އޭއެފްސީ އޭޝިއަން ކަޕް ކޮލިފިކޭޝަންގައި ރާއްޖެ އިން ކުޅުނު ހަތަރު ވަނަ މެޗުގައި ޗައިނާ އަތުން ވެސް ތަފާތު ބޮޑު ނަތީޖާ އަކުން ބަލިވެއްޖެ އެވެ.

ރާއްޖެ އިން ވަނީ ކޮލިފިކޭޝަންގައި ކުޅުނު ފުރަތަމަ މެޗުގައި ބޫޓާނާ އެއްވަރުކޮށްފަ އެވެ. އެއީ ބޫޓާން އިން ދެ ލަނޑު ޖަހާފައި ވަނިކޮށް، ފަހަތުން އަރައި ދެ ލަނޑު ޖަހައިގެންނެވެ. ދެވަނަ މެޗުގައި ބަހްރެއިން އަތުން ބަލިވި ނަމަވެސް، އެ މެޗުގައި ރާއްޖެ އިން އުންމީދީ ކުޅުމެއް ދެއްކި އެވެ. ތިން ވަނަ މެޗުގައި ދެކުނު ކޮރެއާ އަތުން ރާއްޖެ ބަލިވީ 13 ލަނޑުގެ ތަފާތު ބޮޑު ނަތީޖާ އަކުންނެވެ.

އޭގެ ފަހުން ހަތަރު ވަނަ މެޗުގައި ހުކުރު ދުވަހު ރާއްޖެ އިން ނިކުތީ ޗައިނާއާ ދެކޮޅަށެވެ. އެ މެޗު ޗައިނާ އިން ކާމިޔާބު ކޮށްފައި ވަނީ 9-0 ގެ ތަފާތު ބޮޑު ނަތީޖާ އަކުންނެވެ. މެޗުގެ ފުރަތަމަ ހާފުގައި ޗައިނާ އިން ވަނީ ރާއްޖެ ކޮޅަށް ދެ ލަނޑު ޖަހައިފަ އެވެ. އޭގެ ފަހުން ދެވަނަ ހާފުގައި ޗައިނާ އިން ރާއްޖެ ކޮޅަށް ހަތް ލަނޑު ޖެހި އެވެ. ޗައިނާއާ ދެކޮޅަށް ރާއްޖެ އިން ކުޅުނު މެޗުގައި ވެސް ކެޕްޓަން މުޙައްމަދު އިލާން އިމްރާން އަދި ޔޫސުފް އަޔާން އާމިރު ނުކުޅެ އެވެ. އެ ދެ ކުޅުންތެރިން ވެސް ކުޅެފައި ނުވަނީ ބަހްރެއިންއާ ދެކޮޅަށް ކުޅުނު މެޗުގައި ލިބުނު އަނިޔާގެ ސަބަބުންނެވެ.

ކޮލިފިކޭޝަންގައި ރާއްޖެ ކުޅުނު ހަތަރު މެޗުގެ ތެރެއިން އެއް މެޗުން އެއްވަރުވެ، ތިން މެޗުން ބަލިވެފައިވާއިރު، ރާއްޖެ އަށް ލިބެނީ އެންމެ ޕޮއިންޓެކެވެ. މި ގުރޫޕުގެ އެއް ވަނައިގައި އޮތީ ބަހްރެއިން އަތުން ވެސް މޮޅުވި ކޮރެއާ އެވެ. ތިން މެޗުންް އެ ޓީމު މޮޅުވެފައިވާއިރު، އެއް ވަަނައިގައި އޮތީ ލަނޑުގެ ތަފާތުންނެވެ. ދެ ވަނައިގައި އޮތް ޗައިނާ ވެސް ތިން މެޗުން މޮޅުވެފައިވާއިރު، އެއް ވަނަ ކަނޑައެޅޭނީ ކޮރެއާ އަދި ޗައިނާ ކުޅޭ ފަހު މެޗުންނެވެ.