ހަނދަށް ނަން ފޮނުވުމުގެ ފުރުސަތު ނާސާ އިން އާއްމުކޮށް ހުޅުވާލައިފި

ނާސާގެ އާޓެމިސް 2 މިޝަނުގައި ހަނދަށް ނަން ފޮނުވުމުގެ ފުރުސަތު އާންމުންނަށް ހުޅުވާލައިފި އެވެ.

ނާސާގެ މާޝަލް ސްޕޭސް ފްލައިޓް ސެންޓަރުން ވަނީ "ސެންޑް ޔޯ ނޭމް" (SendYourName#) ކެމްޕޭންގެ ދަށުން، އާންމުންގެ ނަންތައް ހަނދަށް ފޮނުވުމުގެ އާދަޔާ ޚިލާފު ފުރުސަތެއް ހުޅުވާލާފަ އެވެ. މި ހަރަކާތުގެ ދަށުން ހުށަހަޅާ ނަންތައް ރައްކާކުރެވޭނީ ކުރިއަށް އޮތް އާޓެމިސް 2 މިޝަނުގައި ބޭނުންކުރާ "އޯރިއޯން" އުޅަނދުގައި ހަރުކުރެވޭ ހާއްސަ އެސްޑީ  ކާޑެއްގައި ކަމަށް ބުނެފައިވެ އެވެ.

ނާސާ އިން ކުރި ޓުވީޓެއްގައި މިކަމަށް ޝައުގުވެރިވާ ފަރާތްތަކަށް ބައިވެރިވުމަށް ދައުވަތު ދީފައިވާއިރު، އާއިލާގެ މެންބަރުންނާއި، ކުޑަކުދިން އަދި ގޭގައި ގެންގުޅޭ ޖަނަވާރުތަކަށް ވެސް މި ދަތުރުގެ ރަމްޒީ "ބޯޑިންގ ޕާސް" ހޯދުމުގެ ފުރުސަތު ވަނީ ފަހިކޮށްދީފަ އެވެ.

މި ހަރަކާތުގައި ބައިވެރިވުމަށް އެދޭ ފަރާތްތަކަށް ނާސާގެ ރަސްމީ ޕޯޓަލް https://go.nasa.gov/49NQ4mf މެދުވެރިކޮށް ނަން ހުށަހެޅުމުގެ އިންތިޒާމް މިހާރު ވަނީ ހަމަޖައްސާފަ އެވެ.