އޭޝިއަން ކަޕް ކޮލިފިކޭޝަންގައި ތަޖަކިސްތާނާ ދެކޮޅަށް ކުޅޭ މެޗަށް ރާއްޖޭގެ ސީނިއާ ޤައުމީ ޓީމު ފުރައިފި އެވެ.

ހޯމަ ދުވަހު ޤައުމީ ޓީމު ފުރާފައިވާއިރު، އެ މެޗުގެ ކުރިން ޤައުމީ ޓީމުން ވަނީ ފަރިތަކުރުންތައް ވެސް ކުރިއަށް ގެންގޮސްފަ އވެެ.

އޭޝިއަން ކަޕް ކޮލިފިކޭޝަންގައި ތަޖަކިސްތާނާ ދެކޮޅަށް ކުޅޭ ފުރަތަމަ މެޗުގައި އެ ޤައުމާ ދެކޮޅަށް ރާއްޖެ އިން ކުޅޭނީ މި މަހުގެ ނުވަ ވަނަ ދުވަހު އެވެ. އޭގެ ފަހުން ދެ ވަނަ މެޗުގައި އަމިއްލަ ޤައުމުގައި އެ ޓީމާ ދެކޮޅަށް ކުޅޭނީ މި މަހުގެ 14 ވަނަ ދުވަހު އެވެ.

ޤައުމީ ޓީމުން ތަޖަކިސްތާނާ ދެކޮޅަށް ކުޅުމަށް ފުރާފައިވާއިރު، މިދިޔަ މަހު ސްރީ ލަންކާގައި ކުރިއަށް ދިޔަ ސައުތު އޭޝިއަން ސުޕަ ކަޕް ފުޓުބޯޅަ މުބާރާތް ކާމިޔާބު ކޮށްފަ އެވެ. އެ މުބާރާތުގެ ފުރަތަމަ މެޗުގައި ރާއްޖެ އިން ލަންކާ ބަލި ކޮށްފައިވާއިރު، ދެ ވަނަ މެޗުގައި ވަނީ އެއްވަރުވެފަ އެވެ.

ތަޖަކިސްތާން މެޗުގެ ކުރިން ޤައުމީ ޓީމުގެ ކޯޗު މުޙައްމަދު ޝިޔާޒް (މޯހަން) ބުނެފައި ވަނީ، އެންމެ ބޮޑު ހިތްހަމަ ޖެހުމަކީ ޓީމުގެ ކުޅުންތެރިންގެ ފިޓްނަސް ރަނގަޅުވުން ކަމަށެވެ. ޚާއްސަކޮށް އެންމެ ފަހުން ކުޅުނު ސައުތު އޭޝިއަން ސުޕަ ކަޕަށްވުރެ، މިހާރު ކުޅުންތެރިން ޙާލަތު ރަނގަޅު ވެފައިވާ ކަމަށް މޯހަން ބުންޏެވެ.

މީގެ އިތުރުން ރާއްޖޭގެ ފުޓުބޯޅަ ލީގު މިހާރު ފަށާފައިވާއިރު، އެކަމުގެ ސަބަބުން ކުޅުންތެރިންގެ ކުޅުން ރަނގަޅުވެފައިވާ ކަމަށް މޯހަން ބުންޏެވެ. މޯހަން ބުނީ ލީގު ފެށިފައިވުމުން، މީގެ ކުރިން ދިމާވި މައްސަލަ ނުވަތަ ޕްރެޝަރު ކުޑަ ވާނެ ކަމަށް އުންމީދު ކުރާ ކަމަށެވެ. އެކަން ފާހަގަ ކުރަމުން މޯހަން ބުނީ ގިނަ ދުވަސް ތަަކަކަށް ފަހު ލީގު ފެށިފައިވުމަކީ ފުޓުބޯޅަ އަށް ރަނގަޅެއް ކަމަށެވެ.

އޭޝިއަން ކަޕް ކޮލިފިކޭޝަންގައި ރާއްޖޭގެ ފުރަތަމަ މެޗުގައި ފިލިޕީންސް އަތުން ބަލިވެފައިވާއިރު، ދެ ވަނަ މެޗުގައި ވަނީ ޓިމޯ ލެސްޓޭ އަތުން ވެސް ބަލިވެފަ އެވެ. ތިން ވަނަ މެޗުގައި ތަޖަކިސްތާނާ ދެކޮޅަށް ކުޅުމަށް ފަހު، ހަތަރު ވަނަ މެޗުގައި ނޮވެމްބަރު މަހު ކުޅޭނީ އަމިއްލަ ޤައުމުގައި ފިލިޕީންސްއާ ދެކޮޅަށެވެ.