ނޭޓޯ ސަމިޓަށް ތުރުކީ އަށް ވަޑައިގެންނެވި ކޮންމެ ވެރިއަކަށް އުރުދުޣާން ހަދިޔާ އަކަށް ދެއްވީ ފިސްތޯލަ އަކާއި ވަޒަން
12 ޖުލައި 2026 | އާދީއްތަ 08:30ތުރުކީގެ ދިފާއީ ސިނާއަތުގެ ކުރިއެރުން ދައްކާލުމަށްޓަކައި، އެ ގައުމުގައި ބޭއްވި ނޭޓޯ ސަމިޓްގެ ބައިވެރިންނަށް ރައީސް އުރުދުޣާން ވަނީ ހަދިޔާއެއްގެ ގޮތުގައި ފިސްތޯލައާއި ވަޒަން ދެއްވާފައި. ދުނިޔޭގައި ތިންވަނައަށް އެންމެ ގިނައިން ކުދި ހަތިޔާރު އެކްސްޕޯޓްކުރާ ތުރުކީގެ މި ހަދިޔާތައް ބައެއް ގައުމުތަކުގެ ލީޑަރުން މިހާރު ވަނީ ދާރުލްއާސާރުތަކާ ހަވާލުކޮށްފައި.
އަންކާރާގައި ބޭއްވި ނޭޓޯ ސަމިޓުގެ ތެރެއިން، ތުރުކީވިލާތުގެ ރައީސް ރަޖަބް ތައްޔިބް އުރުދުޣާން، ލިތުއޭނިއާގެ ރައީސް ގިޓާނަސް ނައުސޭޑާއަށް ހަދިޔާ އަކަށް ދެއްވި ފިސްތޯލައިގެ ފޮޓޯ އެއް | ރޮއިޓާސް
ތުރުކީވިލާތުގެ އަންކާރާގައި ހުސްވި ހަފްތާގެ ބުދަ ދުވަހު ބޭއްވި ނޭޓޯ ސަމިޓް ނިންމަވާލެއްވުމަށްފަހު އެނބުރި ގައުމަށް ވަޑައިގެންނެވި ބެލްޖިއަމްގެ ބޮޑުވަޒީރު، އެމަނިކުފާނުގެ ދަތުރުފުޅު ފޮށިކޮޅުން ފިސްތޯލައަކާއި ވަޒަންތަކެއް ފެނުމުން ކުއްލި ހައިރާންކަމެއް ލިބިވަޑައިގެންފި އެވެ.
ނޭޓޯގެ ލީޑަރުންގެ މެދުގައި ބަހުގެ ހަމަލާތަކެއް ބަދަލުކުރެވުނު މި ސަމިޓަށްފަހު، ސަމިޓްގެ މެހުމާންދާރީ އަދާކުރި ތުރުކީގެ ރައީސް ރަޖަބް ތައްޔިބް އުރުދުޣާން ވަނީ ކޮންމެ ލީޑަރަކަށްވެސް ވަކިވުމުގެ ހަދިޔާއެއްގެ ގޮތުގައި ތަފާތު އެއްޗެއް ދެއްވާފަ އެވެ. އެއީ ފިސްތޯލަ (ރިވޯލްވަރ) އަކާއި، އަދި އެއީ ހަމައެކަނި ދައްކާލުމަށް ދިން އެއްޗެއް ނޫންކަން އަންގައިދޭ ވަޒަންތަކެކެވެ.
ރައީސް އުރުދުޣާން ބޭނުންފުޅުވީ ތުރުކީގެ ދިފާއީ ސިނާއަތުގެ ކުރިއެރުން ދައްކާލުމަށެވެ. މި ސިނާއަތަކީ މިހާރު ތުރުކީގެ އެކްސްޕޯޓާއި ޚާރިޖީ ސިޔާސަތުގައި މުހިންމު ދައުރެއް އަދާކުރާ ވަސީލަތެކެވެ.
ލިތުއޭނިއާގެ ރައީސް ގިޓާނަސް ނައުސޭޑާގެ އޮފީހުން އާންމުކުރި ފޮޓޯތަކުން ފެންނަ ގޮތުގައި، އެއީ 1990 ގެ އަހަރުތަކުގައި ތުރުކީގެ ހަތިޔާރު އުފައްދާ ކުންފުންޏެއް ކަމަށްވާ އެމް.ކޭ.އީ އިން އުފެއްދި، މަދުން ނޫނީ ނުފެންނަ "ގުމޫސޭ .357 މެގްނަމް" މޮޑެލްގެ ހަ ވަޒަން ލެއްވޭ ފިސްތޯލައެކެވެ.
މި ފިސްތޯލަ އޮތީ ތުރުކީގެ ދިދައާއި ނޭޓޯގެ ލޯގޯ ޖަހާފައިވާ ރީތި ލަކުޑި ފޮށްޓެއްގަ އެވެ. އަދި އެ ފޮށީގައި ތުރުކީ ބަހުންނާއި އިނގިރޭސި ބަހުން "ގުމޫސޭ، މިއީ އަޅުގަނޑުމެންގެ ގައުމުގައި އެންމެ ފުރަތަމަ އުފެއްދި ރިވޯލްވަރު ކަހަލަ އަތްމަތީ ބަޑި" ކަމަށް ލިޔެފައިވާ ލިޔުންކޮޅެއް ހަރުކޮށްފައިވެ އެވެ.
ސްޕެއިންގެ ބޮޑުވަޒީރު ޕެޑްރޯ ސަންޗޭޒްގެ ތަރުޖަމާނު ވިދާޅުވި ގޮތުގައި، ހުރިހާ ލީޑަރުންނަށްވެސް ދީފައިވަނީ އެ ބޭފުޅެއްގެ ނަން ކަނޑާނަގައިގެން ތައްޔާރުކޮށްފައިވާ އެއް މޮޑެލްއެއްގެ ފިސްތޯލައެކެވެ. ބެލްޖިއަމްގެ ބޮޑުވަޒީރު ބާޓް ޑި ވެވަރ ވަނީ އެމަނިކުފާނަށް ލިބިވަޑައިގެންނެވި ފިސްތޯލަ ރައްކާތެރިކަމާއެކު ބޭއްވުމަށް ބްރަސަލްސް އެއާޕޯޓުގެ ފުލުހުންނާ ހަވާލުކުރައްވާފަ އެވެ.
ޕޮލެންޑްގެ ރައީސް ކެރޯލް ނަވްރޮކީގެ އެހީތެރިއަކު ރޭޑިއޯ އާރް.އެމް.އެފް އެފް.އެމް އަށް މައުލޫމާތު ދެއްވަމުން ވިދާޅުވީ، އެމަނިކުފާނަށް ލިބިވަޑައިގެންނެވި ފިސްތޯލަ މިހާރު އޮތީ ވޯސޯ އެއާޕޯޓުގައި ކަސްޓަމްސް ކްލިއަރެންސްގެ މަރުހަލާގައި ކަމަށެވެ. އަދި އެ ފިސްތޯލަ ބާއްވާނީ ރައްކާތެރިކަން ކަށަވަރުވާނެ، އަދި ހަދިޔާއެއްގެ ގޮތުގައި އޭގެ ގަދަރު ހިފެހެއްޓޭނެ ފަދަ ތަނެއްގައި ކަމަށެވެ.
"ޔަގީނުންވެސް އެއްވެސް މީހަކު އެ ބޭނުންކޮށްގެން ބަޑިއެއް ނުޖަހާނެ،" އޭނާ އިތުރަށް ވިދާޅުވި އެވެ.
ނެދަލޭންޑްސް އަދި ސްވިޑަންގެ ބޮޑުވަޒީރުންގެ އޮފީހުން ބުނި ގޮތުގައި، އެ ބޭފުޅުންނަށް ލިބިވަޑައިގެންނެވި ފިސްތޯލަތައް ވަނީ އަންކާރާގައި ހުންނަ އެ ގައުމުތަކުގެ އެމްބަސީތަކާ ހަވާލުކޮށްފަ އެވެ. ނެދަލޭންޑްސްގެ ފިސްތޯލަ ބޭނުންނުކުރެވޭ ގޮތަށް ހެދުމަށް ނިންމާފައިވާއިރު، ސްވިޑަންގެ ފިސްތޯލަ އޮތީ އެތެރެކުރުމުގެ ހުއްދަތައް ލިބެންދެން މަޑުޖެހިފަ އެވެ.
އިނގިރޭސި ބޮޑުވަޒީރު ކިއަރ ސްޓާމަރަށް ލިބިވަޑައިގެންނެވި ފިސްތޯލައާއެކު، އެ ސާފުކުރާ ސާމާނާއި 500 ވަޒަން ދީފައިވާ ކަމަށް ޑައުނިންގް ސްޓްރީޓްގެ މަސްދަރަކުން މައުލޫމާތު ދިނެވެ. އިޓަލީގެ ބޮޑުވަޒީރު ޖޯޖިއާ މެލޯނީގެ ފިސްތޯލަ މިހާރު ވަނީ އެހެނިހެން ރަސްމީ ހަދިޔާތަކާއެކު ސަރުކާރުގެ މައި އިދާރާ ކަމަށްވާ ޕަލާޒޯ ޗީޖީގައި ރައްކާކުރެވިފަ އެވެ.
ޔޫރަޕްގެ އިއްތިހާދުގެ ކޮމިޝަންގެ ރައީސާ އުރުސުލާ ފޮން ޑަ ލޭޔަން ގަސްދުކުރައްވަނީ އެކަމަނާގެ ފިސްތޯލަ އަސްކަރީ ދާރުލްއާސާރަކަށް ހަދިޔާކުރެއްވުމަށެވެ. އަދި ގްރީސްގެ ލީޑަރުވެސް ވަނީ އެމަނިކުފާނަށް ލިބިވަޑައިގެންނެވި ހަދިޔާ އެތެންސްގައި ހުންނަ ހަނގުރާމައިގެ ދާރުލްއާސާރަށް ދެއްވުމަށް ނިންމަވާފަ އެވެ.
ކެނެޑާގެ ބޮޑުވަޒީރު މާކް ކާނީ، އެމަނިކުފާނު ހަދިޔާއަކަށް ދެއްވި މޭޕަލް ސިރަޕާ އަޅާބަލާއިރު ތުރުކީގެ ހަދިޔާ މާ ވަރުގަދަ ކަމަށް ވިދާޅުވެ ސަމާސާ ކުރެއްވި އެވެ. ނަމަވެސް އެމަނިކުފާނު އަދި އެ ފިސްތޯލަ ދެކިވަޑައިނުގަންނަވާ ކަމަށް ވިދާޅުވި އެވެ.
ނޫސްވެރިންގެ ބައްދަލުވުމެއްގައި ވާހަކަދައްކަވަމުން ކާނީ ވިދާޅުވީ، އެ ފިސްތޯލަ މިހާރު ވަނީ ބޭނުންނުކުރެވޭ ގޮތަށް ހަދާފައި ކަމަށާއި، އެންމެ ފަހުން އެ ބާއްވާނީ ގައުމީ ހަނގުރާމައިގެ ދާރުލްއާސާރުގައި ކަމަށްވެސް ވިދާޅުވި އެވެ.
ތުރުކީގެ މިޒަމާނުގެ ހަތިޔާރު އުފައްދާ ސިނާއަތް ބޮޑަށް އަމާޒުކޮށްފައިވަނީ ސެމީ-އޮޓޮމެޓިކް ހަތިޔާރަށެވެ. އެހެންކަމުން "ގުމޫސޭ" މޮޑެލްގެ މި ރިވޯލްވަރަކީ ހަތިޔާރު އެއްކުރާ މީހުންގެ މެދުގައި ވަރަށް ޚާއްސަ އެއްޗެކެވެ.
ތުރުކީގެ ހަތިޔާރު އުފައްދާ ކުންފުނިތަކުން މިހާރު ވަނީ އަގުހެޔޮ ފިސްތޯލައާއި ބަޑިތަކާއެކު ޔޫރަޕްގެ ބާޒާރަށް ވަދެފަ އެވެ. މީގެ ސަބަބުން، ކުޅިވަރާއި ޚިދުމަތްތަކުގައި ބޭނުންކުރާ އަގުބޮޑު ހަތިޔާރު އުފެއްދުމުގައި މަޝްހޫރުވެފައިވާ އިޓަލީއާއި ބެލްޖިއަމްގެ ކުންފުނިތަކަށް ބޮޑު ގޮންޖެހުމަކާ ކުރިމަތިވެފައިވެ އެވެ.
ޖެނީވާގައި ހުންނަ "ސްމޯލް އާމްސް ސާވޭ" އިން ހާމަކުރާ ގޮތުގައި، 2019 އާއި 2024 އާ ދެމެދު ތުރުކީއަކީ ދުނިޔޭގައި ތިންވަނައަށް އެންމެ ގިނައިން ކުދި ހަތިޔާރު އެކްސްޕޯޓްކުރި ގައުމެވެ. މި މުއްދަތުގައި ތުރުކީން ވަނީ ގާތްގަނޑަކަށް 3 ބިލިއަން ޑޮލަރުގެ ހަތިޔާރު އެކްސްޕޯޓްކޮށްފަ އެވެ. މި ލިސްޓުގެ ކުރީގައި އުޅެނީ އެމެރިކާއާއި އިޓަލީ އެވެ.
މަސްދަރު: ރޮއިޓާސް
