އަހަރުގެ މިހާތަނަށް 8.5 ބިލިއަން ރުފިޔާ ޚަރަދު ކޮށްފި، މިއީ މިދިޔަ އަހަރުގެ އެ މުއްދަތާ އަޅާބަލާއިރު 49 އިންސައްތައިގެ އިތުރުވުމެއް!
ސަރުކާރުގެ ކުންފުނިތަކުގެ ޖުމްލަ ޚަރަދުތައް މިދިޔަ އަހަރާ އަޅާބަލާއިރު ބޮޑުތަނުން އިތުރުވެފައިވާކަން ފިނޭންސް މިނިސްޓްރީގެ ތަފާސްހިސާބުތަކުން ދައްކައިފި. މެދުއިރުމަތީގެ ހަނގުރާމައާ ގުޅިގެން ފަތުރުވެރިކަމުގެ އާމްދަނީ 6 އިންސައްތަ ދަށަށް ގޮސްފައިވާއިރު، ސަރުކާރުގެ ޖުމްލަ ޚަރަދު ވަނީ 49 އިންސައްތަ އިތުރުވެފަ. ޚަރަދުތައް ބޮޑުވި މައިގަނޑު ސަބަބަކީ ދަރަނި ދެއްކުން ކަމަށް ސަރުކާރުން ބުނި ނަމަވެސް، ތަފާސްހިސާބުތަކުން ދައްކާގޮތުގައި ދަރަންޏަށް ހޭދަކޮށްފައި ވަނީ ޖުމްލަ ޚަރަދުގެ 33 އިންސައްތަ.
ފިނޭންސް މިނިސްޓްރީ: އެ މިނިސްޓްރީގެ ތަފާސްހިސާބުގައިވާ ގޮތުން ސަރުކާރުގެ ކުންފުނިތައް ހިންގުމަށް ދޫކޮށްފައިވާ ފައިސާގެ އަދަދު ވެސް ވަނީ އިތުރުވެފަ | ރާއްޖެއެމްވީ
ސަރުކާރުގެ މުވައްޒަފުންގެ މުސާރަ އާއި އިނާޔަތްތަކަށް މިދިޔަ މަހުގެ 14 ވަނަ ދުވަހުގެ ނިޔަލަށް ސަރުކާރުން ހޭދަ ކޮށްފައިވާ އަދަދު، މިދިޔަ އަހަރާ އަޅާބަލާއިރު 10 އިންސައްތަ އިތުރު ކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކައިފި އެވެ.
އެ މިނިސްޓްރީ އިން އާންމު ކޮށްފައިވާ ތަފާސްހިސާބުތަކަށް ބަލާއިރު މިދިޔަ މަހުގެ 14 ވަނަ ދުވަހާ ހަމައަށް ސަރުކާރު މުވައްޒަަފުންގެ މުސާރަ އާއި އިނާޔަތްތަކަށް 5.3 ބިލިއަން ރުފިޔާ ވަނީ ހަރަދުކޮށްފަ އެވެ. މިއީ މިދިޔަ އަހަރުގެ އެ މުއްދަތާ އަޅާބަލާއިރު 477.4 މިލިއަން ރުފިޔާ ނުވަތަ 10 އިންސައްތަ އިތުރު އަދަދެކެވެ.
ތަފާސްހިސާބުގައިވާ ގޮތުން ސަރުކާރުގެ ކުންފުނިތައް ހިންގުމަށް ދޫކޮށްފައިވާ ފައިސާގެ އަދަދު ވެސް ވަނީ އިތުރުވެފަ އެވެ. އެގޮތުން ސަރުކާރުގެ ކުންފުނިތަކަށް މިއަހަރުގެ މިހާތަނަށް 16.2 މިލިއަން ރުފިޔާ ޚަރަދު ކޮށްފައިވާއިރު މިއީ މިދިޔަ އަހަރާ އަޅާބަލާއިރު 2.1 މިލިއަން ރުފިޔާ އިތުރު އަދަދެކެވެ.
މިއަހަރުގެ މިހާތަނަށް ސަރުކާރުގެ ޖުމްލަ ޚަރަދު ވެސް ބޮޑުވެފައިވާ ކަމަށް ތަފާސްހިސާބުން ފެނެއެވެ. މި އަހަރުގެ މިހާތަނަށް ޖުމްލަ ޚަރަދު މިދިޔަ އަހަރަށް ވުރެ 8.5 ބިލިއަން ރުފިޔާ އިތުރު ވެފައިވާއިރު މިއީ މިދިޔަ އަހަރާ އަޅާބަލާއިރު 49 އިންސައްތަ އިތުރު އަދަދެކެވެ.
މެދުއިރުމަތީގެ ހަނގުރާމައާއި ގުޅިގެން ފަތުރުވެރިކަމަށް އަސަރު ކޮށްފައިވާއިރު ރާއްޖޭގެ އާމްދަނީ ވެސް ވަނީ ވަރަށް ބޮޑަށް ދަށަށް ގޮސްފަ އެވެ. އެގޮތުން އާމްދަނީ 6 އިންސައްތަ ދަށަށް ގޮސްފައިވާއިރު ފަތުރުވެރިކަމުން ލިބޭ ޓެކުހާއި ފީތަކުން ލިބޭ އާމްދަނީ ވަނީ ވަރަށް ބޮޑަށް ދަށަށް ގޮސްފަ އެވެ.
މި އަހަރުގެ މިހާތަނަށް ޚަރަދުތައް ބޮޑުވެފައިވާއިރު ސަރުކާރުން ބުނަމުންދަނީ އެންމެ ބޮޑު ޚަރަދެއް ކޮށްފައި ވަނީ ދަރަނި ދެއްކުމަށް ކަމަށެވެ. ނަމަވެސް ސަރުކާރުގެ ޖުމްލަ ޚަރަދުން ދަރަންޏަށް ހޭދަ ކޮށްފައިވަނީ ޚަރަދުގެ 33 އިންސައްތަ އެވެ.
