އޭޝިއަން ކަޕް ކޮލިފިކޭޝަން މެޗުގެ ކުރިން ކުޅޭ އެކުވެރި ކަމުގެ މެޗަށް ޤައުމީ ޓީމު ސިންގަޕޫރަށް
ޤައުމީ ފުޓުބޯޅަ ޓީމުން އޭޝިއަން ކޮލިފިކޭޝަންގައި ޓިމޯ ލެސްޓޭއާ ދެކޮޅަށް ނިކުންނާނީ ޖޫން މަހުގެ 10 ވާ ބުރާސްފަތި ދުވަހު އެވެ.
ސިންގަޕޫރާ ދެކޮޅަށް ކުޅޭ ބައިނަލްއަޤުވާމީ ރަޙުމަތްތެރި ކަމުގެ މެޗަށް ފުރުމުގެ ކުރިން ޤައުމީ ޓީމުގެ ކުޅުންތެރިން
އޭޝިއަން ކަޕް ކޮލިފިކޭޝަންގައި ވާދަ ކުރުމަށާއި، އެ މެޗުގެ ކުރިން ކުޅޭ ބައިނަލްއަޤުވާމީ ރަޙުމަތްތެރި ކަމުގެ މެޗަށް ރާއްޖޭގެ ސީނިއާ ޤައުމީ ފުޓުބޯޅަ ޓީމު ފުރައިފި އެވެ.
ޤައުމީ ފުޓުބޯޅަ ޓީމުން އޭޝިއަން ކޮލިފިކޭޝަންގައި ޓިމޯ ލެސްޓޭއާ ދެކޮޅަށް ނިކުންނާނީ ޖޫން މަހުގެ 10 ވާ ބުރާސްފަތި ދުވަހު އެވެ. އޭގެ ކުރިން ބައިނަލްއަޤުވާމީ ރަޙުމަތްތެރި ކަމުގައި ސިންގަޕޫރާ ދެކޮޅަށް ކުޅޭނެ އެވެ. އަންގާރަ ދުވަހު ޤައުމީ ޓީމު ވަނީ ސިންގަޕޫރަށް ގޮސްފަ އެވެ.
ސިންގަޕޫރާ ދެކޮޅަށް ކުޅުމަށް ފަހު، އޭޝިއަން ކަޕް ކޮލިފިކޭޝަންގައި ޓިމޯ ލެސްޓޭއާ ދެކޮޅަށް ކުޅުމަށް ޤައުމީ ޓީމު އޮސްޓްރޭލިއާ އަށް ފުރާނެ އެވެ. އެ މެޗު އޮސްޓްރޭލިއާގައި ކުޅުމަށް ނިންމާފައި ވަނީ ދުނިޔޭގެ ފުޓުބޯޅައިގެ މައި އިދާރާ (ފީފާ)ގެ މިންގަނޑުތަކަށް ފެތޭ ދަނޑެއް އެ ޤައުމުގައި ނެތުމުންނެވެ.
އޭޝިއަން ކަޕް ކޮލިފިކޭޝަންގައި ޓިމޯ ލެސްޓޭއާ ދެކޮޅަށް ކުޅުމުގެ ކުރިން ޤައުމީ ޓީމު ވަނީ ރާއްޖޭގައި ވެސް ފަރިތަކުރުންތައް ކުރިއަށް ގެންގޮސްފަ އެވެ. ސިންގަޕޫރު މެޗު އަދި ޓިމޯ ލެސްޓޭ މެޗުގައި ވެސް ޤައުމީ ޓީމަށް އިރުޝާދު ދޭނީ ތަޖުރިބާކާރު ކޯޗު އަލީ ސުޒޭން އެވެ.
ސިންގަޕޫރަށް ފުރުމުގެ ކުރިން މީޑިއާތަކާ ވާހަކަ ދައްކަމުން ސުޒޭން ބުނެފައި ވަނީ ޓީމުގެ ފަރިތަކުރުމާ މެދު އޭނާ ހިތްހަމަ ޖެހޭ ކަމަށެވެ. އެންމެ ފަހުން އޮތް އެފްއޭއެމް ލީގު ކަޕްގައި ޓީމުގައި ހިމެނޭ ގިނަ ކުޅުންތެރިން ކުޅެފައިވާކަން ފާހަގަކޮށް ސުޒޭން ބުނީ، އެ މުބާރާތަށް ފަހު ޤައުމީ ޓީމުގެ ފަރިތަކުރުންތައް ކުރިއަށް ގެންދިޔަ އިރު ކުޅުންތެރިންގެ ފަރާތުން ވެސް ރަނގަޅު ރޫޙެއް ފެނިފައިވާ ކަމަށެވެ.
އޭޝިއަން ކަޕް ކޮލިފިކޭޝަންގައި ރާއްޖޭގެ ފުރަތަމަ މެޗުގައި ކުޅުނޫ ފިލިޕީންސްއާ ދެކޮޅަށެވެ. އެ މެޗުން ރާއްޖެ ބަލިވެފައިވާއިރު، ދެ ވަނަ މެޗުގައި ޓިމޯ ލެސްޓޭއާ ދެކޮޅަށް ކުޅެނީ ވެސް ރަށުން ބޭރުގަ އެވެ.
އޭޝިއަން ކަޕް ކޮލިފިކޭޝަންގެ ތިން ވަނަ މެޗުގައި ތަޖަކިސްތާނާ ދެކޮޅަށް ރާއްޖެ ނިކުންނާނީ އޮކްޓޫބަރު މަހުގެ ނުވަ ވަނަ ދުވަހު އެވެ. އޮކްޓޫބަރު މަހުގެ 14 ވަނަ ދުވަހު ދެ ވަނަ ލެގުގައި ތަޖަކިސްތާނާ ދެކޮޅަށް ކުޅޭނެ އެވެ.
އޭގެ ފަހުން ނޮވެމްބަރު މަހުގެ 18 ވަނަ ދުވަހު ދެ ވަނަ ލެގުގައި ފިލިޕީންސްއާ ދެކޮޅަށް ކުޅުމަށްފަހު، ފަހު މެޗުގައި ޓިމޯ ލެސްޓޭއާ ދެކޮޅަށް ކުޅޭ ދެ ވަނަ ލެގު އޮތީ އަންނަ އަހަރުގެ މާޗު މަހުގެ 31 ވަނަ ދުވަހު އެވެ.
