ސަރުކާރުގެ ހަރަދުތައް ހަމަޖައްސަން އަނެއްކާވެސް 645 މިލިއަން ރުފިޔާގެ ޓީ-ބިލް ވިއްކަން ހުޅުވާލައިފި
5 ސެޕްޓެމްބަރު 2026 | ހޮނިހިރު 12:17ސަރުކާރުގެ ޚަރަދުތައް ހަމަޖެއްސުމަށްޓަކައި 645 މިލިއަން ރުފިޔާ ހޯދުމަށް ހަތަރު މުއްދަތަކަށް ބަހާލައިގެން ޓީ-ބިލް ވިއްކަން ފިނޭންސް މިނިސްޓްރީން ވަނީ ހުޅުވާލާފަ. މި ބިލްތަކުގެ އިންޓްރެސްޓް ރޭޓް 3.5 އިންސައްތައާއި 4.6 އިންސައްތައާ ދެމެދުގައި ހުރިއިރު، މިއީ ދައުލަތުގެ ކޭޝްފްލޯ މެނޭޖްކުރުމަށްޓަކައި ހުޅުވާލި ފުރުސަތެއް
ފިނޭންސް މިނިސްޓަރު ހަސަން ޒަރީރު | ފިނޭންސް މިނިސްޓްރީ
ސަރުކާރުގެ ހަރަދުތައް ބޮޑުވެ، އެ ހަރަދުތައް ހަމަޖައްސަން ތަފާތު ހަތަރު މުއްދަތަކަށް ބަހާލައިގެން ވިއްކާ ޓްރެޜަރީ ބިލް (ޓީ-ބިލް) މެދުވެރިކޮށް 645 މިލިއަން ރުފިޔާ ހޯދަން ފިނޭންސް މިނިސްޓްރީން އިއުލާންކޮށްފި އެވެ.
ފިނޭންސް މިނިސްޓްރީން ކުރި އިއުލާނެއްގައި ބުނީ ހަތަރު ޓީބިލެއް ވިއްކަން ހުޅުވާލާފައިވާ ކަމަށާއި، ހުރިހާ ޓީބިލަކަށް ވެސް އަންނަ ސެޕްޓެމްބަރު 7 ގެ ކުރިން ފައިސާ ދައްކަން ޖެހޭނެ ކަމަށެވެ. އަދި އެ ޓީބިލްތައް ވިއްކުމާ ގުޅޭ އިތުރު މައުލޫމާތު ހޯދަން ފިނޭންސް މިނިސްޓްރީއަށް ގުޅުމުން ލިބޭނެ ކަމަށް ފިނޭންސް މިނިސްޓްރީން ބުނެފައިވެ އެވެ.
އެގޮތުން، ފިނޭންސް މިނިސްޓްރީން ވަނީ 28 ދުވަސް، 98 ދުވަސް، 182 ދުވަސް އަދި 364 ދުވަހުގެ މުއްދަތަށް ފައިސާ އިންވެސްޓްކުރުމުގެ ފުރުސަތު ހުޅުވާލާފަ އެވެ. މި ފަހަރު ވިއްކާ ބިލްތަކުގެ ތެރެއިން އެންމެ ބޮޑު އަދަދެއް ހިއްސާކުރަނީ 3.5 އިންސައްތައިގެ އިންޓްރެސްޓް ރޭޓުގައި ވިއްކާ 28 ދުވަހުގެ ބިލެވެ. މި މުއްދަތަށް 265 މިލިއަން ރުފިޔާ ހޯދުމަށް ވަނީ ކަނޑައަޅާފަ އެވެ.
މީގެ އިތުރުން، 4.23 އިންސައްތައިގެ އިންޓްރެސްޓް ރޭޓުގައި 182 ދުވަހުގެ މުއްދަތަށް 247 މިލިއަން ރުފިޔާ، 4.6 އިންސައްތައިގެ އިންޓްރެސްޓް ރޭޓުގައި 364 ދުވަހުގެ މުއްދަތަށް 83.4 މިލިއަން ރުފިޔާ އަދި 3.87 އިންސައްތައިގެ އިންޓްރެސްޓް ރޭޓުގައި 98 ދުވަހުގެ މުއްދަތަށް 50 މިލިއަން ރުފިޔާ ހޯދުމަށް ވެސް ވަނީ ހުޅުވާލާފަ އެވެ.
ރައީސް މުއިއްޒުގެ ސަރުކާރުގެ އާމްދަނީ އަށް ވުރެ ޚަރަދު ބޮޑުވެ، ހަރަދުތައް ހަމަޖެއްސުމަށްޓަކައި، މީގެ ކުރިން ވެސް ޓީ-ބިލް ވިއްކާފައިވެ އެެވެ. އަދި މި ބިލްތައް އާންމު ގޮތެއްގައި ގަންނަނީ ޕެންޝަން ފަންޑާއި ބޭންކުތަކާއި ސަރުކާރު ހިއްސާވާ ކުންފުނިތަކުންނެވެ. އެގޮތުން، މިއަހަރު ޖޫން މަހު 1.26 ބިލިއަން، މާރޗް މަހު 1.1 ބިލިއަން އަދި ފެބްރުއަރީ މަހު 1.16 ބިލިއަން ރުފިޔާގެ ޓީ-ބިލް ވިއްކަން ހުޅުވާލާފައިވެ އެވެ.
ޓްރެޜަރީ ބިލަކީ ސަރުކާރުގެ ކުރު މުއްދަތުގެ މާލީ ބޭނުންތައް ފުއްދުމަށާއި ކޭޝްފްލޯ މެނޭޖްކުރުމަށް ބޭނުންކުރާ މާލީ ވަސީލަތެކެވެ.
