150 އަހަރު ފަހުން ފޮތެއް ކުތުބުޚާނާއަށް އަނބުރާ ރައްދުކޮށްފި

އޮސްޓްރޭލިއާގެ އާންމު ކުތުބުޚާނާއަކުން ގެންދިޔަ ފޮތެއް، ގާތްގަނޑަކަށް 150 އަހަރު ފަހުން އެ ކުތުބުޚާނާއަށް އަނބުރާ ރައްދުކޮށްފި އެވެ. މި ފޮތް ފެނިފައިވަނީ ދާދިފަހުން ގެއެއް މަރާމާތުކުރުމުގެ މަސައްކަތް ކުރިއަށްދިޔަ އިރު ކަމަށްވެ އެވެ.

"އެންޓިކުއިޓީސް އޮފް އެތެންސް" ނަމަކަށް ކިޔާ، 1858 ވަނަ އަހަރު ޝާއިއުކޮށްފައިވާ މި ފޮތް، އޮސްޓްރޭލިއާގެ އައްސޭރިފަށުގެ ރަށެއް ކަމަށްވާ ކިއާމާގެ ކުތުބުޚާނާއަށް ރައްދުކޮށްފައިވަނީ މިދިޔަ ހަފުތާގަ އެވެ. 

ކިއާމާ ލައިބްރަރީގެ މެނޭޖަރު މިޝޭލް ހަޑްސަން ވިދާޅުވި ގޮތުގައި، އެހާ ދުވަސްވީ އެއްޗެއް މީގެ ކުރިން ދުވަހަކުވެސް އެ ކުތުބުޚާނާއަށް އަނބުރާ ލިބިފައެއް ނުވެ އެވެ.

އޭނާ އިތުރަށް ވިދާޅުވީ، ސޯޝަލް މީޑިއާގައި ގިނަ ކުތުބުޚާނާތަކެއް ފޮލޯކުރައްވާ ކަމަށާއި، އާންމުކޮށް މީހުން މަރުވުމުން ގޯތިގެދޮރު ސާފުކުރުމުގެ ތެރޭގައި 30 ނުވަތަ 40 އަހަރުވީ ފޮތްތައް ފެނިގެން އަނބުރާ ގެންނަ ކަމަށެވެ. ނަމަވެސް މިއީ ވަރަށް ތަފާތު ހާދިސާއެއްކަން އޭނާ ފާހަގަކުރެއްވި އެވެ.

ހަޑްސަން ވިދާޅުވި ގޮތުގައި، އިންފްލޭޝަނަށް ބަލައި މި ފޮތް ލަހުން ހަވާލުކުރުމުގެ ޖޫރިމަނާ ހިސާބުކޮށްފިނަމަ، އެ އަދަދު ގާތްގަނޑަކަށް 28,000 އޮސްޓްރޭލިއާ ޑޮލަރަށް (14,600 އިނގިރޭސި ޕައުންޑަށް) އަރާނެ އެވެ. މި ޖޫރިމަނާ ހިސާބުކޮށްފައިވަނީ 1872 ވަނަ އަހަރު އެ ކުތުބުޚާނާ ހުޅުވިއިރު އަމަލުކުރި އުސޫލުތަކުގެ ދަށުން، ފޮތުގެ އެތެރެ ފުށުގައި ޖުރިމަނާގެ ގޮތުގައި ލިޔެފައިވާ ހަފުތާއަކަށް ތިން ޕެންސްގެ ރޭޓުންނެވެ.

ނަމަވެސް، އެ ފޮތް އެންމެ ފަހުން ގެންދިޔަ މީހަކީ ކާކުކަން ދެނެގަނެވޭނެ އެއްވެސް ގޮތެއް ނެތުމުން، އެ ބޮޑު ޖޫރިމަނާ ދައްކަންޖެހޭ ފަރާތަކީ ކާކުކަން ވަނީ ނޭނގުމުގެ ތެރޭގައި ބާއްވަން ޖެހިފަ އެވެ.

ފޮތްތައް ގެންދާ މީހުންނާއި ގެންދާ ތާރީޚުތައް ނޯޓުކުރަން 1870 ގެ އަހަރުތަކުގައި ބޭނުންކުރި ކުތުބުޚާނާގެ ރެކޯޑު ފޮތް ވަނީ ގެއްލިފަ އެވެ.

"އެ ފޮތުގެ އެއްވެސް ތަނަކުން، އެންމެ ފަހުން އެ ފޮތް ގެންދިޔައީ ކާކުކަން އެނގޭކަށް ނެތް،" ހަޑްސަން ވިދާޅުވި އެވެ.

1870 ގެ އަހަރުތަކުގައި ކުތުބުޚާނާގައި އަމަލުކުރި އުސޫލުތައް ބުނާގޮތުން، އިތުރު ފޮތެއް ދޫކުރެވޭނީ ކުރިން ގެންދިޔަ ފޮތް އަނބުރާ ހަވާލުކޮށް، ޖޫރިމަނާއެއް އޮތް ނަމަ އެ ފައިސާ ދެއްކުމުންނެވެ.

ހަޑްސަން ލަފާކުރައްވާ ގޮތުގައި، އެ ފޮތް އަނބުރާ ނުގެނައީ އެ ސަބަބާ ހުރެ ކަމަށް ވެދާނެ އެވެ.

އެ ޒަމާނުގެ ބޯދާ އުސޫލުތަކުގެ ތެރޭގައި، ގޭބިސީއެއްގައި ކިޔަން ދަންނަ މަދުވެގެން ހަ މީހުން ތިބި ނަމަ، އެ ގެއަކަށް އެއްފަހަރާ ތިން ފޮތް ގެންދިއުމުގެ ހުއްދަ އޮވެ އެވެ. ނަމަވެސް މިހާރުގެ ކުތުބުޚާނާ ބޭނުންކުރުމަށް ކިޔަން އެނގޭކަމުގެ ހެކި ހުށަހަޅާކަށް ނުޖެހެ އެވެ. މީގެ އިތުރުން، 1870 ގެ އަހަރުތަކުގައި މަސްތުގެ ހާލަތުގައި ތިބެ ކުތުބުޚާނާއަށް އަންނަ މީހުންނަށް ފޮތް ދޫކުރުމަކީ މަނާކަމެކެވެ.

މިހާރުގެ އުސޫލުތައް ބުނާގޮތުން، ކުތުބުޚާނާ ބޭނުންކުރާ މީހެއްގެ އަމަލުތަކުގެ ސަބަބުން އެހެން މީހުންނަށް އުނދަގޫވާނަމަ އެ މީހަކު ނުކުތުމަށް އެދެވެ އެވެ.

ހަޑްސަން ވިދާޅުވި ގޮތުގައި، ގިނަ އަހަރުތަކެއް ވަންދެން ދުންހޮޅިއެއްގެ ދަށުގައި އޮތުމުގެ ސަބަބުން ފެނުގެ އަސަރުކޮށް ކޮންމެވެސް ވަރަކަށް ހަލާކުވެފައިވާ މި ފޮތަކީ، އެ ކުތުބުޚާނާގެ އެންމެ ފުރަތަމަ 1,000 ފޮތުގެ ތެރެއިން 506 ވަނަ ފޮތެވެ.

އޭނާ ލަފާކުރައްވާ ގޮތުގައި، މި ފޮތް ގެއްލިފައިވަނީ ކުތުބުޚާނާ ހުޅުވިތާ މަދު އަހަރުތަކެއްގެ ތެރޭގަ އެވެ.

އަނބުރާ ލިބުނު މި ފޮތް ދެން ބަހައްޓާނީ އެ ކުތުބުޚާނާގެ ތާރީޚީ ތަކެތި ދައްކާލާ ބައިގަ އެވެ.

"އަހަރެމެން ދެން މި ފޮތެއް ދުލެއް ނުކުރާނަން. މި ފޮތް އަނބުރާ ލިބުމަށް އިތުރު 150 އަހަރު މަޑުކުރާކަށް އަހަރެމެން ބޭނުމެއް ނޫން،" ހަޑްސަން ވިދާޅުވި އެވެ.