ފަހު ވަގުތު ލަންކާ ބަލިކޮށް، ބޫޓާން ސެމީ ފައިނަލަށް

ރާއްޖޭގައި މިހާރު ކުރިއަށްދާ 20 އަހަރުން ދަށުގެ ސާފް ޗެމްޕިއަންޝިޕްގެ ގުރޫޕް ސްޓޭޖުގެ ފަހު މެޗުގައި ސްރީ ލަންކާއާ ދެކޮޅަށް ކުޅުނު މެޗުން މޮޅުވެ، ބޫޓާން އިން މުބާރާތުގެ ސެމީ ފައިނަލްގެ ޖާގަ ހޯދައިފި އެވެ.

ހުކުރު ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު ބޫޓާން އިން ކާމިޔާބު ކުރީ 1-0 އިންނެވެ. ދެ ޓީމުގެ ފަރާތުން ވެސް ވާދަވެރި ކުޅުމެއް ފެނުނު މެޗުގެ ހަމައެކަނި ލަނޑު ބޫޓާން އިން ޖެހީ މެޗުގެ ފަހު ވަގުތުގަ އެވެ. މި މެޗަށް ނިކުތްއިރު، ސެމީ ފައިނަލްގެ ފުރުސަތު ބޮޑަށް އޮތީ ލަންކާ އަށެވެ. މެޗު އެއްވަރު ކޮށްގެން ވެސް ލަންކާ އަށް ސެމީ ފައިނަލްގެ ފުރުސަތު އޮތްއިރު، ބޫޓާން އަށް އޮތީ ލަންކާ ބަލި ކުރަން މަޖުބޫރުވެފަ އެވެ.

މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ބޫޓާންގެ ލަނޑު ޖެހީ ދެންޑުޕް ގެޔެސްޓެން އެވެ. އެއީ އެ ޓީމުގެ ޓަންޑިން ޝެވާން ހުރަސްކޮށްދިން ބޯޅަ، ބޮލުން ޖަހައި ގޯލަށް ވައްދާލައިގެން އޭނާ ޖެހި ލަނޑެކެވެ. އެ ލަނޑާ އެކު، ބޫޓާން ވަނީ މެޗުން މޮޅުވެ ސެމީ ފައިނަލްގެ ޖާގަ ހޯދައިފަ އެވެ.

ގުރޫޕް އޭގެ އެއް ވަަނައިގައި ސެމީ ފައިނަލްގެ ޖާގަ ހޯދީ ނޭޕާލް އެވެ. އެ ޓީމުން ވަނީ ހުކުރު ދުވަހު ހަވީރު ކުޅުނު މެޗުގައި ދިވެހި ރާއްޖެއާ އެއްވަރު ކޮށްފަ އެވެ. އެއް ވަނައިގައި ނޭޕާލް އިން ސެމީ ފައިނަލްގެ ޖާގަ ހޯދީ ހަތް ޕޮއިންޓާ އެކު އެވެ. ދެ ވަނައިގައި ބޫޓާން އިން ސެމީ ފައިނަލްގެ ޖާގަ ހޯދީ ހަތަރު ޕޮއިންޓާ އެކު އެވެ. މި ގުރޫޕުގެ ތިން ވަނައިގައި ލަންކާ އަށް ތިން ޕޮއިންޓު ލިބޭއިރު، ހަތަރު ވަނަ އަށް ދިޔަ ރާއްޖެ އަށް ލިބެނީ ދެ ޕޮއިންޓެވެ.