ދުނިޔޭގެ އެންމެ އަޑުގަދަ މީހާގެ ލަގަބު އޮސްޓްރޭލިއާ މީހަކަށް ލިބިއްޖެ

އޮސްޓްރޭލިއާގެ ކެންބަރާގައި އެއަރކޮންޑިޝަން ސާފުކުރުމުގެ މަސައްކަތްކުރާ އަދި އެ ރަށުގެ އޮަނަރަރީ "ޓައުން ކްރަޔަރ" (ރަށު ގޮވާމީހާ) އަށް، ދުނިޔޭގެ އެންމެ އަޑުގަދަ މީހާގެ ލަގަބު ލިބިއްޖެ އެވެ.

އުމުރުން 58 އަހަރުގެ ޖޯސެފް މެގްރެއިލް-ބޭޓަޕް މިދިޔަ ހަފުތާގައި ގިނިސް ވޯލްޑް ރެކޯޑް ފޮތުން ޖާގަ ހޯދީ، "ނައު" (މިހާރު) މި ބަހުން ހަޅޭއްލަވައިގެންނެވެ. އޭނާގެ އަޑުގެ ބާރުމިން ހުރީ 122.4 ޑެސިބެލްގަ އެވެ. މިއީ އާންމުކޮށް ކަރަންޓު ކީހެއް (ޗެއިންސޯ) ނުވަތަ ޖެޓް މަތިންދާބޯޓެއް ނައްޓާލާއިރު ހުންނަ ފަދަ ގަދަ އަޑެކެވެ.

ކަންފަތް ބައްވާހާ ބާރު މި އަޑާއެކު އޭނާ މުގުރާލީ 1994 ވަނަ އަހަރު އުތުރު އަޔަރލޭންޑްގެ ސްކޫލް ޓީޗަރެއް ކަމަށްވާ އެނަލީސާ ފްލެނަގަން ހަދާފައިވާ 121.7 ޑެސިބެލްގެ ރެކޯޑެވެ. އެ ފަހަރު ފްލެނަގަން ރެކޯޑް ހެދީ "ކުއައިޓް" (ހިމޭން) މި ބަހުން ހަޅޭއްލަވައިގެންނެވެ. މެކްގްރެއިލް-ބޭޓަޕް ބުނި ގޮތުގައި މި ރެކޯޑަށް ތައްޔާރުވުމަށް ފަރިތަކުރުމަކީ ކުރެވޭނެ ކަމެއް ނޫނެވެ.

"މިކަމަށް އަމަލީގޮތުން ފަރިތަކުރެވޭނެ އެއްވެސް ގޮތެއް ނޯވޭ. އެންމެ ބަހެއް، އެއީ 'ނައު' މި ބަސް ބުނުމަށް އަހަރެން ހަތް ފަހަރު މަސައްކަތް ކުރަން ޖެހުނު. އަދި އޭގެ ފަހުން ދެ ދުވަސް ވަންދެން އަހަރެންގެ އަޑު ހުރީ މުޅިން ކުރަކިވެފައި. އެއީ ވަރަށް އުނދަގޫ އިހުސާސެއް. އެހެންވީމާ މިއީ ފަރިތަކުރެވޭނެ ކަމެއް ނޫން، އެކަމަކު އެކަން ކުރާއިރު ވަރަށް މަޖާ،" އޭނާ ބުންޏެވެ.

މެގްރެއިލް-ބޭޓަޕް ގަބޫލުކުރާ ގޮތުގައި އޭނާއަކީ ދުނިޔޭގެ އެންމެ އަޑުގަދަ "މީހާ" އަށް ވުރެ ބޮޑަށް، ދުނިޔޭގެ އެންމެ އަޑުގަދަ "ފިރިހެންމީހާ" އެވެ. މީގެ ކުރިން އެންމެ އަޑުގަދަ ފިރިހެނާގެ ރެކޯޑެއް ރަސްމީކޮށް އޮތްކަން އެނގިފައެއް ނުވެ އެވެ.

"އެނަލީސާ ފްލެނަގަންގެ ރެކޯޑް އޭނާއަށް އޮތުމުން އަހަރެން އުފާކުރަން. އެހެންވީމާ އޭނާއަކީ އަދިވެސް ދުނިޔޭގެ އެންމެ އަޑުގަދަ އަންހެންމީހާ، އަދި އަހަރެން މިއީ ދުނިޔޭގެ އެންމެ އަޑުގަދަ ފިރިހެންމީހާ،" އޭނާ އިތުރަށް ބުންޏެވެ.

މެކްގްރެއިލް-ބޭޓަޕް ބުނި ގޮތުގައި އޭނާއަށް ފްލެނަގަންގެ ރެކޯޑް ފެނުނީ، "ޓައުން ކްރައިންގ" ނުވަތަ ރަށު ތެރޭގައި ހަބަރު ފެތުރުމަށް ގޮވާ އުޅުމުގެ ދާއިރާއިން ގިނިސް ރެކޯޑެއް އޮތްތޯ ބަލަނިކޮށެވެ. އޭނާގެ އަޑުގަދަކަމުގެ މުބާރާތްތަކަށް ޝައުގުވެރިކަން އުފެދުނީ 2017 ވަނަ އަހަރު އޮސްޓްރޭލިއާގެ ވެރިރަށް ކެންބަރާގެ ރަސްމީ "ޓައުން ކްރަޔަރ" ގެ މަގާމަށް އޭނާ އައްޔަންކުރި ހިސާބުންނެވެ. މިއީ އެ ސިޓީގެ ސަރުކާރުން އުފައްދާފައިވާ، ހަމައެކަނި ޝަރަފެއްގެ ގޮތުގައި އަދި ވަގުތީ ގޮތުން އަދާކުރާ ވަޒީފާއެކެވެ. އޭނާ މި މަސައްކަތް ސިފަކުރަނީ "މަޖާ" ކަމެއްގެ ގޮތުގަ އެވެ.

ޓައުން ކްރަޔަރެއްގެ ގޮތުގައި އޭނާއަށް ކިޔާ ނަމަކީ "ލޯޑް ޖޯސެފް" އެވެ. އޭނާ އާންމުކޮށް ހަބަރުތަކާއި އިއުލާންތައް ގޮވަނީ ރަށުގެ އެކި ހަރަކާތްތަކާއި، ސްކޫލް ފެއާތަކާއި، ކާރު ޝޯތަކުގަ އެވެ. މި މަސައްކަތާ ގުޅިގެން އޭނާއަށް ވަނީ "އޭންޝަންޓް އެންޑް އޮނަރަބަލް ގިލްޑް އޮފް އޮސްޓްރޭލިއަން ޓައުން ކްރަޔާސް" ގެ މެންބަރުކަން ލިބިފަ އެވެ. މިއީ މި ފަންނުގެ ތާރީހީ އަދި ރަސްމީ ދައުރު ދެމެހެއްޓުމަށް މަސައްކަތްކުރާ ޕްރޮފެޝަނަލް ޖަމިއްޔާއެކެވެ.

މެކްގްރެއިލް-ބޭޓަޕް ވަނީ 2024 ވަނަ އަހަރު ބޭއްވި މި ޖަމިއްޔާގެ މުބާރާތެއްގައި، 98 ޑެސިބެލްގެ ބާރުމިނުގައި "އޮޔޭ، އޮޔޭ، އޮޔޭ" އޭ ގޮވައިގެން އެއްވަނަ ހޯދާފަ އެވެ. މިއީ އޮސްޓްރޭލިއާގެ ޓައުން ކްރަޔަރުން އެއްޗެއް އިއުލާން ކުރުމުގެ ކުރިން، މީހުންގެ ސަމާލުކަން ހޯދުމަށާއި ހިމޭނުން ތިބުމަށް ގޮވާލާ ގޮވުމެކެވެ.

ދުނިޔޭގެ ރެކޯޑް ހެދުމަށްޓަކައި އޭނާ އެކި ބަސްބަސް ބޭނުންކޮށްގެން ތަޖުރިބާ ކުރިއެވެ. ނަމަވެސް އެންމެ ފަހުން ނިންމީ "ނައު" މި ބަސް ބޭނުން ކުރުމަށެވެ.

އޭނާގެ މި ހަޅޭކުގެ އަޑު ރެކޯޑްކުރީ މެއި މަހުގެ 2 ވަނަ ދުވަހު ކެންބަރާގެ ރޭޑިއޯ ސްޓޫޑިއޯއެއްގަ އެވެ. މިކަން ކުރީ ޕްރޮފެޝަނަލް އެކޯސްޓިކް އިންޖިނިއަރަކާއި ހެކިންގެ ކުރިމަތީގަ އެވެ. އެއަށްފަހު އެ ރެކޯޑިންތައް ގިނިސް ވޯލްޑް ރެކޯޑްސްއަށް ފޮނުވުމުން، އެ އިދާރާއިން މި ރެކޯޑް ރަސްމީކޮށް އިއުލާންކުރީ މިދިޔަ ހުކުރު ދުވަހު އެވެ.

މިއީ މެގްރެއިލް-ބޭޓަޕް ދުނިޔޭގެ ރެކޯޑެއް މުގުރާލި ދެވަނަ ފަހަރެވެ. 2019 ވަނަ އަހަރު އޭނާ ވަނީ ދުނިޖަހާ މީހެއްގެ ގޮތުގައި، އެންމެ އަވަހަށް 10 ދުނި ޖެހުމުގެ ރެކޯޑް މުގުރާލާފަ އެވެ. އެ ފަހަރު އޭނާ 60.03 ސިކުންތުން މި ރެކޯޑް ހެދީ، 2015 ވަނަ އަހަރުން ފެށިގެން އޮތް ރެކޯޑަށް ވުރެ ސިކުންތެއްގެ ކުޑަ މިންވަރެއް އަވަސްކޮށްގެންނެވެ.

ނަމަވެސް، އޭގެ ނުވަ މަސް ފަހުން އުމުރުން އެންމެ 7 އަހަރުގެ ފިރިހެން ކުއްޖަކު ވަނީ މެކްގްރެއިލް-ބޭޓަޕްގެ އެ ރެކޯޑަށް ވުރެ 11.4 ސިކުންތު އަވަހަށް ދުނި ޖަހައި، އެ ރެކޯޑް މުގުރާލާފަ އެވެ.

މެކްގްރެއިލް-ބޭޓަޕް ބުނި ގޮތުގައި، ދުނިޖެހުމުގެ ރެކޯޑް އަލުން ހޯދުމަކަށް ނުވަތަ މިހާރު ހެދި އަޑުގަދަކުރުމުގެ ރެކޯޑް ދިގު މުއްދަތަކަށް ދެމެހެއްޓުމަކަށް އޭނާގެ މާ ބޮޑު ޝައުގުވެރިކަމެއް ނެތެވެ.