ބަހްރެއިން އަތުން ޒުވާން ޓީމު ބަލިވެއްޖެ

އޭއެފްސީ އޭޝިއަން ކަޕް ކޮލިފިކޭޝަންގައި ރާއްޖެ އިން ކުޅުނު ދެ ވަނަ މެޗުގައި ބަހްރެއިން އަތުން ބަލިވެއްޖެ އެވެ.

ކޮލިފިކޭޝަންގައި ރާއްޖެ ހިމެނިފައި އޮތީ ގުރޫޕު ސީގަ އެވެ. ރާއްޖޭގެ އިތުރުން ދެން މި ގުރޫޕުގައި އޮތީ ބޫޓާން، ދެކުނު ކޮރެއާ، ޗައިނާ އަދި ބަހުރެއިން އެވެ. ކޮލިފިކޭޝަންގެ ފުރަތަމަ މެޗުގައި ރާއްޖެ އިން ވަނީ ބޫޓާނާ އެއްވަރުކޮށްފަ އެވެ. އެއީ ބޫޓާން އިން ދެ ލަނޑުގެ ލީޑެއް ހޯދާފައި ވަނިކޮށް، ފަހަތުން އަރައި ދެ ލަނޑު ޖަހައިގެންނެވެ.

ދެ ވަނަ މެޗުގައި ހޯމަ ދުވަހު ބަހްރެއިންއާ ދެކޮޅަށް ކުޅެ ރާއްޖެ ބަލިވީ 1-0 އިންނެވެ. މެޗުގައި ބަހްރެއިން އިން ލަނޑު ޖެހީ ވެސް ފަހު ދިހަ މިނެޓުގެ ތެރޭގަ އެވެ. އެގޮތުން މެޗުގެ 83 ވަނަ މިނެޓުގައި އެ ޓީމުގެ ލަނޑު ޖެހީ އިބްރާހިމް އަޙުމަދު އަޔާޝް އެވެ. ބަހްރެއިންއާ ދެކޮޅަށް ކުޅުނު މެޗުން ރާއްޖެ ބަލިވި ނަމަވެސް، އެ މެޗުގައި ރާއްޖެ އިން ވަނީ ރަނގަޅު ކުޅުމެއް ދައްކައިފަ އެވެ. ރާއްޖެ އިން ޗަނީ މެޗުގައި ލަނޑު ޖެހުމަށް ވެސް ފުރުސަތުތަކެއް ތަނަވަސްކޮށްފަ އެވެ.

ކޮލިފިކޭޝަންގައި ރާއްޖޭގެ ތިން ވަނަ މެޗުގައި ބުދަދުވަހު ދެކުނު ކޮރެއާއާ ދެކޮޅަށް ކުޅޭނެ އެވެ، އަދި ހަތަރު ވަނަ މެޗުގައި ޗައިނާއާ ދެކޮޅަށް ނިކުންނާނީ ހުކުރު ދުވަހު އެވެ.