ލައިޕްޒިގަށް ދިން ހަމަލާއާ ގުޅިގެން ރަޝިޔާ އަށް ފިއްތުން އިތުރު ކުރަން ނޭޓޯ އިން ނިންމައިފި

ޖަރުމަނުގެ ލައިޕްޒިގް އެއާޕޯޓަށް ދިން ހަމަލާ އަކީ ރަޝިޔާއިން ހިންގި އައު ޖަރީމާއެއް ކަމަށް ކަމަށް ސިފަކޮށް، އެ ޤައުމާ ދެކޮޅަށް ކުރާ ފިއްތުންތައް އިތުރު ކުރުމަށް ނޭޓޯ އާއި ޔޫރަޕިއަން ޔޫނިއަން (އީޔޫ) އިން ވަރުގަދަ އަޒުމެއް ކަނޑައަޅައިފި އެވެ.

ޔޫރަޕިއަން ކޮމިޝަންގެ ރައީސާ އުރުސުލާ ވޮން ޑެރ ލެޔެން އާއި ނޭޓޯގެ ސެކްރެޓަރީ ޖެނެރަލް މާކް ރުޓޭ ބެލްޖިއަމްގެ ބްރަސަލްސްގައި ބޭއްވި ބައްދަލުވުމެއްގައި ވިދާޅުވީ، ރަޝިޔާގެ އަމަލުތައް ދަނީ ނުރައްކާތެރި މިންވަރަކަށް އިތުރުވަމުން ކަމަށާއި، މިފަދަ އަމަލުތަކަށް ދޭ ރައްދު އަވަސްކޮށް ވަރުގަދަ ކުރަންޖެހޭ ކަމަށެވެ.

މިދިޔަ އޯގަސްޓް މަހުގެ ހަތަރު ވަނަ ދުވަހު ލައިޕްޒިގް އެއާޕޯޓުގައި އޮތް ޔޫކްރެއިންގެ މުދާ އުފުލާ ބޯޓަކަށް އަމާޒުކޮށް ގޮވާ ތަކެތި ހަރުކޮށްފައިވާ ޑްރޯން އަކުން ހަމަލާ ދޭން އުޅުނު މައްސަލައިގައި ޖަރުމަނު ސަރުކާރުން ބުނެފައި ވަނީ، މިއީ ރަޝިޔާގެ ޖާސޫސީ އިދާރާ ތަކުން ރާވައިގެން ހިންގި ކަމެއްކަން ތަހުގީގަށް ސާބިތުވެފައިވާ ކަމަށެވެ.

މި ހަމަލާގައި ބޭނުންކުރި ޑްރޯންގެ ކޮންފިގަރޭޝަނާއި ގޮވާ ތަކެއްޗަކީ ރަޝިޔާގެ "ހައިބްރިޑް" އޮޕަރޭޝަންތަކުގައި ބޭނުންކުރާ ތަކެތި ކަމަށް ޖަރުމަނުގެ އިންޓީރިއާ މިނިސްޓްރީ އިން ވަނީ ހާމަކޮށްފައި އެވެ. މި މައްސަލައިގައި ރަޝިޔާގެ ޕާސްޕޯޓު އޮތް ދެ މީހަކު ތުހުމަތު ކުރެވޭ މީހުންގެ ގޮތުގައި ވަނީ ފާހަގަކުރެވިފައި އެވެ.

މި ހާދިސާއާ ގުޅިގެން ޖަރުމަނުން ވަނީ ބޯންގައި ހުންނަ ރަޝިޔާގެ ކޮންސިއުލޭޓާއި، ބާލިންގައި ހުންނަ ރަޝިޔާގެ ސަގާފީ މަރުކަޒު ބަންދުކުރަން ނިންމާފައި އެވެ. މީގެ ރައްދުގައި ރަޝިޔާގެ ފޮރިން މިނިސްޓަރު ސާގޭ ލަވްރޮވް ވަނީ މޮސްކޯ، ސެއިންޓް ޕީޓަސްބާގް އަދި ޔެކަޓެރިންބާގްގައި ހުންނަ ޖަރުމަނުގެ ގޯތޭ އިންސްޓިޓިއުޓްތައް ބަންދުކުރާނެ ކަމަށް އިއުލާން ކުރައްވާފައި އެވެ.

ރަޝިޔާގެ ރައީސް ވްލަޑިމިއަރ ޕުޓިން މި ފިޔަވަޅުތައް ކުށްވެރި ކުރައްވައި ވިދާޅުވީ، މިއީ ޖަރުމަނުގެ ރައްޔިތުންގެ މަސްލަހަތާ ޚިލާފަށް ނިންމި ސީރިއަސް އަދި ވަރަށް ގޯސް ނިންމުމެއް ކަމަށެވެ.

އީޔޫގެ ޚާރިޖީ ވަޒީރުން އަޔަލެންޑުގައި ބޭއްވި ބައްދަލުވުމެއްގައި، ރަޝިޔާގެ ތެޔޮ އުފުލާ "ޝެޑޯ ފްލީޓް"އާ ދެކޮޅަށް ފިޔަވަޅު އެޅުމަށާއި، ރަޝިޔާގެ ފަތުރުވެރިންނަށް ވިސާ ދޫކުރުން އިތުރަށް ހަރުކަށި ކުރުމަށް ވަނީ މަޝްވަރާކޮށްފައި އެވެ. މީގެ އިތުރުން، ފްރާންސް، ބެލްޖިއަމް އަދި ނެދަލެންޑްސް އިން ވަނީ ރަޝިޔާގެ ސަފީރުން ހާޒިރުކޮށް މި ހަމަލާއާ ގުޅިގެން އިހުތިޖާޖު ކޮށްފައި އެވެ. އަދި ރަޝިޔާގެ ހިފަހައްޓާފައިވާ 193 ބިލިއަން ޔޫރޯގެ އެސެޓުތައް ޔޫކްރެއިން އަށް އެހީވުމަށް ބޭނުން ކުރުމަށް ބައެއް ޤައުމުތަކުން ދަނީ ބާރު އަޅަމުންނެވެ.

ޖަރުމަނުގެ އިތުރުން ޕޮލެންޑުގައި ވެސް ޑްރޯން އުފައްދާ ފެކްޓްރީއެއްގައި ރޯކޮށްލުމާއި، ޖަރުމަނުގެ ކަރަންޓު އުފައްދާ މަރުކަޒުތަކަށް ދީފައިވާ ހަމަލާ ތަކަކީ ވެސް ބޭރު ޤައުމަކުން އަޑީގައި އޮވެގެން ހިންގާފައިވާ ސަބޮޓާޖް ނުވަތަ ގެއްލުން ދިނުމުގެ އަމަލުތަކެއް ކަމަށް ބެލެވޭ ކަމަށް ކަމާ ބެހޭ ފަރާތްތަކުން ބުނެ އެވެ.

އުރުސުލާ ވޮން ޑެރ ލެޔެން ވިދާޅުވީ، ރަޝިޔާ އިން ޔޫކްރެއިންގައި ހިންގާ އުދުވާންތައް ހުއްޓާލަންދެން، ޔޫރަޕުން ރަޝިޔާ އަށް ކުރާ ފިއްތުންތައް ހުއްޓާ ނުލައި ކުރިއަށް ގެންދާނެ ކަމަށެވެ.