ސްޕެއިންގެ އަތްދަށުން މިނިވަންވެ، ކެޓަލޯނިއާގެ ވަކި ދަޢުލަތެއް އުފެއްދުމަށް ކުރާ މަސައްކަތަށް ތާޢީދުކުރާ ބާސެލޯނާގެ ޑިފެންޑަރ ޖެރާޑް ޕީކޭ އަށް ސްޕެއިންގެ ޤައުމީ ޓީމުގެ ފަރިތަކުރުންތަކުގައި ފުރައްސާރަ ކޮށްފި އެވެ.

ފީފާ ވޯލްޑް ކަޕް ކޮލިފައިންގެ ފަހު ދެމެޗަށް ސްޕެއިންގެ ޤައުމީ ޓީމުގެ ފަރިތަކުރުންތައް ފަށާފައިވާއިރު، ސްޕެއިންގެ އަލިކާންޓޭގައި ބޭއްވި ޤައުމީ ޓީމުގެ ފަރިތަކުރުންތައް ބެލުމަށް ވަން ސަޕޯޓަރުން ވަނީ ޕީކޭ ދިއުމަށް ގޮވާލާ، އަޑުގަދަކޮށް ދިމާކޮށްފައެވެ.

ޕީކޭ ނިސްބަތްވާ ކެޓަލޯނިއާގެ މިނިވަން ދަޢުލަތެއް އުފެއްދުމަށް އާދީއްތަ ދުވަހު ނެގި ވޯޓުގައި ޕީކޭ ބައިވެރިވެފައިވާއިރު، އޭނާ އަކީ ކެޓަލޯނިއާގެ މިނިވަން ކަމަށް ތާއީދުކޮށް މީޑިއާގައި އެންމެ ބޮޑަށް ވާހަކަ ދައްކާ އެއް ކުޅުންތެރިޔާ އެވެ.

ޕީކޭ ވަނީ، ކެޓަލޯނިއާގައި އާދީއްތަ ދުވަހު ނެގި ވޯޓަށް ތާޢީދު ކުރުމަކީ މައްސަލަ އަކަށް ވާނަމަ، ރަޝިޔާގައި އަންނަ އަހަރު ބާއްވާ ފީފާ ވޯލްޑް ކަޕްގެ ކުރިން ސްޕެއިންގެ ޤައުމީ ޓީމަށް ކުޅުން ހުއްޓާލާނެ ކަމުގެ އިޝާރާތެއް ކޮށްފަ އެވެ.

ސްޕެއިންގެ ބާސެލޯނާ އަށް ކުޅޭ 30 އަހަރުގެ ޑިފެންޑަރ ވަނީ ސްޕެއިންގެ ޤައުމީ ޓީމަށް 91 މެޗު ކުޅެ، ފަސް ލަނޑު ޖަހައިދީފައެވެ. 2009 ވަނަ އަހަރުގެ ފަހުން ސްޕެއިންގެ ޑިފެންސް ލައިންގައި މުހިންމު ދައުރެއް އަދާ ކުރަމުން އަންނަ ޕީކޭ ވަނީ ސްޕެއިން އާއެކު 2010 ވަނަ އަހަރުގެ ފީފާ ވޯލްޑް ކަޕާއި، 2012 ވަނަ އަހަރުގެ ޔޫރޯ ފުޓްބޯޅަ މުބާރަތް ކާމިޔާބުކޮށްފަ އެވެ.

ފީފާ ވޯލްޑް ކަޕް ކޮލިފައިންގެ ގްރޫޕް ޖީގައި ހުކުރު ދުވަހު އަމިއްލަ ދަނޑުގައި ސްޕެއިން ނުކުންނާނީ އަލްބޭނިއާ އާއި ދެކޮޅަށެވެ. އަދި ގްރޫޕްގެ ފަހު މެޗުގައި ހޯމަ ދުވަހު ރަށުން ބޭރުގައި ނުކުންނާނީ އިސްރާއީލާއި ދެކޮޅަށެވެ.

ގްރޫޕް ޖީގައި ކުޅުނު އެއްވެސް މެޗަކުން ބަލިނުވެ، ގްރޫޕްގެ އެއްވަނާގައި ސްޕެއިން އޮތީ 22 ޕޮއިންޓް ހަމަކޮށްގެންނެވެ. ގްރޫޕް ސްޓޭޖްގައި ކުޅުނު ސްޕެއިން އަށް މެޗުގެ ތެރެއިން ހަތް މެޗު ކާމިޔާބު ކުރިއިރު، އެއް މެޗު ނިމިފައި ވަނީ އެއްވަރު ވެގެންނެވެ. 19 ޕޮއިންޓާއެކު ގްރޫޕްގެ ދެވަނާގައި އިޓަލީ އޮތްއިރު، ތިންވަނާގައިވާ އަލްބޭނިއާ އަށް ލިބިފައިވަނީ 13 ޕޮއިންޓެވެ.