ރައްޔިތުންގެ މަޖިލީހުގެ މެންބަރުންނަށް ލިބޭ އަގުބޮޑު ހެލްތު އިންޝުއަރެންސް ކަނޑާލުމަށް ގޮވާލާ ޕެޓިޝަނުގައި 5000ށް ވުރެ ގިނަ ސޮއި!
20 އޯގަސްޓު 2026 | ބުރާސްފަތި 12:52ރައްޔިތުންގެ މަޖިލީހުގެ މެންބަރުންނަށް ދައުލަތުން ދޭ އަގުބޮޑު ހެލްތު އިންޝުއަރެންސް ކަނޑާލުމަށް ގޮވާލައި ހުށަހެޅި ޕެޓިޝަނުގައި، މަޖިލީހަށް ބަލައިގަންނަން ޖެހޭ މިންވަރަށް ވުރެ ގިނަ މީހުން މިހާރު ވަނީ ސޮއިކޮށްފައި. އާންމު ރައްޔިތުންނަށް ނުލިބޭ ފަދަ އިނާޔަތްތަކެއް މެންބަރުންނަށް ދިނުމަކީ ބަލައިގަނެވޭނެ ކަމެއް ނޫން ކަމަށް ބުނެފައިވާ މި ޕެޓިޝަނުގައި، މި ޚިދުމަތަށް ދައުލަތުން ކުރާ ބޮޑު ހޭދަ އަހަރަކަށް ވުރެ އަހަރެއް އިތުރުވަމުންދާ ކަމުގެ ކަންބޮޑުވުން ފާޅުކޮށްފައިވޭ
ރައްޔިތުންގެ މަޖިލީސް ހުޅުވުމަށް ބޭއްވި ޖަލްސާގައި ރައީސް މުއިއްޒު ރިޔާސީ ބަޔާން އިއްވައިދެއްވަނީ | ރައީސް އޮފީސް
ރައްޔިތުންގެ މަޖިލިސް މެންބަރުންނަށް ލިބޭ އަގުބޮޑު ހެލްތު އިންޝުއަރެންސް ކަނޑާލުމަށް ގޮވާލާ ޕެޓިޝަނުގައި 5000ށް ވުރެ ގިނަ މީހުން ސޮއިކޮށްފި އެވެ.
އާންމުންގެ ޖަމިއްޔާގެ ފައުންޑަރު މިދުއަމް ސައުދު އޮގަސްޓު މަހުގެ 12 ވަނަ ދުވަހު ފެށި މި ޕެޓިޝަނުގައި ބުނެފައިވަނީ އާންމު ރައްޔިތުންނަށް ނުލިބޭ ސިއްހީ އިންޝުއަރެންސެއް އާންމު ރައްޔިތުންގެ ފައިސާއިން އެ އާންމުން ތަމްސީލު ކުރަން މަޖިލީހަށް ވަޑައިގަންނަވާ މެންބަރުންނަށް ދިނުމަކީ ތަސައްރަފު ފުދިފައިވާ އެއްވެސް ސިޔާސީ ނިޒާމެއް ދަންނަ ކަމެއް ނޫން ކަމަށެވެ. އަދި ދިވެހިރާއްޖެއަށް ވުރެ އެތައް ގުނައެއް މުއްސަނދި ގައުމުތަކުން ވެސް ކުރާ ކަމެއް ނޫން ކަމަށެވެ.
މި ޕެޓިޝަނުގައި އޮގަސްޓު 20 ވަނަ ދުވަހާއި ހަމައަށް 5219 މީހުން ސޮއިކޮށްފައިވެ އެވެ. އެހެންކަމުން މި ޕެޓިޝަނަކީ މިހާރު ވެސް، ރައްޔިތުންގެ މަޖިލީހުގެ ތަޅުމަށް ގެެނެސް ބަހުސްކޮށްގެން ގޮތެއް ނިންމަން ޖެހޭ ވަރަށް ސޮއި ހަމަވެފައި އޮތް ޕެޓިޝަނެކެވެ. މަޖިލީހުގެ ގަވާއިދު ބުނާ ގޮތުން 2100 އަށް ވުރެ ގިނަ މީހުން ސޮއިކޮށްފި ނަމަ އެ ޕެޓިޝަނަކާ މެދު އަމަލުކުރަން ޖެހޭނެ އެވެ.
ޕެޓިޝަނެއް އެކަމާ ބެހޭ ކޮމިޓީއަށް ފޮނުވާނީ، ޕެޓިޝަނަކަށް މަޖިލީހުގެ ތަޅުުމުގައި ބަހުސްކުރުަމަށް ފަހު، އެ ޕެޓިޝަން މަޖިލީހަށް ބަލައިގަތުމާ މެދު ވޯޓެއް ނަގައިގެންނެވެ. އެއަށްފަހު ކޮމިޓީން ޕެޓިޝަނަށް ރިއާޔަތްކޮށް، އެއަށް ދޭނެ ޖަވާބެއް ނުވަތަ އަމަލުކުރާނެ ގޮތެއް ނިންމައި އަނެއްކާ ވެސް ފޮނުވާނީ ތަޅުމަށެވެ.
ޤާނޫނު ނަމްބަރު 5/2013 ރައްޔިތުންގެ މަޖިލީހުގެ އިމްތިޔާޒުތަކާއި ބާރުތަކުގެ ޤާނޫނުގައި މެންބަރުންގެ މާލީ އިނާޔަތްތަކުގެ ބާބު 7 ގެ (ހ) ގައި ލިޔެފައިވަނީ ރައްޔިތުންގެ މަޖިލީހުގެ ކޮންމެ މެންބަރަކާއި އެ މެންބަރެއްގެ އަނބިމީހާ/ފިރިމީހާ އަދި އުމުރުން 18 އަހަރު ނުފުރޭ ދަރިން ރާއްޖެއާއި ސާކް ގައުމުތަކާއި އަދި އާސިއާންގެ ގައުމުތަކުން ސިއްހީ ފަރުވާ ލިބޭނެ ފަދަ މެޑިކަލް އިންޝުއަރެންސް ސްކީމެއްގައި ބައިވެރިކޮށްދޭން ވާނެ ކަމަށެވެ. އަދި ހަމަ މި ގާނޫނުގެ 8 ވަނަ ބައި ( ހިދުމަތުގެ އިނާޔަތް) ގެ (ޅ) ގައި ވަނީ ރައްޔިތުންގެ މަޖިލީހުގެ މެންބަރުކަން ކޮށްފައިވާ ކޮންމެ މީހަކަށް ރައްޔިތުންގެ މަޖިލީހުގެ މެންބަރުންނަށް އޮންނަފަދަ ހެލްތު އިންޝުއަރެންސް ސްކީމެއްގެ ދަށުން ބޭސްފަރުވާ ކޮށްދޭން ވާނެ ކަމަށެވެ.
މީގެއިތުރުން 2015 ވަނަ އަހަރުން ފެށިގެން 2025 ގެ ނިޔަލަށް މަޖިލިސް މެންބަރުންގެ ހެލްތު އިންޝުއަރެންސް ޕްރިމިއަމް އަށް 100 މިލިއަނާއި ގާތްކުރާ ވަރަށް ރުފިޔާ ހަރަދުކޮށްފައިވެ އެވެ. އަދި މެންބަރުކަން ކުރެއްވުމަށްފަހު ވަކިވެވަޑައި ގަންނަވާ ކޮންމެ މެންބަރަކަށް އުމުރު ދުވަހަށް މި އިންޝުއަރެންސް ދޭން ޖެހޭތީ މި އަދަދުތައް ދާނީ އަހަރަކަށް ވުރެ އަހަރެއް އެތައް ގުނައެއް އިތުރުވަމުން ކަމަށް ޕެޓިޝަންގައި ބުނެފައިވެ އެވެ.
