އީރާންއާ ދެކޮޅަށް އެމެރިކާގެ ހަނގުރާމަމަތީ 20 އުޅަނދެއް މެދުއިރުމަތީގައި
10 އޯގަސްޓު 2026 | ހޯމަ 04:24މި އޮޕަރޭޝަން އަކީ އީރާން އިން ބޭރު ގައުމުތަކަށް މުދަލާއި ހަތިޔާރު ފޮނުވުން ހުއްޓުވުމަށާއި، އެ ގައުމަށް އެތެރެވާ އަދި ބޭރުވާ މުދާ ކޮންޓްރޯލް ކުރުމަށް އެމެރިކާ އިން ކުރިއަށްގެންދާ މަސައްކަތުގެ ބައެއް ކަމަށް މަސްރަހު ދިރާސާކުރާ ފަރާތްތަކުން ބުނޭ. އެމެރިކާގެ މި ހަރަކާތްތަކާ ގުޅިގެން މެދުއިރުމަތީގެ ކަނޑުގެ ސަރަހައްދުގައި ދަތުރުކުރާ އާންމު މުދާ އުފުލާ ބޯޓު ފަހަރަށް ބޮޑެތި ގޮންޖެހުންތަކާ ކުރިމަތިލާން ޖެހިފައިވާކަން ސެންޓްރަލް ކޮމާންޑުގެ ތަފާސް ހިސާބުތަކުން ހާމަވޭ
މެދުއިރުމަތީގައި އެމެރިކާގެ ކަނޑުގެ ސިފައިންގެ 18 މަނަވަރަކާ އެކު، ޔޫއެސްއެސް ޖޯޖް އެޗްޑަބްލިޔު ބުޝް (ސީވީއެން 77) ފޯމޭޝަނެއްގައި ދަތުރު ކުރަނީ | ރޮއިޓާސް
އީރާންއާ ދެކޮޅަށް އެމެރިކާ އިން އަޅާފައިވާ އިގްތިސާދީ އަދި އަސްކަރީ ދަތިކުރުމުގެ ފިޔަވަޅުތައް ވަރުގަދަކޮށް، އެ ގައުމާ ދެކޮޅަށް ހިންގާ ބްލޮކޭޑް ނުވަތަ މުދާ އުފުލުން ހުއްޓުވުމުގެ އޮޕަރޭޝަންތައް ވަރުގަދަ ކުރުމުގެ ގޮތުން އެމެރިކާގެ 20 އަށް ވުރެ ގިނަ ހަނގުރާމަމަތީ މަނަވަރު މެދުއިރުމަތީގެ ކަނޑުގެ ސަރަހައްދުތަކުގައި ހަރަކާތްތެރިވާން ފަށައިފި އެވެ.
އެމެރިކާގެ އަސްކަރިއްޔާ އިން މި ފިޔަވަޅު އަޅާފައިވަނީ މެދުއިރުމަތީގެ މަސްރަހު ނުތަނަވަސްވެފައިވާ ދަނޑިވަޅެއްގައި އެވެ.
އެމެރިކާގެ ސެންޓްރަލް ކޮމާންޑް އިން ހާމަކޮށްފައިވާ މައުލޫމާތުތަކަށް ބަލާއިރު، އާދިއްތަ ދުވަހުގެ ނިޔަލަށް އެމެރިކާގެ އަސްކަރިއްޔާ އިން ވަނީ މުދާ އުފުލާ 55 އަށް ވުރެ ގިނަ އުޅަނދެއްގެ މިސްރާބު ބަދަލު ކޮށްފައި އެވެ. މީގެ އިތުރުން، އެމެރިކާގެ އަމުރަށް ނުކިޔަމަންތެރިވި ދެ އުޅަނދެއްގެ އިންޖީނު ނުވަތަ ހަރަކާތްތެރިވުމުގެ ގާބިލުކަން ކަނޑުވާލާފައިވާއިރު، އިތުރު ދެ އުޅަނދަކަށް އެމެރިކާގެ ސިފައިން ވަނީ އަރާ ފާސްކޮށްފައި އެވެ.
މި އޮޕަރޭޝަން އަކީ އީރާން އިން ބޭރު ގައުމުތަކަށް މުދަލާއި ހަތިޔާރު ފޮނުވުން ހުއްޓުވުމަށާއި، އެ ގައުމަށް އެތެރެވާ އަދި ބޭރުވާ މުދާ ކޮންޓްރޯލް ކުރުމަށް އެމެރިކާ އިން ކުރިއަށްގެންދާ މަސައްކަތުގެ ބައެއް ކަމަށް މަސްރަހު ދިރާސާކުރާ ފަރާތްތަކުން ބުނެ އެވެ. އެމެރިކާގެ މި ހަރަކާތްތަކާ ގުޅިގެން މެދުއިރުމަތީގެ ކަނޑުގެ ސަރަހައްދުގައި ދަތުރުކުރާ އާންމު މުދާ އުފުލާ ބޯޓު ފަހަރަށް ބޮޑެތި ގޮންޖެހުންތަކާ ކުރިމަތިލާން ޖެހިފައިވާކަން ސެންޓްރަލް ކޮމާންޑުގެ ތަފާސް ހިސާބުތަކުން ހާމަވެ އެވެ.
އެމެރިކާގެ އަސްކަރީ މަނަވަރުތައް މެދުއިރުމަތީގައި މިހާރު ހަރަކާތްތެރިވަމުންދާ މިންވަރަކީ، ފަހުގެ ތާރީޚެއްގައި އެ ސަރަހައްދުގައި އެމެރިކާގެ އަސްކަރީ ބާރު މިހާ ވަރުގަދަ އަށް ދައްކާލި ފުރަތަމަ ފަހަރެވެ. މި ހަރަކާތްތަކުގެ ސަބަބުން ސަރަހައްދީ ރައްކާތެރި ކަމަށް ބުރޫ އަރާފާނެތީ ބައެއް ގައުމުތަކުން ދަނީ ކަންބޮޑުވުން ފާޅު ކުރަމުންނެވެ. ނަމަވެސް އެމެރިކާ އިން ބުނަމުން ދަނީ މިއީ ބައިނަލްއަގުވާމީ ކަނޑު ދަތުރުފަތުރުގެ ރައްކާތެރިކަން ކަށަވަރުކުރުމަށާއި، އީރާންގެ ނުފޫޒު ކުޑަ ކުރުމަށް ކުރާ މަސައްކަތެއް ކަމަށެވެ.
މި އޮޕަރޭޝަންތަކާ ގުޅިގެން އީރާން އިން އަދި ރަސްމީކޮށް އެއްޗެއް ބުނެފައި ނުވި ނަމަވެސް، މީގެ ކުރިން އީރާން އިން ވަނީ އެ ގައުމުގެ ކަނޑުގެ ސަރަހައްދާ ގާތަށް ބޭރުގެ އަސްކަރީ ބާރުތަކުން އައުމަކީ ބަލައި ގަނެވޭނެ ކަމެއް ނޫން ކަމަށް ބުނެ އިންޒާރު ދީފައި އެވެ. އެމެރިކާގެ މި ފިޔަވަޅުތަކާ އެކު ކުރިއަށް އޮތް ދުވަސްތަކުގައި މެދުއިރުމަތީގެ މަސްރަހު އިތުރަށް ހޫނުވެގެން ދާނެ ކަމަށް ބެލެވެ އެވެ.
މަސްދަރު: އަލް ޖަޒީރާ
