ބަޔޮލޮޖިކަލް ގޮތުން އެއްވެސް ގުޅުމެއް ނެތް ދެ ކުދިން އޮސްޓްރޭލިއާގައި އަންހެނަކު އެއްމާބަނޑު ކުދިންގެ ގޮތުގައި ވިހައިފި
28 އޯގަސްޓު 2026 | ހުކުރު 17:19އޮސްޓްރޭލިއާގެ ސަރޮގޭޓް މަންމައަކު އެހެން ދެމަފިރިއެއްގެ ދަރިއަކަށް ބަނޑުބޮޑުވި ފަހުން، ގުދުރަތީ ގޮތުން އޭނާގެ އަމިއްލަ ދަރިއަކަށް ވެސް ބަނޑުބޮޑުވެ، އެއްމާބަނޑު ދެ ކުދިންގެ ގޮތުގައި ވިހޭ މައްސަލައެއް ފެންމަތިވެއްޖެ. މި ދެ ކުދިންގެ މެދުގައި ބަޔޮލޮޖިކަލް ގުޅުމެއް ނެތުމުން، ކޯޓުން ނިންމީ އެއީ ގާނޫނީ ގޮތުން އެއްބަނޑުއެއްފާ ކުދިން ނޫން ކަމަށާއި، އެހެންކަމުން ދެ އާއިލާއަށް އެ ކުދިން ވަކިން ބަލާބޮޑުކުރެވޭނެ ކަމަށް. މިއީ ސަރޮގޭސީގެ ތާރީޚުގައި ވަރަށް މަދުން ނޫނީ ދިމާނުވާ ތަފާތު ހާދިސާއެއް
އެއް މާބަނޑު ދެބެންގެ ފޮޓޯ އެއް | ގެޓީ އިމޭޖަސް
ބަޔޮލޮޖިކަލް ގޮތުން އެއްވެސް ގުޅުމެއް ނެތް ދެ ކުދިން އޮސްޓްރޭލިއާގައި އަންހެނަކު އެއްމާބަނޑު ކުދިންގެ ގޮތުގައި ވިހައިފި އެވެ.
ކުއީންސްލޭންޑަށް ނިސްބަތްވާ މި އަންހެން މީހާއަކީ އެހެން ދެމަފިރިއަކަށް ދަރިއަކު ހޯދައިދިނުމަށް "ސަރޮގޭޓް" މަންމައެއްގެ ގޮތުގައި މަސައްކަތް ކުރި މީހެކެވެ. އޭނާ މިދިޔަ ނޮވެމްބަރު މަހު ވިހާފައިވަނީ ފިރިހެން ކުއްޖަކާއި އަންހެން ކުއްޖެކެވެ.
މި އަންހެން މީހާ ބަނޑުބޮޑުވީ، އެހެން ދެމަފިރިއެއްގެ ދަރިމައިވުމުގެ ފަރުވާގެ ތެރެއިން އެ މީހުންގެ އެމްބްރިއޯ އޭނާގެ ރަހިމުގައި އިންދާފައި ވަނިކޮށް، އޭނާގެ ފިރިމީހާ އަށް ބަނޑުބޮޑުވުމާ ގުޅިގެންނެވެ.
ސްކޭންތަކުން އެ އަންހެން މީހާގެ ބަނޑުގައި އެއްމާބަނޑު ދެ ކުދިން ތިބިކަން އެނގުނު ނަމަވެސް، ޑީއެންއޭ ޓެސްޓުތަކުން ދެއްކި ގޮތުގައި ފިރިހެން ކުއްޖާއަކީ އެ އަންހެން މީހާއާއި އޭނާގެ ފިރިމީހާގެ ބަޔޮލޮޖިކަލް ދަރިއެކެވެ. އަދި އަންހެން ކުއްޖާއަކީ އެމްބްރިއޯ ހަދިޔާކުރި އަނެއް ދެމަފިރިންގެ ޖެނެޓިކް ދަރިއެކެވެ.
މިއީ ވަރަށް މަދުން ނޫނީ ދިމާނުވާ ހާދިސާއަކަށް ވުމުން، ކުއީންސްލޭންޑްގެ ސަރޮގޭސީ ގާނޫނުތަކުގައި މިފަދަ ކަމަކަށް ރިއާޔަތްކޮށްފައެއް ނުވެ އެވެ. އެ ގާނޫނު ބުނާގޮތުން އެއްމާބަނޑުކޮށް އުފަންވާ ކުދިން ނުވަތަ "ބާތު ސިބްލިންގްސް" ވަކިކުރުމަކީ މަނާކަމެކެވެ.
މި ދެ ކުދިން އުފަންވިތާ ނުވަ މަސް ވެފައިވާއިރު، ދެމަފިރިން ވެސް އަންނަނީ އެ މީހުންގެ އަމިއްލަ ބަޔޮލޮޖިކަލް ދަރިން ވަކިން ބަލާބޮޑުކުރަމުންނެވެ. އަދި ދަރިންގެ ބެލެނިވެރިކަމާ މެދު ދެމަފިރިންގެ މެދުގައި އެއްވެސް މައްސަލައެއް ޖެހިފައެއް ނުވެ އެވެ.
ނަމަވެސް، އެއްމާބަނޑު ކުދިން ވަކިކުރުން މަނާކުރާ ގާނޫނުގެ ސަބަބުން، މި އާދަޔާ ހިލާފު މައްސަލަ ކުއީންސްލޭންޑްގެ ޗިލްޑްރަންސް ކޯޓަށް ހުށަހަޅަން ޖެހުނެވެ.
މި މައްސަލަ ކޯޓަށް ހުށަހަޅަން ޖެހުނީ، ސަރޮގޭޓް މަންމައާއި އޭނާގެ ފިރިމީހާ، އެ މީހުންގެ އަމިއްލަ ދަރިފުޅުގެ ގާނޫނީ ބެލެނިވެރިކަން ހޯދުމަށް "ޕޭރެންޓޭޖް އޯޑަރެއް" ހޯދަން ޖެހުމުންނެވެ. މިކަމަށް އަނެއް ދެމަފިރިން އިއުތިރާޒެއް ކޮށްފައެއް ނުވެ އެވެ.
މި މައްސަލަ ބެއްލެވި ފަނޑިޔާރު ޖޯޑީ ވޫލްޑްރިޖް ނިންމެވީ، މި ހާލަތަކީ ވަރަށް ތަފާތު ހާލަތެއް ކަމަށާއި، ގާނޫނީ ގޮތުން މި ދެ ކުދިންނަކީ "ބާތު ސިބްލިންގްސް" ނުވަތަ އެއްބަނޑުއެއްފާ ކުދިން ނޫން ކަމަށެވެ. ފަނޑިޔާރު މި ކުދިން ސިފަކުރެއްވީ "ޖެސްޓޭޝަނަލް ޓްވިންސް" ނުވަތަ އެއް ރަހިމެއްގައި އެކުގައި ބޮޑުވި ދެ ކުދިންގެ ގޮތުގަ އެވެ.
ފަނޑިޔާރުގެ ހުކުމުގައި ވިދާޅުވެފައިވަނީ، ކުދިން ބޮޑުވަމުން އަންނަ ގޮތް ބިނާވެގެންވަނީ އެ ކުދިންނަށް ލިބޭ އަޅާލުމާއި، އާއިލީ ގުޅުމާއި، އެ ކުދިންގެ އަސްލާ މެދު އޮންނަ ތެދުވެރިކަމުގެ މައްޗަށް ކަމަށް ހެކިތަކުން ބާރުދޭ ކަމަށެވެ.
އެހެންކަމުން، އުފަންވީއްސުރެ މި ދެ ކުދިން ވަކިން ބޮޑުވުމުގެ ސަބަބުން، އެ ކުދިންގެ ނަފްސާނީ ދުޅަހެޔޮކަމަށް ގެއްލުމެއް ލިބިދާނެ ކަމަށް ގަބޫލުނުކުރެއްވޭ ކަމަށް ފަނޑިޔާރު ވިދާޅުވި އެވެ.
މި ދެ އާއިލާގެ މެދުގައި ސަރޮގޭސީގެ އެއްބަސްވުން ގާއިމުކުރެވުނީ ދެ ފަރާތުގެ ދަންނަ ރަހުމަތްތެރިއެއްގެ މެދުވެރިވެގެންނެވެ.
ކޯޓުގެ ރެކޯޑްތަކުން އެނގޭ ގޮތުގައި، ބީއެންޖޭ އަދި ބީއާރްޖޭގެ ނަމުން ނަންދީފައިވާ ދެމަފިރިންނަށް ދަރިން ނުލިބެނީ، ބީއެންޖޭ އުފަންވީއިރު ރަހިމު ނެތުމުގެ ސަބަބުންނެވެ.
އެ މީހުންނާ ބައްދަލުވި ޑީޒެޑް އަދި އެފްޒެޑް ނަމަކަށް ކިޔާ ދެމަފިރިންގެ މިހާރުވެސް ފަސް ކުދިން ތިބިއިރު، އެ މީހުން އެއްބަސްވީ ސަރޮގޭޓް މަންމައެއްގެ ގޮތުގައި އެހީތެރިވުމަށެވެ. އެގޮތުން 2025 ވަނަ އަހަރުގެ އޭޕްރީލް މަހު އައިވީއެފް މެދުވެރިކޮށް އެމްބްރިއޯ ވަނީ އިންދާފަ އެވެ.
އޭގެ ދެ ހަފްތާ ފަހުން ހެދި ސްކޭންތަކުން ޑީޒެޑްގެ ބަނޑުގައި އެއްމާބަނޑު ދެ ކުދިން ތިބިކަން ކަށަވަރުވި އެވެ. އަދި ފަހުން ހެދި ޑީއެންއޭ ޓެސްޓުތަކުން އެނގުނު ގޮތުގައި އަންހެން ކުއްޖާއަކީ އަނެއް ދެމަފިރިންގެ ބަޔޮލޮޖިކަލް ދަރިއެކެވެ. އަދި ފިރިހެން ކުއްޖާއަކީ ޑީޒެޑް އާއި އެފްޒެޑްގެ އަމިއްލަ ދަރިއެކެވެ.
ފިރިހެން ކުއްޖާ ބަނޑުގައި އުފެދުނީ އެމްބްރިއޯ އިންދުމުގެ މަރުހަލާއާ ވަކިން، އެއްވެސް މެޑިކަލް އެހީތެރިކަމެއް ނެތި ގުދުރަތީ ގޮތުންނެވެ.
ކޯޓުގެ ހުކުމުގައި ބުނެފައިވަނީ، ޑީޒެޑް އަދި އެފްޒެޑް އެ ވަގުތު އިތުރު ދަރިއަކު ހޯދަން ގަސްދުކޮށްފައި ނުވި ނަމަވެސް، އެ ކުއްޖާއަކީ އެ މީހުން އިންތިހާއަށް ލޯބިވާ އަދި ބޭނުންވާ ދަރިއެއް ކަމަށެވެ.
ދެ އާއިލާއިން ވެސް ކޯޓުގައި ބުނެފައިވަނީ، ދެ ކުދިން ވެސް ބޮޑުވަމުންދާނީ އެކަކު އަނެކަކު އެނގިގެން ކަމަށާއި، އެ ކުދިންގެ އަސްލާއި އާއިލީ ގުޅުންތައް އުމުރާ ގުޅޭ ގޮތަށް ކިޔައިދެމުން ގެންދާނެ ކަމަށެވެ.
މީގެ އިތުރުން، އަންހެން ކުއްޖާގެ އަސްލާއި ބެލެނިވެރިކަމާ މެދު ތެދުވެރިކަމާއި ހާމަކަން ބޮޑު ގޮތެއްގައި ކަންކަން ބެހެއްޓުމަކީ އެ ކުއްޖާގެ މުސްތަގުބަލަށް އެންމެ ފައިދާހުރި ގޮތް ކަމަށް ދެ ފަރާތުން ވެސް އެއްބަސްވާ ކަމަށް ހުކުމުގައިވެ އެވެ.
މީގެ ކުރިން 2017 ވަނަ އަހަރު ވެސް ކެލިފޯނިއާގެ އަންހެނެއް ކަމަށްވާ ޖެސިކާ އެލަން، ސަރޮގޭޓް ދަރިފުޅާ އެކު އޭނާގެ އަމިއްލަ ދަރިއަކު ވިހާފައިވެ އެވެ. އެ ހާދިސާގައި ކުއްޖާގެ ބެލެނިވެރިކަން ހޯދުމަށް ގާނޫނީ ބޮޑު ހަނގުރާމައެއް ކުރަން ޖެހުނެވެ.
