އޭޝިއަން ކަޕް ކޮލިފައިން: ފުރަތަމަ މެޗުގައި ރާއްޖެ އިން ބްރޫނާއީ ބަލިކޮށްފި

މިހާރު ކުރިއަށްދާ 20 އަހަރުން ދަށުގެ އޭއެފްސީ ކޮލިފައިން މުބާރާތުގައި ރާއްޖެ އިން ކުޅުނު ފުރަތަމަ މެޗުގައި ބްރޫނާއީ ދާރުއްސަލާމް ބަލިކޮށްފި އެވެ.

ހޯމަ ދުވަހު ކުޅުނު މެޗުގައި ރާއްޖެ އިން ވަނީ 2-0 އިން ބްރުނާއީ ބަލިކޮށްފައި އެވެ. މެޗުގައި ރާއްޖެ އިން ދެ ލަނޑު ވެސް ޖެހީ ދެ ވަނަ ހާފުގަ އެވެ.

މެޗު ފަށައިގެން 18 ވަނަ މިނެޓުގައި ރާއްޖެ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު ރާއްޖެ އަށް ޖަހައިދިނީ އީތަން އިބްރާހީމް ޒަކީ އެވެ. އޭގެ ފަހުން ވެސް ރާއްޖެ އިން ވަނީ މެޗުގައި ރަނގަޅަށް ކުޅެ، އިތުރު ލަނޑު ޖަހާނެ ފުރުސަތު ތަކެއް ހޯދައިފަ އެވެ.

މެޗުގެ ފުރަތަމަ ހާފުގެ 31 ވަނަ މިނެޓުގައި ރާއްޖެ އިން ވަނީ ދެ ވަނަ ލަނޑެއް ޖަހައި ލީޑު ފުޅާކޮށްފަ އެވެ. އެއީ މުހައްމަދު އިލާމް އިމްރާން ޖެހި ލަނޑުންނެވެ. މެޗުގައި އިލާން ވަނީ ރަނގަޅު ކުޅުމެއް ވެސް ދައްކައިފަ އެވެ. 

ކޮލިފައިން ގުރޫޕުގައި ރާއްޖޭގެ ދެ ވަނަ މެޗުގައި ބުރާސްފަތި ދުވަހު ނުކުންނާނީ ސްރީ ލަންކާއާ ދެކޮޅަށެވެ. އަދި ފަހު މެޗުގައި މިޔަންމާއާ ދެކޮޅަށް ކުޅޭނީ އާދީއްތަ ދުވަހު އެވެ. 

އޭއެފްސީ ކޮލިފައިން މިފަހަރު ކުރިއަށް ދަނީ ކޮލިފިކޭޝަން ފޭސް އަދި ޑިވެލޮޕްމަންޓް ފޭސް އަކަށް ބަހާލައިގެންނެވެ. ކޮލިފިކޭޝަން ފޭސްގައި އޮތީ މަތީ ރޭންކުގައި ހިމެނޭ ޓީމުތަކެވެ. ދަށް ރޭންކިންގެ ޓީމުތައް ޑިވެލޮޕްމަންޓް ފޭސްގައި ކުޅޭއިރު، ރާއްޖެ އޮތީ މި ފޭސްގަ އެވެ.