ރާއްޖެ އާއި ބޫޓާންގެ ކުރިމަތިލުން ހަމަހަމަ ވެގެން ނިމިއްޖެ
މިއީ މުބާރާތުގައި ރާއްޖެ އިން ކުޅުނު ދެ ވަނަ މެޗު. ފުރަތަމަ މެޗުގައި ރާއްޖެ ވަނީ 3-2 އިން ސްރީ ލަންކާ އަތުން ބަލިވެފައި.
މުބާރާތުގައި ރާއްޖެ އާއި ބޫޓާން ބައްދަލު ކުރި މެޗުގެ ތެރެއިން. | ސާފް
ދިވެހި ރާއްޖޭގައި މިހާރު ކުރިއަށްދާ ސާފް ޗެމްޕިއަންޝިޕްގެ ގުރޫޕް ސްޓޭޖުގައި ދިވެހި ރާއްޖެ އިން ކުޅުނު ދެ ވަނަ މެޗުގައި ބޫޓާންއާ ވާދަކޮށް އެއްވަރު ވެއްޖެ އެވެ.
ބުދަ ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު ނިމުނީ، އެއްވެސް ޓީމަކަށް ލަނޑެއް ނުޖެހި އެވެ.
މެޗުގައި ދެ ޓީމުގެ ފަރާތުން ވެސް ވާދަވެރި ކުޅުމެއް ފެނުނުއިރު، ދެ ޓީމުން ވެސް ވަނީ ލަނޑު ޖަހަން މަސައްކަތް ކޮށްފަ އެވެ. އެގޮތުން ރާއްޖެ އަށް ލީޑު ނަގައިދޭން ކެޕްޓަން މުޙައްމަދު އިލާން އިމްރާން ވެސް ފުރުސަތު ލިބުނެވެ. އިލާންގެ އިތުރުން ރާއްޖޭގެ އީތަން އިބްރާހީމް ޒަކީ އާއި، އައިދު އަޙުމަދު ޖަވީޒް އަށް ވެސް ލަނޑު ޖަހަން ފުރުސަތު ލިބުނެވެ.
މިއީ މުބާރާތުގައި ރާއްޖެ އިން ކުޅުނު ދެ ވަނަ މެޗެވެ. ފުރަތަމަ މެޗުގައި ރާއްޖެ ވަނީ 3-2 އިން ސްރީ ލަންކާ އަތުން ބަލިވެފަ އެވެ. މިއާ އެކު، މުބާރާތުގެ ސެމީ ފައިނަލްގެ ފުރުސަތު ހޯދުމުގެ އަމިއްލަ
ބާރު ރާއްޖެ އަށް ވަނީ ގެއްލިފަ އެވެ. ހަތަރު ޓީމުގެ ތެރެއިން މިހާތަނަށް ސެމީ ފައިނަލްގެ ޖާގަ ޔަޤީންވީ ދެ މެޗުން ވެސް މޮޅުވެފައިވާ ނޭޕާލް އަށެވެ.
ސެމީ ފައިނަލްގެ އުންމީދު ހޯދުމަށް ރާއްޖެ އަށް ޖެހޭނީ ހުކުރު ދުވަހުގެ ހަވީރު ނޭޕާލްއާ ދެކޮޅަށް ކުޅޭ މެޗުން މޮޅުވުމަށެވެ. އެ މެޗުން މޮޅުވެ ދެން ރާއްޖެ އަށް ޖެހޭނީ ހުކުރު ދުވަހުގެ ރޭ ސްރީ ލަންކާ އާއި ބޫޓާން ބައްދަލު ކުރާ މެޗަށް މަޑު ކުރުމަށެވެ.
