ނާސާއިން އިސްރޯ އަށް މޫން ބޭސް ޕްރޮގްރާމުގައި ބައިވެރިވުމަށް ދައުވަތު ދީފި

އެމެރިކާގެ ޖަޒީރާ އެޖެންސީ ނާސާ އިން، ހަނދުގެ ދެކުނު ތަނޑީގެ ކައިރީގައި ދާއިމީ ބޭސެއް ގާއިމު ކުރުމަށް ކުރާ މަސައްކަތުގައި ބައިވެރިވުމަށް އިންޑިއާގެ ޖައްވީ އިދާރާ އިސްރޯ އަށް ރަސްމީކޮށް ދައުވަތު ދީފި އެވެ.

މިއީ ދެ ގައުމުގެ ދެމެދުގައި އޮތް ޖައްވީ ގުޅުން އިތުރަށް ބަދަހިވެގެން ދިޔަ މުހިންމު ފިޔަވަޅެކެވެ.

މި ދައުވަތު ދީފައިވަނީ އިންޑިއާގެ ބެންގަލޫރުގައި ހުންނަ އިސްރޯގެ ހެޑްކުއާޓަރުގައި ބޭއްވި ޔޫއެސް-އިންޑިއާ ސިވިލް ސްޕޭސް ޖޮއިންޓް ވާކިން ގުރޫޕުގެ ނުވަ ވަނަ ބައްދަލުވުމުގައި އެވެ.

ނާސާ އިން ސޯޝަލް މީޑިއާގައި ހިއްސާކުރި މެސެޖެއްގައި ބުނެފައިވަނީ، ސައިންސާއި ޓެކްނޮލޮޖީގެ ދާއިރާ އިން ދެ ޤައުމުގެ ދެމެދުގައި އޮތް ކާމިޔާބު ގުޅުމުގެ މައްޗަށް ބިނާކޮށް، މޫން ބޭސް ޕްރޮގްރާމުގައި އިސްރޯ އިން ބައިވެރިވުމަށް ދެވޭ ދައުވަތު އައުކުރާ ކަމަށެވެ. އަދި އެމެރިކާ އިން ހަނދަށް އެނބުރި ދަނީ ދާއިމީކޮށް ތިބުމަށް ކަމަށާއި، މި ކަމުގައި ބައިވެރިންނާއެކު ކުރިއަށް ދާނެ ކަމަށް ވެސް ނާސާ އިން ބުނެފައިވެ އެވެ.

ނާސާގެ އާޓެމިސް ޕްރޮގްރާމުގެ ދަށުން، ކުރިއަށް އޮތް ދިހަވަރަކަށް އަހަރު ތެރޭގައި ހަނދުގެ ދެކުނު ތަނޑީގައި ސިޓީއެއްގެ ސިފަޔަށް ބޮޑު ބޭސެއް ބިނާ ކުރުމަށް ވަނީ ރޭވިފައި އެވެ. އެ ސަރަހައްދުގައި ގިނަ އަދަދަކަށް ފެން، ގަނޑު ފެނުގެ ގޮތުގައި ހުންނާނެ ކަމަށް ބެލެވޭތީ، މިއީ ސައިންސްވެރިންގެ ބޮޑު ޝައުގުވެރިކަމެއް އޮތް ސަރަހައްދެކެވެ.

އިންޑިއާ އިން ވަނީ 2023 ވަނަ އަހަރު، ހަނދާއި ޖައްވު ރައްކާތެރިކަމާއެކު ދިރާސާ ކުރުމަށް އެމެރިކާ އިން އިސްނަގައިގެން އެކުލަވާލި އާޓެމިސް އެކޯޑްސްގައި ވެސް ސޮއިކޮށްފައި އެވެ. މީގެ އިތުރުން، އިންޑިއާ އިން ވެސް ދަނީ 2040 ގެ އަހަރުތަކުގެ ތެރޭގައި ހަނދުގައި އަމިއްލަ ބޭސެއް ގާއިމު ކުރުމަށާއި އިންޑިއާގެ އެސްޓްރޮނޯޓުން ހަނދަށް ފޮނުވުމަށް އަމާޒު ހިފާފައި އެވެ.