ކާއިނާތުގެ ސިއްރުތައް ހޯދުމަށް ނާސާގެ 4.3 ބިލިއަން ޑޮލަރުގެ ރޯމަން ޓެލެސްކޯޕް ފަޒާއަށް ފޮނުވައިލައިފި

ކާއިނާތުގެ ފޮރުވިފައިވާ ސިއްރުތައް ހޯދުމަށްޓަކައި، 4.3 ބިލިއަން ޑޮލަރުގެ އަގުހުރި "ނޭންސީ ގްރޭސް ރޯމަން ސްޕޭސް ޓެލެސްކޯޕް" ނާސާއިން ފަޒާއަށް ފޮނުވާލައިފި އެވެ. ނާސާގެ އެންމެ ފަހުގެ މި ފްލެގްޝިޕް އެސްޓްރޮނޮމިކަލް އޮބްޒަވޭޓަރީ ފޮނުވާލާފައިވަނީ އެސްޓްރޯފިޒިކްސް އަދި ކޮސްމޮލޮޖީގެ އެންމެ ބޮޑެތި ހޯދުންތައް ހޯދުމަށާއި، އެހެން ތަރިތަކުގެ ވަށައިގެންވާ ޕްލެނެޓްތައް ދެނެގަތުމަށާއި، "ޑާކް އެނާޖީ" ނުވަތަ ކާއިނާތުގެ އަނދިރި ހަކަތަ ދިރާސާކުރުމަށެވެ.

އީލޮން މަސްކްގެ އެއިރޯސްޕޭސް ކުންފުނި، ސްޕޭސް އެކްސްގެ "ފެލްކަން ހެވީ" ރޮކެޓެއްގައި މި ޓެލެސްކޯޕް ފޮނުވާލާފައިވަނީ އާދީއްތަ ދުވަހުގެ ފަތިހުގެ ވަގުތެއްގައި އެމެރިކާގެ ފްލޮރިޑާގައި ހުންނަ ނާސާގެ ކެނެޑީ ސްޕޭސް ސެންޓަރުންނެވެ.

މި ރޮކެޓް މިހާރު ދަތުރުކުރަމުންދަނީ ދުނިޔެއާ 1.6 މިލިއަން ކިލޯމީޓަރު (1 މިލިއަން މޭލު) ދުރުގައިވާ "ލެގްރާންޖް ޕޮއިންޓް 2" އާ ދިމާލަށެވެ. މިއީ ވެބް ސްޕޭސް ޓެލެސްކޯޕްވެސް މިހާރު ހުރި، އިރުގެ ވަށައިގެންވާ އޯބިޓުގައިވާ ނާސާގެ މުހިންމު މަގާމެކެވެ. އެ ސަރަހައްދަށް ދިއުމަށް ތިން މަހަށްވުރެ ގިނަ ދުވަސް ނަގާނެ އެވެ. މި މިޝަން ފަސް އަހަރު ދުވަހަށް ރޭވިފައިވީ ނަމަވެސް، މިއީ ތެޔޮ އެޅޭގޮތަށް ފަރުމާކޮށްފައިވާ ޓެލެސްކޯޕަކަށް ވާތީ، އިތުރު ފަސް އަހަރަށް ބޭނުންކުރެވޭނެ ތެޔޮ އޭގައި ހުންނާނެ ކަމަށް ނާސާއިން ބުނެ އެވެ. އަދި ކުރިއަށް އޮތް ދިހަ އަހަރު ތެރޭގައި ރޮބޮޓިކް ޓޭންކަރެއްގެ އެހީގައި ތެޔޮ އެޅިއްޖެނަމަ، ރޯމަން ޓެލެސްކޯޕްގެ އުމުރު އިތުރަށް ދިގުދެންމިދާނެ އެވެ.

ޒަމާނީ މި ޓެލެސްކޯޕް ފަރުމާކޮށްފައިވަނީ ކާއިނާތުގެ ސިއްރުތައް ހޯދުމަށާއި، މީގެ ކުރިން ތަޖުރިބާނުކުރެވޭ މިންވަރަށް ގްރެވިޓީ ނުވަތަ ދަމާބާރު ޓެސްޓުކުރުމަށެވެ. މީގެ އިތުރުން، ދުނިޔޭގެ ސޯލާ ސިސްޓަމުން ބޭރުގައިވާ "އެކްސޯޕްލެނެޓްސް" ހޯދުމަށްވެސް މިއީ މުހިންމު ވަސީލަތެކެވެ. މި ޓެލެސްކޯޕްގެ އެހީގައި އެތައް ހާސް އާ ޕްލެނެޓްތަކެއް ފެންނާނެ ކަމަށާއި، ދުނިޔޭގެ ސޯލާ ސިސްޓަމާ އެއްގޮތް ޕްލެނެޓްތަކުގެ ތަފާސްހިސާބުތައް ފުރަތަމަ ފަހަރަށް ލިބޭނެ ކަމަށް ބެލެވެ އެވެ.

ކާއިނާތުގެ ބޮޑު ބައެއް ހިއްސާކުރާ، ނަމަވެސް ލޮލަށް ނުފެންނަ "ޑާކް މެޓަރ" އާއި "ޑާކް އެނާޖީ" އަށް ރޯމަން ޓެލެސްކޯޕްގެ ސަބަބުން އަލިކަމެއް ލިބޭނެ ކަމަށް އެސްޓްރޮނޮމަރުން އުންމީދު ކުރެ އެވެ. ކާއިނާތުގައި ހިމެނެނީ އާދައިގެ މާއްދާތަކުގެ (ތަރިތަކާއި، ޕްލެނެޓްތަކާއި، ގޭހާއި، ހިރަފުސް ފަދަ ތަކެތި) އިތުރުން ޑާކް މެޓަރ އާއި ޑާކް އެނާޖީ އެވެ. އާދައިގެ މާއްދާތަކަކީ މުޅި ކާއިނާތުގެ އެންމެ 5 އިންސައްތަ އެވެ. ތަރިތަކާއި ގެލެކްސީތަކަށް ކުރާ ގްރެވިޓީގެ އަސަރުން އެނގޭ ޑާކް މެޓަރ އަކީ ގާތްގަނޑަކަށް 27 އިންސައްތައެވެ. އަދި ޑާކް އެނާޖީއަކީ ގާތްގަނޑަކަށް 68 އިންސައްތަ އެވެ.

އެއް އަހަރަށްވުރެ ގިނަ ދުވަހަށް ދެމިގެންދާ މި ޓެލެސްކޯޕްގެ މައިގަނޑު ދިރާސާގައި 2 ބިލިއަނަށްވުރެ ގިނަ ގެލެކްސީ ބަލާނެ އެވެ. ރޯމަން ޓެލެސްކޯޕުން އެއްކުރާ ގެލެކްސީތަކުގެ މައުލޫމާތުގެ އެހީގައި، ކާއިނާތުގައިވާ ނޭނގޭ ބާރުތަކުގެ ސަބަބުން ކާއިނާތު ފުޅާވަމުންދާ ބާރުމިން ދެނެގަތުމަށް ސައިންސްވެރިންނަށް ފަސޭހަވެގެންދާނެ އެވެ.

ނާސާގެ ސައިންސް މިޝަން ޑައިރެކްޓަރޭޓްގެ ވެރިޔާ ނިކީ ފޮކްސް ވިދާޅުވި ގޮތުގައި، މި ޓެލެސްކޯޕުން އެތައް ހާސް ސުޕަނޯވާތަކަކާއި، އެތައް ހާސް ޕްލެނެޓްތަކެއްގެ އިތުރުން ބިލިއަނުން ގެލެކްސީތަކާއި ތަރިތައް ހޯދާނެ އެވެ. އަދި މީގެ ފުޅާ ދާއިރާއެއް ބަލާލުމުގެ ގާބިލުކަމާއެކު، މީގެ ކުރިން ދުވަހަކުވެސް ނުކުރެވޭ ފަދަ ކަންކަން ކުރެވޭނެ ކަމަށް އޭނާ ވިދާޅުވި އެވެ.

ރޮކެޓް ފޮނުވާލިތާ ކުޑަވަގުތުކޮޅެއްގެ ތެރޭގައި، އޭގެ ދެ ބޫސްޓަރު ވަނީ ކޭޕް ކެނަވެރަލްއަށް ކާމިޔާބުކަމާއެކު ތިރިކޮށްފަ އެވެ. އޭގެ ކުޑައިރުކޮޅެއް ފަހުން، ޓެލެސްކޯޕް ރޮކެޓުން ވަކިވުމާއެކު ކޮންޓްރޯލް ރޫމުގައި ތިބި މީހުން ވަނީ އުފަލުން އަތްޖަހާފަ އެވެ.

ކަނޑައެޅިފައިވާ ތާވަލަށްވުރެ އަހަރެއްހާ ދުވަސް ކުރިން އަދި ބަޖެޓުގެ ތެރެއިން ފޮނުވާލެވުނު މި ޓެލެސްކޯޕަކީ، އަންހެނެއްގެ ނަމުން ނަން ދެވުނު ނާސާގެ ފުރަތަމަ ސްޕޭސް ޓެލެސްކޯޕެވެ. މިއީ ނާސާގެ ފުރަތަމަ ޗީފް އެސްޓްރޮނޮމަރު، މިހާރު ދުނިޔެ ދޫކޮށްފައިވާ ނޭންސީ ގްރޭސް ރޯމަންގެ ނަމުން ނަން ދެވިފައިވާ ޓެލެސްކޯޕެކެވެ.

ނާސާގެ ރިޓަޔާޑް ސައިންސްވެރިއެއް ކަމަށްވާ އެޑް ވައިލާ ވިދާޅުވީ، މިއީ މާ ކުރިންވެސް ދޭންޖެހޭ ޝަރަފެއް ކަމަށެވެ. 1978 ވަނަ އަހަރު އޭނާ ވަޒީފާއަށް ނެރުނު ރޯމަންއަށް އޭނާ ވަނީ "މަދަރ އޮފް ހަބްލް" ގެ ނަމުން ނަން ދީފަ އެވެ. 1959 ވަނަ އަހަރު ނާސާއާ ގުޅުމަށްފަހު، ދުނިޔޭގެ އެޓްމޮސްފިއަރުން ބޭރުގައި ހުންނަ އޮބްޒަވޭޓަރީތަކުން މާ ދުރަށް އަދި މާ ސާފުކޮށް ފެންނާނެ ކަމަށް އޭނާ ވަނީ ބުނެފަ އެވެ. އޭނާ މަރުވީ 2018 ވަނަ އަހަރު، އުމުރުން 93 އަހަރުގަ އެވެ.

ހަބްލް، ވެބް އަދި ރޯމަން - މި ތިން ޓެލެސްކޯޕް އެކުވެގެން މަސައްކަތްކުރުން

ރޯމަން ޓެލެސްކޯޕަށް ފެންނަ ދާއިރާ، ނާސާގެ ހަބްލް ސްޕޭސް ޓެލެސްކޯޕަށްވުރެ 100 ގުނަ ފުޅަލެވެ. ހަބްލް އަކީ ވޭތުވެދިޔަ 36 އަހަރު ވަންދެން ފަޒާގެ ހިތްގައިމު މަންޒަރުތައް ދައްކައިދެމުންދާ ޓެލެސްކޯޕެކެވެ.

ފްލޮރިޑާގެ ކޭޕް ކެނަވެރަލްގައި ހުންނަ ކެނެޑީ ސްޕޭސް ސެންޓަރުން، 2026 ވަނަ އަހަރުގެ އޯގަސްޓް މަހުގެ 30 ވަނަ ދުވަހު، ނާސާގެ "ނޭންސީ ގްރޭސް ރޯމަން ސްޕޭސް ޓެލެސްކޯޕް" ހިފައިގެން ސްޕޭސް އެކްސްގެ ފެލްކަން ހެވީ ރޮކެޓެއް ޖައްވަށް އުދުއްސާލަނީ | ރޮއިޓާސް

2021 ވަނަ އަހަރު ފޮނުވާލި ޖޭމްސް ވެބް ސްޕޭސް ޓެލެސްކޯޕަކީ ކާއިނާތުގެ ވަރަށް ދުރަށް ބަލައި، "ބިގް ބޭންގް" އާ ގާތްކުރާ ދުވަސްވަރުގެ މައުލޫމާތު އެއްކުރާ ޓެލެސްކޯޕެކެވެ. ވެބްގެ ސަބަބުން ކުރީގެ ކާއިނާތާ ބެހޭ ގޮތުން ސައިންސްވެރިންގެ ވިސްނުން ވަނީ ބަދަލުވެފަ އެވެ. އަލީގެ ދުވެލީގެ ސަބަބުން، ވަރަށް ދުރަށް ބެލުމަކީ މާޒީއަށް ބެލުން ފަދަ ކަމެކެވެ. ވެބްގެ ހޯދުންތަކުން އެނގުނު ގޮތުގައި، އެންމެ ކުރީގެ ގެލެކްސީތައް އުފެދިފައިވަނީ ސައިންސްވެރިން ކުރިން ހީކުރި ވަރަށްވުރެ މާ ކުރިންނެވެ.

ނާސާއިން ރޯމަން ޓެލެސްކޯޕް ސިފަކުރަނީ ކެމެރާއެއްގެ "ވައިޑް އެންގަލް ލެންސް" އެއްގެ ގޮތުގަ އެވެ. އަދި ވެބް ޓެލެސްކޯޕަކީ "ޒޫމް ލެންސް" އެއްގެ ގޮތުގަ އެވެ.

ފަޒާގައިވާ މި ތިން ބާރުގަދަ ޓެލެސްކޯޕްގެ އިތުރުން، ޔޫރަޕިއަން ސްޕޭސް އެޖެންސީގެ "ޔޫކްލިޑް" އާއި ޗިލީގައި ހުންނަ "ވޭރާ ސީ ރޫބިން އޮބްޒަވޭޓަރީ" ގުޅިގެން ކާއިނާތުގެ ބޮޑެތި ސިއްރުތައް ހޯދުމަށް މަސައްކަތް ކުރާނެ އެވެ.

"ރޯމަންގެ ސާފުކަމާއި ފެންނަ މިންވަރު ހަބްލްއާ އެއްވަރު، އެކަމަކު އަޅުގަނޑުމެންނަށް މާ އަވަހަށް އުޑުމަތި ބަލާލެވޭނެ،" ނާސާގެ ގޮޑާޑް ސްޕޭސް ފްލައިޓް ސެންޓަރުގެ ސީނިއާ ސައިންސްވެރިޔާ ޖޫލީ މެކްއެނެރީ ވިދާޅުވި އެވެ. އޭނާ އިތުރަށް ވިދާޅުވީ، ހަބްލް އިން ގަރުނަކުން ކުރާނެ މަސައްކަތް ރޯމަން އިން އެންމެ މަހަކުން ނިންމާލާނެ ކަމަށެވެ.

އަލަށް ހޯދާ ގެލެކްސީތަކުގެ ތެރޭގައި ޕްލެނެޓްތައް ހިމެނޭ ތަރިތައް ހުންނާނެ އެވެ. ރޯމަން އިން މި އާ ދުނިޔެތައް ހޯދުމުން، ވެބް ޓެލެސްކޯޕް ބޭނުންކޮށްގެން އެ ތަންތަނުގެ ތަފްސީލުތައް ދިރާސާކުރާނެ އެވެ.

"ވެބް ފަރުމާކޮށްފައިވަނީ ކާއިނާތުގެ ވަރަށް ފުންމިނަށް ބަލައި، މަދުން ނޫނީ ނުފެންނަ ކަންކަން ހޯދުމަށް. ރޯމަން އިން އެ ފޯރުކޮށްދެނީ ވެބްގެ ފުން ބެލުމަށް ބޭނުންވާ ފުޅާ މަންޒަރު،" މެކްއެނެރީ ވިދާޅުވި އެވެ.

އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުގެ ފުރަތަމަ ދައުރާއި ދެވަނަ ދައުރުގައިވެސް، ނޭންސީ ގްރޭސް ރޯމަން ސްޕޭސް ޓެލެސްކޯޕްގެ މަޝްރޫއު ހުއްޓާލުމަށް ނުވަތަ ބަޖެޓު ވަރަށް ބޮޑަށް ކުޑަކުރުމަށް ތަކުރާރުކޮށް މަސައްކަތް ކުރި އެވެ. ނަމަވެސް ކޮންގްރެސްއިން ވަނީ ކޮންމެ ފަހަރަކުވެސް މި މަޝްރޫއުގެ ބަޖެޓު ހިމާޔަތްކޮށްދީފަ އެވެ.