އިންޑޮނޭޝިއާ އަށް އައި 7.4 ގެ ބާރުގަދަ ބިންހެލުމެއްގައި އެކަކު މަރުވެއްޖެ
މި ބިންހެލުމަށް ފަހު ރިކްޓާ މިންގަނޑުން 5.5 އާއި، 5.2 ގެ ބާރު މިނުގައި ދެ ލޮޅުން އައިސްފައިވާއިރު، އިތުރު ލޮޅުން ތަކެއް އައުން އެކަށިގެންވާ ކަމަށް ވެސް ކަމާ ގުޅުން ހުރި އިދާރާ ތަކުން ވަނީ އިންޒާރު ދީފައި.
އިންޑޮނޭޝިއާ އަށް އައި ބިންހެލުމުގައި ގެއްލުންވެފައިވާ އިމާރާތެއް | ސޯޝަލް މީޑިއާ
އިންޑޮނޭޝިއާގެ މޮލުކާ ކަނޑުގެ ސަރަހައްދަށް ބުރާސްފަތި ދުވަހުގެ ހެނދުނު ރިކްޓާ މިންގަނޑުން 7.4 ގެ ބާރުގަދަ ބިންހެލުމެއް އައިސް، މިހާތަނަށް އެކަކު މަރުވެފައިވާ ކަމަށް ހާމަ ކޮށްފި އެވެ.
އިންޑޮނޭޝިއާގެ ޓާނޭޓް ރަށާ ކައިރިން، ބިމުގެ 35 ކިލޯ މީޓަރު އަޑި އަށް އައި މި ބިންހެލުމާ ގުޅިގެން، ސުނާމީގެ އިންޒާރު ނެރުނު ނަމަވެސް، ފަހުން ވަނީ އެ އިންޒާރު އަނބުރާ ގެންގޮސްފަ އެވެ.
މި ހާދިސާގައި މަރުވެފައި ވަނީ ނޯތު ސުލަވޭސީ އަށް ނިސްބަތްވާ އުމުރުން 70 އަހަރުގެ އަންހެނެކެވެ. އޭނާ މަރުވީ ބިންހެލުމުގެ ސަބަބުން އިމާރާތެއްގެ ބައިތައް ވެއްޓި، އޭގެ ދަށުވެގެން ކަމަށް އިންޑޮނޭޝިއާގެ ޤައުމީ ނިއުސް އެޖެންސީ، އަންތާރާ އިން ވަނީ ރިޕޯޓު ކޮށްފަ އެވެ. މީގެ އިތުރުން ބިންހެލުން އައި ވަގުތު ސަލާމަތް ވުމަށް އިމާރާތަކުން ފުންމާލި މީހެއްގެ ފައި ބިންދައިގެން ގޮސްފައިވާ ކަމަށް ވެސް އެ އެޖެންސީ އިން ވަނީ ބުނެފަ އެވެ.
ބިންހެލުމުގެ ބާރު ގަދަ ކަމުން ގުއާމް، ޖަޕާން، މެލޭޝިޔާ، ޕަޕުއާ ނިއު ގިނީ، ފިލިޕީންސް އަދި ތައިވާންގެ އައްސޭރިފަށަށް 0.3 މީޓަރަށް ވުރެ ތިރި ސުނާމީ ރާޅު އެރުން އެކަށީގެންވާ ކަމަށް ޕެސިފިކް ސުނާމީ ވޯނިން ސެންޓަރުން ކުރިން ވަނީ ލަފާ ކޮށްފަ އެވެ. ނަމަވެސް ދެ ގަޑިއިރު ފަހުން އެ އިންޒާރު އުވާލާފައިވެ އެވެ.
މި ބިންހެލުމަށް ފަހު ރިކްޓާ މިންގަނޑުން 5.5 އާއި، 5.2 ގެ ބާރު މިނުގައި ދެ ލޮޅުން އައިސްފައިވާއިރު، އިތުރު ލޮޅުން ތަކެއް އައުން އެކަށިގެންވާ ކަމަށް ވެސް ކަމާ ގުޅުން ހުރި އިދާރާ ތަކުން ވަނީ އިންޒާރު ދީފަ އެވެ.
ބިންހެލުމުގެ އިހުސާސް ކުރެވުނު ބައެއް މީހުން ބީބީސީ އަށް މައުލޫމާތު ދެމުން ބުނެފައި ވަނީ، މިއީ ފާއިތުވި ހަ އަހަރު ދުވަހުގެ ތެރޭގައި އެ ސަރަހައްދަށް އައި އެންމެ ބާރު ގަދަ ބިންހެލުން ކަމަށެވެ. މަނާޑޯގައި ދިރިއުޅޭ ނޫސްވެރިއެއް ކަމަށް އިސްވަރާ ސަފީތުރީ ބުނީ، ބިންހެލުމުގެ ސަބަބުން ގޭގެ ފަރުނީޗަރުތައް ގުޑި، އޭނާގެ ބޯ އެނބުރުން އަރާ ގޮތްވި ކަމަށެވެ. އަދި ބޭރުގެ މަގުތައް ވެސް ތެޅެމުން ދިޔަ ކަމަށް އޭނާ ވަނީ ފާހަގަ ކޮށްފަ އެވެ.
އިންޑޮނޭޝިއާގެ ޖިއޮލޮޖިކަލް އެޖެންސީ އިން ރިޕޯޓު ކޮށްފައިވާ ގޮތުގައި، މި ބިންހެލުމުގެ ސަބަބުން ގިނަ އަދަދެއްގެ އިމާރާތް ތަކަކަށް ވަނީ ގެއްލުން ލިބިފަ އެވެ. މަނާޑޯގެ ސްޕޯޓްސް ކޮމްޕްލެކްސް އަކުން ފެނުނު މަންޒަރު ތަކުން ފެންނަ ގޮތުގައި، ބޮޑެތި ފަރުނީޗަރުތައް ބިންމައްޗަށް ވެއްޓި، ދަގަނޑު އޮނިގަނޑުތައް ވެސް ވަނީ ބިންދައިގެން ގޮސްފަ އެވެ.
މަސްދަރު: ބީބީސީ
