ކުއަންޓަސް އެއާވޭސްގެ ފްލައިޓް އެޓެންޑެންޓެއްގެ ގައިގައި ފަސިންޖަރަކު ދަތް އެޅުމުން، ފްލައިޓު ޑައިވަރޓް ކޮށްފި

އޮސްޓްރޭލިއާގެ މެލްބަން އިން އެމެރިކާގެ ޑަލަސް އަށް ދަތުރު ކުރި ކުއަންޓަަސް އެއަރވޭސްގެ ފްލައިޓެއްގައި ފަސިންޖަރަކު ހިންގި ހަމަނުޖެހުންތަކަކާ ގުޅިގެން، އެ ފްލައިޓު ކުއްލި ޙާލަތުގައި ފްރެންޗް ޕޮލިނީޝިއާ އަށް ޖައްސައިފި އެވެ.

މި ހާދިސާ ހިނގާފައި ވަނީ މިދިޔަ ހުކުރު ދުވަހު އެވެ. މީޑިއާ ރިޕޯޓުތައް ބުނާ ގޮތުގައި މި ފްލައިޓު ޑައިވަރޓް ކުރަން ޖެހުނީ، ފްލައިޓުގެ ފަސިންޖަރަކު އެޓެންޑެއްޓެއްގެ ގައިގައި ދަތް އެޅުމުންނެވެ. އޮސްޓްރޭލިއާގެ ޤައުމީ ބްރޯޑްކާސްޓަރު އޭބީސީ އިން ރިޕޯޓު ކޮށްފައިވާ ގޮތުގައި، އެ ފަސިންޖަރު ކޮންޓްރޯލް ނުވެގެން އުޅުމުން، ފްލައިޓުގައި ތިބި އެހެން ފަސިންޖަރުން ވަނީ އޭނާ ހިފަހައްޓައި ބަނދެފަ އެވެ. 

މި ހަމަނުޖެހުމާ ގުޅިގެން ފްލައިޓު ވަނީ ފްރެންޗް ޕޮލިނީޝިއާގެ ވެރި ރަށް ޕަޕީޓީ އަށް ޖައްސައިފަ އެވެ. ފްލައިޓު ޖެއްސުމާ އެކު، އެ ޤައުމުގެ ކަމާ ބެހޭ ފަރާތް ތަކުން ވަނީ، ފްލައިޓަށް އަރައި އެ މީހާ ފުލުހުންގެ ބެލުމުގެ ދަށަށް ގެންގޮސްފަ އެވެ. މި ހާދިސާއާ ގުޅިގެން ކުއަންޓަސް އެއަރވޭސް އިން ވަނީ، އެ މީހާ އެ އެއާލައިންގެ އެއްވެސް ފްލައިޓަކުން ދަތުރު ކުރުން މުޅި އުމުރަށް މަނާ ކޮށްފަ އެވެ. 

ކުއަންޓަސްގެ ތަރުޖަމާނަކު އާދީއްތަ ދުވަހު އޭއެފްޕީ އަށް ދިން ބަޔާނެއްގައި ބުނީ، އެ އެއަރލައިން އިން އެންމެ އިސްކަމެއް ދެނީ ކަސްޓަމަރުންނާއި، ކުރޫ އިންގެ ސަލާމަތާއި ރައްކާތެރި ކަމަށެވެ. އަދި ފްލައިޓުގައި ހިންގާ މިފަދަ ނުރައްކާތެރި އަދި ބޭއަދަބީ އަމަލު ތަކަށް އެ އެއަރލައިން އިން  އެއްވެސް ވަރަކަށް ބަލައި ނުގަންނާނެ ކަމަށެވެ. 

މި ހާދިސާއާ ގުޅިގެން ފްލައިޓުގެ ދަތުރު މެދު ކަނޑާލަން ޖެހުމުން، އެހެން ފަސިންޖަރުންނަށް ލިބުނު ދަތި ތަކަށް އެއަރލައިން އިން ވަނީ މައާފަށް އެދިފަ އެވެ. ފްލައިޓް އެޓެންޑެންޓަށް ލިބުނު އަނިޔާގެ ތަފްސީލެއް އެއަރލައިން އިން ހާމަ ކޮށްފައި ނުވެ އެވެ. ނަމަވެސް، މި މައްސަލަ ގެންދަނީ އިތުރަށް ތަހުގީގު ކުރަމުންނެވެ.