އައްޑޫއިން ފެނިގެން ދަނީ ސަރުކާރުގެ ދެކޮޅުނުޖެހޭ ސިޔާސަތުތަކުގެ ސަބަބުން ތަރައްގީ ސޮއްސާލާފައިވާ މަންޒަރު: ޝާހިދު
18 އޯގަސްޓު 2026 | އަންގާރަ 17:49ސަރުކާރުގެ ދެކޮޅުނުޖެހޭ ސިޔާސަތުތަކުގެ ސަބަބުން ރައްޔިތުންނަށް ބޭނުންވާ އަސާސީ ބޭސް ނުލިބުމާއި ތަކެތީގެ އަގުބޮޑުވުމުގެ ކަންބޮޑުވުންތައް އެމްޑީޕީގެ ކުރީގެ ރައީސް އަބްދުﷲ ޝާހިދު ފާޅުކުރައްވައިފި. ރައްޔިތުންނަށް ދިމާވާ ދަތިތަކަށް ހައްލު ހޯދައިނުދެވުމަކީ މި ސަރުކާރު ފެއިލްވެފައިވާކަމުގެ ހެއްކެއް ކަމަށް ވިދާޅުވެ، ޝާހިދު ވަނީ ސަރުކާރަށް ވަރަށް ބޮޑަށް ފާޑުވިދާޅުވެފައި
އެމްޑީޕީގެ ކުރީގެ ރައީސް އަބްދުﷲ ޝާހިދު ދެއްވި އިންޓަވިއު | ރާއްޖެ އެމްވީ
އައްޑޫއިން ފެނިގެން ދަނީ ސަރުކާރުގެ ދެކޮޅުނުޖެހޭ ސިޔާސަތުތަކުގެ ސަބަބުން ތަރައްގީ ސޮއްސާލާފައިވާ މަންޒަރާއި ރައްޔިތުން ނިކަމެތި ކޮށްލާފައިވާ މިންވަރު ކަމަށް އެމްޑީޕީގެ ކުރީގެ ރައީސް އަބްދުﷲ ޝާހިދު ވިދާޅުވެއްޖެ އެވެ.
އައްޑޫ ސިޓީއަށް ކުރައްވަމުން ގެންދަވާ ދަތުރުގެ ތެރެއިން ޝާހިދު ވިދާޅުވީ، ރައްޔިތުން އެދެނީ ތަރައްގީއާއި ފުދުންތެރިކަން އަދި ޓްރާންސްޕޭރެންޓް ނިޒާމެއްގެ ތެރެއިން ރައްޔިތުންނަށް ބޭނުންވާ ކަންތައްތައް ވާނެ ނިޒާމެއް ކަމަށެވެ. އަދި ސަލާން ޖެހުން އަނބުރާ އިއާދަވާން ރައްޔިތުން ބޭނުން ނުވާ ކަމަށް ޝާހިދު ވިދާޅުވި އެވެ.
ޝާހިދު ވަނީ ބޭސް ހޯދުމުގައި ރައްޔިތުންނަށް ދިމާވަމުންދާ ދަތިތައް ފާހަގަ ކުރައްވައި، ރައީސް މުއިއްޒުގެ ސަރުކާރުން ބޭހުގެ ދަތިކަމަށް ހައްލެއް ހޯދައި ނުދޭތީ އެކަމުގެ ކަންބޮޑުވުން ފާޅުކުރައްވާފައި އެވެ.
އަޅުގަނޑާ މިއަދު ދިމާވި މުސްކުޅި ބޭފުޅަކު، 25 އަހަރުވެއްޖެ ހިތުގެ ފަރުވާއަށް ބޭނުންވާ ބޭހެއް ފަރިކުޅުއްވާތާ، އޭނާގެ މިއަދުގެ ޝިކާއަތަކީ ޝަކުވާއަކީ އެ ބޭހެއް މިހާރު ރާއްޖެއަކުން ނުލިބެޔޭ، އެ ބޭސް ލިބޭނެ އެއްވެސް ގޮތެއް ނެތޭ، އެންމެ ފަހުން އެ ބޭސް އޭނާއަށް ލިބިވަޑައިގަނެފައިވަނީ ހއ. ދިއްދޫގައި ހުރި ބޭސް ފިހާރައަކުން. މިހާރު އަމިއްލައަށް މަސައްކަތް ކުރައްވައިގެން އިންޑިއާއިން އެ ބޭސް ހޯދައްވަމުން ގެންދަވަނީ، ސަރުކާރުގެ ބޭސް ފިހާރަތަކުން ބުނަނީ އެއީ މިހާރު ލިބޭނެ ބޭހެއް ނޫނޭއަބްދުﷲ ޝާހިދު
ރައްޔިތުންނަށް ދިމާވަމުންދާ ދަތިތައް އަދި ތަކެތީގެ އަގު ބޮޑުވުމުގެ ޒިންމާ ނަގަން ޖެހޭނީ މިއަދުގެ ސަރުކާރުން ކަމަށް ވެސް ޝާހިދު ވިދާޅުވި އެވެ. އަދި މި ހުރިހާ ކަމަކުން ކަށަވަރު ވަނީ މިސަރުކާރު ފެއިލް ވެފައިވާކަން ކަމަށް ވެސް ވިދާޅުވި އެވެ.
