އީރާންގެ ސުޕްރީމް ސެކިއުރިޓީ ކައުންސިލްގެ ވެރިޔަކަށް މުހްސިން ރެޒާއީ އައްޔަން ކުރައްވައިފި

އީރާންގެ އެންމެ އިސް ޤައުމީ ސަލާމަތީ އިދާރާ ކަމަށްވާ، ސުޕްރީމް ނޭޝަނަލް ސެކިއުރިޓީ ކައުންސިލްގެ ވެރިޔަކަށް މުހްސިން ރެޒާއީ ހަމަޖައްސަވައިފި އެވެ.

އުމުރުން 71 އަހަރުގެ ރެޒާއީ އަކީ، މީގެ ކުރިން އީރާންގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ)ގެ ކުރީގެ ކޮމާންޑާ އިން ޗީފް އެވެ. ސުޕްރީމް ނޭޝަނަލް ކައުންސިލްގެ ވެރިޔަކަށް ރެޒާއީ ހަމަޖެއްސެވިކަން އީރާންގެ ރިޔާސީ އޮފީހުން ވަނީ އާދީއްތަ ދުވަހު އިއުލާން ކޮށްފައި އެވެ. 

ރިޔާސީ އޮފީހުގެ ތަރުޖަމާން މެހްދީ ތަބާތަބާއީ އެކްސްގައި ވިދާޅުވީ، މުޙައްމަދު ބާގިރު ޒޮލްގަދުރު ސުޕްރީމް ނޭޝަނަލް ސެކިއުރިޓީ ކައުންސިލްގެ ސެކްރެޓަރީ މަޤާމުން އިސްތިއުފާ ދެއްވައި، އައު މަސައްކަތްތަކަށް އައްޔަންކުރުމާ ގުޅިގެން، އީރާންގެ ރައީސް މަސްއޫދު ޕެޒެޝްކިއާން، މުހްސިން ރެޒާއީ އެ އިދާރާގެ ވެރިޔަކަށް ހަމަޖައްސަވައިފައިވާ ކަމަށެވެ.

މީގެ ކުރިން ރެޒާއީ ވަނީ، 1981 ވަނަ އަހަރުން ފެށިގެން، 1997 ވަނަ އަހަރާ ހަމައަށް އައިއާރުޖީސީގެ އިސްވެރިޔާގެ މަޤާމުގައި ހުންނަވައިފަ އެވެ. އެ މުއްދަތުގައި އީރާން އާއި އިރާޤްއާ ދެމެދު ހިނގި ހަނގުރާމަ އަކީ ފާހަގަކޮށްލެވޭ ހަނގުރާމަ އެކެވެ. އޭގެ ފަހުން ރެޒާއީ ވަނީ އީރާންގެ ސިޔާސީ މަސްރަހުގައި ގިނަ މަޤާމުތަކެއް އަދާ ކުރައްވައިފަ އެވެ. 

މީގެ އިތުރުން ރެޒާއީ ވަނީ، އީރާންގެ މިހާރުގެ ރޫހީ ލީޑަރު މުޖުތަބާ ޚާމަނާއީގެ ސިފައިންގެ މަޝްވަރާދޭ ބޭފުޅަކަށް ވެސް ހުންނަވައިފަ އެވެ. އީރާން އާއި އެމެރިކާއާ ދެމެދު ހިނގަމުން އަންނަ ހަނގުރާމައިގެ ތެރޭގައި، ހުރްމުޒް ކަނޑުއޮޅީގެ ކޮންޓްރޯލް އޮތުމަކީ އެޓޮމިކް ބޮމެއް އޮތުން ފަދަ މުހިންމު ކަމެއް ކަމަށް ވެސް، މިދިޔަ ޖުލައި މަހުގެ ތެރޭގައި ރެޒާއީ ވަނީ ވިދާޅުވެފައި އެވެ. 

މި ބަދަލުތަކަކީ އީރާނުގެ ސަލާމަތާއި ރައްކާތެރިކަމުގެ ދާއިރާގައި ކުރިއަށް އަންނަ މުހިންމު ބަދަލުތަކެކެވެ. ސުޕްރީމް ނޭޝަނަލް ސެކިއުރިޓީ ކައުންސިލް އަކީ އީރާންގެ ޤައުމީ ސަލާމަތާ ބެހޭ ހުރިހާ ކަންކަމުގައި ނިންމުންތައް ނިންމާ އެންމެ އިސް އިދާރާ އެވެ. މި އިދާރާ އިން ނިންމާ ނިންމުންތަކަށް ރޫހީ ލީޑަރުގެ ހުއްދަ ލިބިގެން ތަންފީޒުކުރެވެ އެވެ.