އޭޝިއަން ކަޕް ކޮލިފިކޭޝަންގައި ރާއްޖޭގެ ޤައުމީ ޓީމުން ތަޖަކިސްތާނާ ދެކޮޅަށް ކުޅޭ މެޗަށް ފޯރި ގެނައުމަށް، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ޚާއްސަ ހަރަކާތެއް ކުރިއަށް ގެންގޮސްފި އެވެ.

އެފްއޭއެމް އިން އިންތިޒާމު ކޮށްގެން ކުރިއަށް ގެންދިޔަ މި ހަރަކާތް އޮތީ ހޮނިހިރު ދުވަހުގެ ހަވީރު އާޓިފިޝަލް ބީޗުގަ އެވެ. އެ ހރަކާތުގައި ގިނަ ކަންތައްތަކެއް ކުރިއަށް ގެންދިޔައިރު، ޤައުމީ ޓީމުގެ ކުޅުންތެރިން ވެސް ވަނީ އެ ހަރަކާތުގައި ބައިވެރިވެފަ އެވެ.

ބޮޑުބެރާއި، ކުޑަ ކުދިންނާ ގުޅޭ އެކި އެކި ކަންތައްތަކާ އެކު ކުރިއަށް ގެންދިޔަ ހަރަކާތުގެ މައިގަނޑު މަޤުސަދަކީ ޤައުމީ ޓީމަށް ސަޕޯޓު ހޯދުމާއި، ފުޓުބޯޅައިގެ ފޯރި ގެނައުން އަދި ޚާއްސަކޮށް ތަޖަކިސްތާނާ ދެކޮޅަށް ރާއްޖެ އިން ކުޅޭ މެޗު ޕްރޮމޯޓު ކުރުމެވެ.

ތަަޖަކިސްތާނާ ދެކޮޅަށް ކުޅުނު ފުރަތަމަ މެޗުގައި މިދިޔަ ބުރާސްފަތި ދުވަހު ޤައުމީ ޓީމު ވަނީ 2-0 އިން ބަލިވެފަ އެވެ. އެ މެޗު އޮތީ ތަޖަކިސްތާންގަ އެވެ. ދެ ވަނަ މެެޗުގައި ތަޖަކިސްތާނާ ދެކޮޅަށް ޤައުމީ ޓީމު ނިކުންނާނީ އަންގާރަ ދުވަހު އެވެ. އެ މެޗު އޮތީ ރާއްޖޭގެ ގަލޮޅު ރަސްމީ ދަނޑުގަ އެވެ. އެފްއޭއެމް އިން އަންނަނީ އެ މެޗުގައި ޤައުމީ ޓީމަށް ސަޕޯޓު ކުރުމަށް ވަރަށް ބޮޑަށް ތައްޔާރު ވަމުންނެވެ.

ތަޖަކިސްތާނާ ދެކޮޅަށް ރާއްޖެ އިން ކުޅޭ މެޗުގެ ޓިކެޓު ވެސް މިހާރު ވަނީ ވިއްކަން ފަށައިފަ އެވެ. އެގޮތުން ޓިކެޓުގެ އަގު ތަކަަށް ބަލާއިރު، ސިޑިބަރިން ޓިކެޓު ވިއްކަނީ 50 ރުފިޔާ އަށެވެ. އަދި ގޮނޑި ބަރިން ޓިކެޓި ވިއްކަނީ 100 ރުފިޔާ އަށެވެ.

އޭޝިއަން ކަޕް ކޮލިފިކޭޭޝަންގައި އަމިއްލަ ދަނޑުގައި ތަޖަކިސްތާނާ ދެކޮޅަށް ރާއްޖެ ނިކުންނައިރު، އެ މެޗުގައި ޤައުމީ ޓީމަށް ރާއްޖޭގެ ސަޕޯޓަރުންފެ ސަޕޯޓު ވަރަށް މުހިންމު ވާނެ އެވެ. ޤައުމީ ޓީމު ކުޅޭ މެޗު ތަކުގައި ސަޕޯޓަރުންގެ ސަޕޯޓު ބޭނުންވާ ކަމަށް މީގެ ކުރިން ޤައުމީ ކޯޗު މުޙައްމަދު ޝިޔާޒު (މޯހަން) ވެސް ވަނީ ފާހަގަ ކޮށްފަ އެވެ.

އޭޝިއަން ކަޕް ކޮލިފިކޭޝަންގައި ރާއްޖޭގެ ފުރަތަމަ މެޗުގައި ފިލިޕީންސް އަތުން ބަލިވެފައިވާއިރު، ދެ ވަނަ މެޗުގައި ވަނީ ޓިމޯ ލެސްޓޭ އަތުން ވެސް ބަލިވެފަ އެވެ. ތިން ވަނަ މެޗުގައި ވަނީ ތަޖަކިސްތާން އަތުން އެ ޤައުމުގައި ބަލިވެފަ އެވެ.