އެމެރިކާ އާއެކު ސޮއިކުރި އެއްބަސްވުން 25 އަހަރަށް ދެމިގެން ދާނެ ކަމަށް ވެނެޒުއޭލާގެ ރައީސާ ޑެލްސީ ވިދާޅުވެއްޖެ
30 އޯގަސްޓު 2026 | އާދީއްތަ 04:16ޑެލްސީ ފާހަގަ ކުރެއްވި ގޮތުގައި، އެމެރިކާ އާއެކު މިފަދަ ދިގު މުއްދަތުގެ އެއްބަސްވުމެއް ގާއިމުކުރި ނަމަވެސް، ވެނެޒުއެލާގެ ޤުދުރަތީ ވަސީލަތްތަކުގެ މައްޗަށް އޮތް ފުރިހަމަ ބާރާއި ސިޔާދަތީ މިނިވަންކަން އެ ޤައުމުން ދަމަހައްޓާނެ. އަދި ޤައުމުގެ ވަސީލަތްތައް ބޭނުންކުރުމުގައި އެންމެ އިސްކަމެއް ދޭނީ ޤައުމީ މަސްލަހަތަށް ކަމަށް ވެސް އެކަމަނާ ވިދާޅުވި
ވެނެޒުއޭލާގެ ވަގުތީ ރައީސާ ޑެލްސީ ރޮޑްރިގޭޒް | ގެޓީ އިމޭޖަސް
އެމެރިކާ އާއެކު ޤާއިމުކޮށްފައިވާ ހަކަތައިގެ އެއްބަސްވުމުގެ ދަށުން ކުރިއަށް އޮތް 25 އަހަރު ދުވަހު ދެ ޤައުމުގެ ދެމެދުގައި މުހިންމު މަސައްކަތްތަކެއް ކުރިއަށް ދާނެ ކަމަށް ވެނެޒުއޭލާގެ ވަގުތީ ރައީސާ ޑެލްސީ ރޮޑްރިގޭޒް ވިދާޅުވެއްޖެ އެވެ.
މި އެއްބަސްވުމަކީ ވެނެޒުއޭލާގެ އިގުތިސާދީ ކުރިއެރުމަށާއި ހަކަތައިގެ ދާއިރާ ހަރުދަނާ ކުރުމަށް އެޅުނު މުހިންމު ފިޔަވަޅެއްގެ ގޮތުގައި އެކަމަނާ ވަނީ ސިފަކުރައްވާފައި އެވެ.
މި އެއްބަސްވުމާ ގުޅޭ ގޮތުން މައުލޫމާތު ދެއްވަމުން ޑެލްސީ ވިދާޅުވީ، މި މަޝްރޫއުގެ އެންމެ ބޮޑު އެއް ބޭނުމަކީ ވެނެޒުއޭލާ އިން އުފައްދާ ސާފުނުކުރާ ތެޔޮ ނުވަތަ ކްރޫޑް އޮއިލްގެ މިންވަރު އިތުރުކުރުން ކަމަށެވެ. މީގެ ސަބަބުން ދުނިޔޭގެ ބާޒާރުގައި ވެނެޒުއޭލާގެ ތެލުގެ ހިއްސާ އިތުރުވެ، ޤައުމަށް ވަންނަ އާމްދަނީ އިތުރުވުމަށް މަގުފަހިވެގެންދާނެ ކަމަށް ސަރުކާރުން އުންމީދު ކުރެ އެވެ.
މީގެ އިތުރުން ޑެލްސީ ފާހަގަ ކުރެއްވި ގޮތުގައި، އެމެރިކާ އާއެކު މިފަދަ ދިގު މުއްދަތުގެ އެއްބަސްވުމެއް ގާއިމުކުރި ނަމަވެސް، ވެނެޒުއޭލާގެ ޤުދުރަތީ ވަސީލަތްތަކުގެ މައްޗަށް އޮތް ފުރިހަމަ ބާރާއި ސިޔާދަތީ މިނިވަންކަން އެ ޤައުމުން ދަމަހައްޓާނެ އެވެ. އަދި ޤައުމުގެ ވަސީލަތްތައް ބޭނުންކުރުމުގައި އެންމެ އިސްކަމެއް ދޭނީ ޤައުމީ މަސްލަހަތަށް ކަމަށް ވެސް އެކަމަނާ ވިދާޅުވި އެވެ.
މި އެއްބަސްވުމަކީ ވެނެޒުއޭލާގެ ހަކަތައިގެ ސިނާއަތަށް އިންޤިލާބީ ބަދަލުތަކެއް އަންނާނެ ކަމެއް ކަމަށް ތަޖުރިބާކާރުން ދެކެ އެވެ. ޚާއްސަކޮށް ބައިނަލްއަޤުވާމީ މައިދާނުގައި ކުރިމަތިވެފައިވާ ގޮންޖެހުންތަކާއެކު ވެސް، އެމެރިކާ ފަދަ ބޮޑު ބާރަކާ އެކު 25 އަހަރުގެ ދިގު މުއްދަތަކަށް މިފަދަ އެއްބަސްވުމެއްގައި ސޮއި ކުރުމަކީ ވެނެޒުއޭލާގެ ތެލުގެ ސިނާއަތަށް އިންވެސްޓަރުންގެ އިތުބާރު ލިބިގެންދާނެ ކަމެކެވެ.
ވެނެޒުއޭލާ ސަރުކާރުން ހާމަކޮށްފައިވާ ގޮތުގައި، މި އެއްބަސްވުމުގެ ދަށުން ކުރިއަށްގެންދާ މަސައްކަތްތަކުގެ ސަބަބުން ކުރިއަށް އޮތް އަހަރުތަކުގައި އެ ޤައުމުގެ ތެޔޮ އުފައްދާ މިންވަރު މިހާރަށް ވުރެ ބޮޑު ތަނުން އިތުރުވެގެންދާނެ އެވެ. މިއީ ޤައުމުގެ އިގުތިސާދު އަލުން ކޮޅަށް ޖެހުމަށް ކުރަމުންދާ މަސައްކަތުގެ ދަށުން ނިންމި ވަރަށް މުހިންމު ނިންމުމެއް ކަމަށް ވެސް ޑެލްސީ ވަނީ ވިދާޅުވެފައި އެވެ.
މަސްދަރު: އަލް ޖަޒީރާ
