ފުރަތަމަ މެޗުގައި ލަންކާ އަތުން ރާއްޖެ އަށް ނާކާމިޔާބު

ރާއްޖޭގައި ފެށި 20 އަހަރުން ދަށުގެ ސާފް ޗެމްޕިއަންޝިޕްގައި ރާއްޖޭގެ ޒުވާން ޤައުމީ ޓީމުން ކުޅުނު ފުރަތަމަ މެޗުގައި ސްރީ ލަންކާ އަތުން ބަލިވެއްޖެ އެވެ.

ހޯމަ ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗުގައި ލަންކާ އިން ވަނީ 3-2 އިން ރާއްޖޭގެ މައްޗަށް ކުރި ހޯދައިފަ އެވެ. މެޗުގެ ފުރަތަމަ ހާފުގައި ރާއްޖެ އިން ވަނީ ރަނގަޅަށް ކުޅެ ދެ ލަނޑު ޖަހައިގެން ލީޑު ވެސް ނަގައިފަ އެވެ. ނަމަވެސް، ދެ ވަނަ ހާފުގައި ލަންކާ އިން ވަނީ ފަހަތުން އަރައި ތިން ލަނޑު ޖަހައިގެން މެޗުން މޮޅުވެފަ އެވެ.

މެޗުގެ ފުރަތަމަ ހާފުގެ 28 ވަނަ މިނެޓުގައި ރާއްޖެ އިން ލަނޑު ޖަހައި ލީޑު ނެގި އެވެ. އެ ލަނޑު ރާއްޖެ އަށް ޖަހައިދިނީ ކެޕްޓަން މުޙައްމަދު އިލާން އިމްރާން އެވެ. އޭގެ ފަހުން މެޗުގެ ފުރަތަމަ ހާފުގެ އިތުރު ވަގުތުގައި އިލާން ވަނީ ރާއްޖޭގެ ދެ ވަނަ ލަނޑެއް ޖަހައި ލީޑު ފުޅާ ކޮށްފަ އެވެ. އެއާ އެކު ރާއްޖެ އިން ފުރަތަމަ ހާފު ނިންމާލީ ދެ ލަނޑުން ކުރީގައި އޮވެގެންނެވެ. 

މެޗުގެ ދެ ވަނަ ހާފު ފަށައިގެން ފުރަތަމަ މިނެޓުގައި ލަަންކާގެ މުޙައްމަދު ކަތީމް ވަނީ އެ ޓީމުގެ ފުރަތަމަ ލަނޑު ޖަހައި ފަރަގު ކުޑަ ކޮށްފަ އެވެ. އޭގެ ފަހުން 62 ވަނަ މިނެޓުގައި ލަންކާ އިން ވަނީ ދެ ވަނަ ލަނޑެއް ޖަހައި ނަތީޖާ ހަމަހަމަ ކޮށްފަ އެވެ. އެ ލަނޑު އެ ޓީމަށް ޖަހައިދިނީ އަޙުމަދު ހިޖާޒީ އެވެ. މެޗުގެ 88 ވަނަ މިނެޓުގައި ލަންކާގެ ތިން ވަނަ ލަނޑު ޖަހައި މޮޅު ކޮށްދިނީ ޙުސެއިން ޢަބްދުﷲ އެވެ.

ލަންކާ އިން ލީޑު ނެގި ފަހުންް ވެސް ރާއްޖެ އިން ވަނީ ނަތީޖާ ހަމަހަމަ ކުރަން ފުރުސަތު ހޯދައިފަ އެވެ. ނަމަވެސް، ރާއްޖެ އަށް ފުރުސަތުގެ ބޭނުން ނުކުރެވި، މެޗު ނިމުނީ ލަންކާ މޮޅުވެގެންނެވެ. 

މުބާރާތުގައި ރާއްޖެ އޮތީ ގުރޫޕް އޭގަ އެވެ. ރާއްޖެ އާއި ލަންކާގެ އިތުރުން ދެން މި ގުރޫޕުގައި އޮތީ ނޭޕާލް އާއި ބޫޓާން އެވެ. ގުރޫޕުގެ ފުރަތަމަ މެޗުގައި ނޭޕާލް އިން ވަނީ ބޫޓާން ބަލިކޮށްފަ އެވެ. ގުރޫޕް ސްޓޭޖުގައި ރާއްޖޭގެ ދެ ވަނަ މެޗުގައި ބޫޓާންއާ ދެކޮޅަށް ނިކުންނާނީ ބުދަ ދުވަހުގެ ރޭ އެވެ.