވެ. 

އެކަމާ ގުޅިގެން ސްރީ ލަންކާގެ ފުޓުބޯޅަ ފެޑަރޭޝަން (އެފްއެފްއެސްއެލް) އިން ވަނީ އިމްރާން މަގާމުން ވަކިކޮށްފަ އެވެ. އެގޮތުން އޭނާގެ ފަރާތުން ފެނިފައި ވަނީ އަޚުލާޤީ ގޮތުން ވެސް ދަށު ދަރަޖައިގެ އަމަލުތަކެއް ކަމަށާއި އެއީ ބަލައި ގަނެވޭނެ ކަމެއް ނޫން ކަމަށް ލަންކާ އިން ބުނެފައިވެ އެވެ. އިމްރާާންގެ އަމަލުތަކާ ގުޅިގެން ލަންކާގެ ގިނަ ބަޔަކު އަންނަނީ އެކަމާ ހިތާމަކޮށް، ދިވެހި ޓީމާއި ދިވެހިންގެ ކިބައިންް މައާފަށް އެދެމުންނެވެ.

ލަންކާ ބަލިކޮށް ރާއްޖެ އިން ވަނީ އޭއެފްސީ 20 އަހަރުން ދަށުގެ މުބާރާތުގެ ކޮލިފައިން ބުރުން ޖާގަ ހޯދާފަ އެވެ. ރާއްޖެ ކުޅުނު ފުރަތަމަ މެޗުގައި ބްރޫނާއީ ބަލިކޮށްފައިވާއިރު، ދެ ވަނަ މެޗުގައި ވަނީ ލަަންކާ ބަލިކޮށްފަ އެވެ. ތިން ވަނަ މެޗުގައި ރާއްޖެ މިޔަންމާއާ ދެކޮޅަށް ނުކުންނައިރު، އެއް ވަނަ މަގާމު ކަށަވަރު ވާނީ އެ މެޗުން މޮޅުވާ ޓީމަކަށެވެ. 

ލަންކާ އިން ކުޅުނު ދެ މެޗުން ވެސް ވަނީ ބަލިވެފަ އެވެ. ފުރަތަމަ މެޗުގައި މިޔަންމާ އަތުން ބަލިވީއިރު، ދެ ވަނަ މެޗުގައި ރާއްޖެ އަތުން ބަލިވީ އެވެ. ދެން ލަންކާ އަށް އޮތީ ބްރޫނާއީއާ ދެކޮޅަށް ކުޅޭ މެޗެވެ.