މިހާތަނަށް ނަގާފައިވާ އިރުގެ އެންމެ ސާފު މަންޒަރުތައް އާންމުކޮށްފި

އިރުގެ މެގްނެޓިކް ސިއްރުތައް ހާމަކޮށްދޭ، މިހާތަނަށް ނަގާފައިވާ އެންމެ ސާފު ފޮޓޯތައް އާންމުކޮށްފި އެވެ.

ދުނިޔޭގައި މިހާތަނަށް ބޭނުންކުރާ އެންމެ ބާރުގަދަ ސޯލާ ޓެލެސްކޯޕް ބޭނުންކޮށްގެން، އިރުގެ ބޭރު ފަށަލައިގެ ނުވަތަ ފެންނަން އޮންނަ ސަތަހައިގެ އެންމެ މަތީ ރިޒޮލިއުޝަންގެ ފޮޓޯތަކެއް ނަގައި، އިރުގެ ހަރަކާތްތައް ކޮންޓްރޯލްކުރާ ވަރުގަދަ ސިއްރުތަކެއް ސައިންސްވެރިން ވަނީ ހޯދާފަ އެވެ.

ސައިންސްވެރިން މި ދިރާސާ ކުރުމަށް ބޭނުންކޮށްފައިވަނީ ހަވާއީގެ މައުއީގައި ހުންނަ ހަލެއަކަލާ އަލިފާން ފަރުބަދަ ކައިރީގައި ހުންނަ ނޭޝަނަލް ސައިންސް ފައުންޑޭޝަންގެ "ޑެނިއަލް ކޭ އިނޫޔޭ ސޯލާ ޓެލެސްކޯޕް" އެވެ. މި ޓެލެސްކޯޕްގެ އެހީގައި ސައިންސްވެރިން ވަނީ އިރުގެ ލައްތައް ނުވަތަ "ސަންސްޕޮޓްސް" ތަކުގެ ކައިރީގައިވާ މެގްނެޓިކް ގޮތުން އެންމެ ހަރަކާތްތެރި ސަރަހައްދުތައް ވަރަށް ގާތުން ބަލާފަ އެވެ. އިރުގެ މި ލައްތަކަކީ އިރުގެ ހަރަކާތްތައް އެންމެ ވަރުގަދަ ސަރަހައްދުތައް ކަމަށް ބެލެވެ އެވެ.

މި ފޮޓޯތަކާއި ޓައިމް-ލެޕްސް ވީޑިއޯތަކުން އިރުގެ "ފޮޓޯސްފިއާ" ނުވަތަ އިރުގެ ފެންނަން އޮންނަ ސަތަހައިގެ އާދަޔާ ހިލާފު މަންޒަރުތަކެއް ފެނިގެންދެ އެވެ. މިއީ މެގްނެޓިކް ފީލްޑްތަކާއި ޕްލާޒްމާގެ އޮއިވަރުތަކުން އުފެދިފައިވާ، އިރުގެ ޖައްވުގެ ތުނި ފަށަލައެކެވެ.

މި ތަފްސީލީ ފޮޓޯތަކާއި ކޮމްޕިއުޓަރު ސިމިއުލޭޝަންތައް އެއްކޮށްލައިގެން ކުރި ދިރާސާތަކުން، ސޯލާ ފިޒިކްސްގެ ދާއިރާއިން ސައިންސްވެރިން ވަނީ ބޮޑު ކުރިއެރުމެއް ހޯދާފަ އެވެ. އެގޮތުން އިރުގެ ސަތަހައިގައި އުފެދޭ ކުދިކުދި ބުރުޖެހުންތައް ނުވަތަ "ވާލްޕޫލް" ތަކުގެ ނިޝާންތައް ދެނެގަނެވިފައިވާއިރު، މިއީ ދުނިޔޭގެ ދިރުންތަކަށް ސީދާ އަސަރު ފޯރުވާ ކަމެއްކަން ވަނީ ހާމަވެފަ އެވެ.

"ކެލްވިން-ހެލްމްހޯލްޓްޒް އިންސްޓެބިލިޓީ" (ކޭ.އެޗް.އައި) ގެ ނަމުން ނަންދެވިފައިވާ މި ބުރު ހިނގާ ބައްޓަންތަކުގެ ސަބަބުން، އިރުގެ ބޭރު ޖައްވު ނުވަތަ "ކޮރޯނާ"، އިރުގެ ސަތަހައަށްވުރެ މާ ބޮޑަށް ހޫނުގަދަވާން މެދުވެރިވާ ސަބަބު ފަދަ ސައިންސްވެރިންނަށް ހައްލުނުވެފައިވާ ގިނަ ސިއްރުތަކަކަށް ޖަވާބު ލިބިގެންދާނެ އެވެ.

މީގެ އިތުރުން، މި ބުރުޖެހުންތަކުގެ ސަބަބުން އިރުގެ މެގްނެޓިކް ހަކަތަ އިތުރުވެ، "ސޯލާ ފްލެއާސް" އާއި "ކޮރޯނަލް މާސް އިޖެކްޝަންސް" އުފެދުމަށް މަގުފަހިވެ އެވެ. އިރުގެ މިފަދަ ހަރަކާތްތައް ދުނިޔެއާ ދިމާލަށް އައުމުން، އޭގެ ސަބަބުން ސެޓެލައިޓްތަކާއި، ކަރަންޓުވިއުގަތަކާއި، މުވާސަލާތީ ވަސީލަތްތަކަށް ބޮޑެތި ބުރޫތަކެއް އަރަ އެވެ.

ބުދަ ދުވަހު "ނޭޗަރ" ޖާނަލްގައި ޝާއިއުކޮށްފައިވާ މި ހޯދުންތަކުގެ ސަބަބުން، ލަފާކުރަން ދަތި އިރުގެ ހަރަކާތްތައް ދެނެގަތުމަށް ސައިންސްވެރިންނަށް ބޮޑު އެހީއަކަށް ވާނެ އެވެ.

ކޮލޮރާޑޯގެ ބޯލްޑާގައި ހުންނަ ނޭޝަނަލް ސޯލާ އޮބްޒަވޭޓަރީގެ އެސިސްޓަންޓް އެސްޓްރޮނޮމަރ، ޑރ. ޑޭވިޑް ކުރިޑްޒޭ ސީއެންއެން އަށް ވިދާޅުވީ، އިރުގެ ފޮޓޯސްފިއާގައި "ކެލްވިން-ހެލްމްހޯލްޓްޒް އިންސްޓެބިލިޓީ" އުފެދިދާނެ ކަމަށް ތިއަރީތަކުން ދެއްކި ނަމަވެސް، އިރުގެ މުޅި ސަތަހައިގައި މިފަދަ ބައްޓަންތައް ފެތުރިފައި ހުރިތަން ފެނުމުން ވަރަށް ބޮޑު ހައިރާންކަމެއް ލިބުނު ކަމަށެވެ. އަދި އިރުގެ ސަތަހައިގައި މިފަދަ ބުރުޖެހުންތައް އުފެދޭ ގޮތަކީ ސޯލާ ފިޒިކްސްގައި ޒަމާނުއްސުރެ އޮތް ބޮޑު ސުވާލެއް ކަމަށާއި، ފުރަތަމަ ފަހަރަށް މިކަން އުފެދޭ ގޮތާއި އޭގެ ފަހަތުގައިވާ ސަބަބުތައް ދެނެގަނެވިފައިވާ ކަމަށް އޭނާ ވިދާޅުވި އެވެ.

ޑެނިއަލް ކޭ އިނޫޔޭ ސޯލާ ޓެލެސްކޯޕް ހުންނަނީ ހަވާއީގެ މައުއީގަ | އެންއެސްއެފް/އެންއެސްއޯ/އައުރާ

ހުއްޓުމެއްނެތި ބަދަލުވަމުންދާ ސަތަހައެއް

މި ދިރާސާގައިވާ ގޮތުން، "ކެލްވިން-ހެލްމްހޯލްޓްޒް އިންސްޓެބިލިޓީ" އުފެދެނީ ތަފާތު ދުވެލިތަކުގައި ދަތުރުކުރާ ދެ ދިޔާ އެއްޗެއް (ފްލުއިޑް) އެކަތި އަނެކައްޗާ ކައިރިން ހުރަސްކުރާއިރު އުފެދޭ ކުދިކުދި ބުރުޖެހުންތަކުގެ ސަބަބުންނެވެ.

ސައިންސްވެރިންނަށް މީގެ ކުރިން މިފަދަ ބުރުޖަހާ ބައްޓަންތައް ކަނޑާއި ފަރުތަކުގެ ރާޅުތަކުންނާއި، ވިލާ އުފެދޭ ގޮތުންނާއި، އަދި ޖުޕިޓަރާއި ސެޓާން ފަދަ ބޮޑެތި ގޭސް ޕްލެނެޓްތަކުގެ ޖައްވުން ފެނިފައިވެ އެވެ.

ސައިންސްވެރިން ގަބޫލުކުރާ ގޮތުގައި އިރުގެ މެގްނެޓިކް ހަކަތަ ރައްކާކުރެވެނީ "ފްލަކްސް ބްރެއިޑިންގް" މެދުވެރިކޮށެވެ. އެއީ މެގްނެޓިކް ފީލްޑްގެ ރޮނގުތައް އެކަތި އަނެކައްޗާ އޮޅިގެން ދިއުމެވެ. މިގޮތަށް އޮޅި ބާރުވުމުން، އެ މެގްނެޓިކް ފީލްޑްތައް ވަކިވެ، އަލުން ގުޅޭ ވަގުތު ބޮޑު ހަކަތައެއް ބޭރުވެ އެވެ. ނަމަވެސް، މިގޮތަށް އޮޅޭ ބައްޓަންތައް އެންމެ ފުރަތަމަ އުފެދެން މެދުވެރިވާ ސަބަބެއް ސައިންސްވެރިންނަށް މީގެ ކުރިން ސާފެއް ނުވެ އެވެ. އެހެންނަމަވެސް، އަލަށް ފެނުނު މި މަންޒަރުތަކުން އެކަމަށް އެކަށީގެންވާ ޖަވާބެއް މިވަނީ ލިބިފަ އެވެ.