ރައީސް މުއިއްޒު ޔޫއޭއީގެ ރައީސަށް ފޯނުން ގުޅުއްވައިފި
13 އޯގަސްޓު 2026 | ބުރާސްފަތި 17:40ރާއްޖެއާއި ޔޫއޭއީގެ ގުޅުން އިތުރަށް ހަރުދަނާކޮށް، ތަރައްޤީގެ އެކި ދާއިރާތަކުން އެއްބާރުލުން ފުޅާކުރުމަށް ދެ ޤައުމުގެ ވެރިން މަޝްވަރާކުރައްވައިފި. މީގެ އިތުރުން ދެ ޤައުމުގެ ރައްޔިތުންގެ ލާބައަށްޓަކައި އެހީތެރިކަން ފޯރުކޮށްދެވޭނެ ގޮތްތަކާއި، ސަރަޙައްދީ ހަމަޖެހުން ޤާއިމުކުރުމާ ގުޅޭގޮތުންވެސް ދެ ބޭފުޅުން ވަނީ މަޝްވަރާ ކުރައްވާފައި
އެކުވެރި އަރަބި އިމާރާތުގެ ރައީސް، މުޙައްމަދު ބިން ޒައިދު އާލް ނަޙްޔާން | ގެޓީ އިމޭޖަސް
ޔޫއޭއީގެ ރައީސް ޝައިޚް މުޙައްމަދު ބިން ޒައިދު އަލް ނަޙްޔާންއަށް، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިއަދު ފޯނުން ގުޅުއްވައިފި އެވެ. މި ފޯނު ކޯލުގައި ދެ ޤައުމުގެ ދެމެދުގައި އޮތް ގުޅުމާ ގުޅޭގޮތުންނާއި، ދެ ފަރާތުގެ މަސްލަހަތު ހިމެނޭ ކަންކަމުގައި، ޚާއްޞަކޮށް އިޤްތިޞާދީ އަދި ތަރައްޤީގެ ދާއިރާއިން އެއްބާރުލުން އިތުރުކުރެވިދާނެ ގޮތްތަކާ ބެހޭގޮތުން ދެ ބޭފުޅުން ވަނީ މަޝްވަރާ ކުރައްވާފައި ކަމަށް ޔޫއޭއީގެ މީޑިއާ ތަކުން ރިޕޯޓުކޮށްފައިވެ އެވެ.
ޔޫއޭއީ އާއި ދިވެހިރާއްޖެއާ ދެމެދު އޮތް ގުޅުން އިތުރަށް ހަރުދަނާކުރުމަށާއި، ތަރައްޤީއަށް އަމާޒުކޮށްގެން އުފައްދާފައިވާ ގުޅުންތައް ފުޅާކުރުމަށް ދެ ޤައުމުގެ ވެރިން ވަނީ އެއްބަސްވެވަޑައިގެންފައި ކަމަށް މި ޚަބަރުގައިވެ އެވެ. މީގެ އިތުރުން، ދެ ޤައުމުގެ ރައްޔިތުންގެ ފުދުންތެރިކަމާއި ލާބައަށްޓަކައި އެހީތެރިކަން ފޯރުކޮށްދެވޭނެ އިތުރު ފުރުޞަތުތައް ހޯއްދެވުމާ ގުޅޭގޮތުންވެސް ދެ ބޭފުޅުން ވާހަކަފުޅު ދެއްކެވި އެވެ.
މި ވާހަކަތަކުގައި ދެ ޤައުމުގެ މަސްލަހަތު ހިމެނޭ އެކި މައްސަލަތަކާ ގުޅޭގޮތުން ޚިޔާލު ބަދަލުކުރައްވައި، ސަރަޙައްދީ ސަލާމަތާއި ހަމަޖެހުން ވަރުގަދަކުރުމަށް ކުރެވެމުންދާ މަސައްކަތްތަކާ ބެހޭގޮތުންވެސް ދެ ޤައުމުގެ ވެރިން ވަނީ މަޝްވަރާ ކުރައްވާފައި ކަމަށް މި ޚަބަރުގައިވެ އެވެ.
