ތަފާތު ބޮޑު ނަތީޖާއަކުން މެކާނޯގެ މައްޗަށް ކުޑަހެންވޭރު ކުރި ހޯދައިފި

ދެވަނަ ޑިވިޝަން ފުޓުބޯޅަ މުބާރާތުގައި މެކާނޯގެ މައްޗަށް ހޯދި ބޮޑު މޮޅާއެކު ކުޑަހެންވޭރު ޔުނައިޓެޑް މުބާރާތުގެ ފެށުން ރަނގަޅުކޮށްފިއެވެ.

މުބާރާތުގައި ބުދަ ދުވަހު ހަވީރު ހެންވޭރު ޓާފް ދަނޑުއި، މެކާނޯ އާއި ދެކޮޅަށް ކުޅުނު މެޗު ކުޑަހެންވޭރުން ކާމިޔާބުކުރީ 12-1 ގެ ތަފާތު ބޮޑު ނަތީޖާއަކުންނެވެ. މެޗުގައި ކުޑަހެންވޭރަށް ލަނޑުތަށް ކާމިޔާބުކޮއްދިނީ އަލީ ހާފިޒް އާއި، އަލީ ޝިފާއު އާއި، އަހްމަދު އަޝްފާން އާއި، ޝަހީމް އަބްދުލް ގާދިރު އެވެ. އެގޮތުން މެޗުގައި މޮޅު ކުޅުމެއް ދެއްކި އަލީ ހާފިޒް އާއި، އަލީ ޝިފާއު، ކޮންމެ ކުޅުންތެރިއަކު 4 ލަނޑު ކާމިޔާބުކޮއްދިން އިރު، ޝަހީމް އަބްދުލް ގާދިރު ވަނީ 3 ލަނޑު ކާމިޔާބުކޮށް ހެޓްރިކް ހަދާފައެވެ.

މެޗުގެ ފުރަތަމަ ހާފުވެސް ކުޑަހެންވޭރު ޔުނައިޓެޑުން ނިންމާލީ 4-0 ގެ ނަތީޖާއަކުން ކުރީގައި އޮވެގެންނެވެ. އެގޮތުން އެޓީމުގެ ފުރަތަ ލަނޑު 27 ވަނަ މިނެޓުގައި އެޓީމަށް ކާމިޔާބުކޮއްދިނީ އަލީ ހާފިޒް އެވެ. މި ލަނޑަށްފަހު ފުލުފުލުގައި އިތުރު 3 ލަނޑު ކާމިޔާބުކޮށް އެޓީމުން ވަނީ ލީޑު ފުޅާ ކޮއްފައެވެ. 2 ވަނަ ލަނޑާއި 3 ވަނަ ލަނޑު އަލީ ޝިފާއު ކާމިޔާބު ކޮއްދިންއިރު، 4 ވަނަ ލަނޑު ކާމިޔާބުކޮއްދިނީ ފުރަތަމަ ލަނޑުވެސް ކާމިޔާބުކޮއްދިން އަލީ ހާފިޒް އެވެ.

ދެވަނަ ހާފުގައި ކުޑަހެންވޭރު ޔުނައިޓެޑުގެ ފަރާތުން ފެނިގެންދިޔައީ އިތުރަށް ވަރުދަގަ ކުޅުމެކެވެ. އެގޮތުން އެޓީމުން ވަނީ ލިބުނު ފުރުސަތުތަކުގެ ބޭނުން ހިފައި އިތުރު ލަނޑުތަކެށް ކާމިޔާބުކޮއްފައެވެ. އެގޮތުން އަލީ ޝިފާއު ވަނީ 55 އަދި 57 ވަނަ މިނެޓުގައި އިތުރު ދެ ލަނޑު ކާމިޔާބުކޮއްދީފައެވެ. އޭގެ 5 މިނެޓު ފަހުން އަލީ ހާފިޒް ވެސް އިތުރު ލަނޑެށް ކާމިޔާބުކޮށް މެޗުގެ ނަތީޖާ 7-0 ބަދަލުކޮއްދީފައި ވަނިކޮށް މެކާނޯއިން ވަނީ ލިބުނު ފުރުސަތެއްގެ ބޭނުން ހިފައި ސުން ކަނޑުވާލާފަ އެވެ. މި ލަނޑު 67 ވަނަ މިނެޓުގައި ކާމިޔާބުކޮއްދިނީ ސުލްތާން ހަބީބް އެވެ.

އޭގެ ފަހުން އަނެއްކާވެސް އަލީ ހާފިޒް ކުޑަ ހެންވޭރަށް ލަނޑެށް ކާމިޔާބު ކޮއްދިންއިރު ޝަހީމް އަބްދުލް ގާދިރު ވަނި ކައިރި ކައިރީގައި 3 ލަނޑު ކާމިޔާބުކޮށް ހެޓްރިކް ފުރިހަމަ ކުރިއެވެ. މެޗުގެ ފަހު ލަނޑު ކުޑަހެންވޭރަށް ކާމިޔާބުކޮއްދިނީ 88 ވަނަ މިނެޓުގައި އަހްމަދު އަޝްފާން އެވެ.

މުބާރާތުގައި ބުރާސްފައި ދުވަހު ކުޅޭ މެޗުގައި ބައްދަލުކުރާނީ މަހިބަދޫ ސްޕޯޓްސް ކުލަބާއި ދަ ގްރާންޑެ ސަޕޯޓްސް ކުލަބެވެ. މުބާރާތުގައި ދަ ގްރާންޑޭ ކުޅުނު ފުރަތަމަ މެޗުން ޖޭޖޭ ސްޕޯޓް ކުލަބާ ވާދަކޮށް ބަލިވެފައި ވާއިރު މަހިބަދޫ ސްޕޯޓްސް ކުލަބު ވަނީ އެޓީމު ކުޅުނު ފުރަތަމަ މެޗުން މޭކާނޯގެ މައްޗަށް ކުރިހޯދާފަ އެވެ.