ނަސްލީ ތަފާތު ކުރުމުގެ މައްސަލާގައި އިޓަލީގެ ސެރީއާގެ ކްލަބު ލާޒިއޯއާ ދެކޮޅަށް ސެރީއާގެ ޑިސިޕްލިނަރީ ކޮމެޓީއިން ފިޔަވަޅު އަޅައިފި އެވެ.
ލާޒިއޯ އަށް އަދަބު ދީފައި ވަނީ އިޓާލިއަން ލީގުގައި އަމިއްލަ ދަނޑުގައި ސަސުއޯލޯގެ މައްޗަށް ހައެއް އެކަކުން ކުރި ހޯދި މެޗުގައި ސަޕޯޓަރުންގެ ފަރާތުން ފެނުނު ނަސްލީ ތަފާތު ކުރުމުގެ އަމަލުތަކުގެ ސަބަބުންނެވެ. ސަސުއޯލޯ އާދެކޮޅަށް ކުޅުނު މެޗުގައި ލާޒިއޯގެ ސަޕޯޓަރުން ވަނީ ސަސުއޯލޯގެ ކްލައުޑް އެޖަޕޮންގ އާއި އަލްފްރެޑް ޑުންކަން އާ ނަސްލީ ގޮތުން ދިމާކޮށްފަ އެވެ.
ލާޒިއޯގެ ސަޕޯޓަރުންގެ ފަރާތުން ފެނިގެންދިޔަ ކުޅިވަރުގެ ރޫޙާއި ޚިލާފް އަމަލުތަކުގެ މައްސަލަ ބެލުމަށްފަހު ސެރީއާގެ ޑިސިޕްލިނަރީ ކޮމިޓީން ނެރުނު ރިޕޯޓްގައި ވަނީ، ލީގުގައި ލާޒިއޯ ކުޅެން ޖެހޭ ފުރަތަމަ ދެމެޗުގައި ލާޒިއޯގެ ދަނޑުގައި ހުންނަ ކުރްވަ ނޯޑް ސްޓޭންޑްގައި އަމިއްލަ ސަޕޯޓަރުންނަށް ޙާއްސަކޮށްފައިވާ 5449 ގޮނޑީގެ ތެރެއިން ދެ ހާސް ގޮނޑި ހުސްކޮށް ބެހެއްޓުމަށް އަންގާފަ އެވެ.
މި އަދަބުގެ ސަބަބުން އިޓާލިއަން ލީގުގައި އޮކްޓޯބަރު މަހުގެ 22 ވަނަ ދުވަހު ކަގްލިއާރީ އާ ދެކޮޅަށް ކުޅޭ މެޗާއި، ނޮވެމްބަރު މަހުގެ ފަސް ވަނަ ދުވަހު އުދިނޭޒީ އާއި ދެކޮޅަށް ކުޅޭ މެޗުގައި ލާޒިއޯގެ ބައެއް ސަޕޯޓަރުންނަށް ނުވަދެވޭނެ އެވެ.
މިއަދަބުގެ ތެރެއިން ނޮވެމްބަރު މަހުގެ ފަސް ވަނަ ދުވަހު ސްޓޭޑިއޯ އޮލިމްޕިކޯގައި އުދިނޭޒީ އާ ދެކޮޅަށް ކުޅެން ޖެހޭ މެޗު ހިމަނާފައިވަނީ، އޭޕްރީލް މަހުގެ 30 ވަނަ ދުވަހު އޭއެސް ރޯމާ އާއި ދެކޮޅަށް ކުޅުނު މެޗުގައި ލާޒިއޯގެ ސަޕޯޓަރުންގެ ފަރާތުން ފެނިގެން ދިޔަ ނަސްލީ ތަފާތު ކުރުންތަކުގެ މައްސަލަ އާ ގުޅިގެން އަޅާފައިވާ ފިޔަވަޅުގެ ސަބަބުންނެވެ. އެހެންނަމަވެސް ރޯމާ އާ ދެކޮޅަށް ކުޅުނު މެޗުގައި ޑިފެންޑަރ އެންތަނީ ރުޑިގަރ އާ ލާޒިއޯގެ ސަޕޯޓަރުން ނަސްލީ ގޮތުން ދިމާ ކުރުމާއި ގުޅިގެން ދިން އަދަބު ތަންފީޒު ކުރުން ފަސްކުރީ އެވެ.
