ތައިލެންޑުގެ ސްކޫލެއްގައި ދަރިވަރަކު ބަޑިޖަހައި ޓީޗަރަކު މަރާލައި، ގިނަ އަދަދެއްގެ ދަރިވަރުން ޒަޚަމްކޮށްލައިފި

ތައިލެންޑުގެ ސްކޫލެއްގައި ދަރިވަރަކު ބަޑިޖަހައި ޓީޗަރަކު މަރާލައި، ގިނަ އަދަދެއްގެ ދަރިވަރުން ޒަޚަމްކޮށްލާފައިވާ ކަމަށް އެ ގައުމުގެ ކަމާބެހޭ އިދާރާތަކުން ބުނެފި އެވެ.

މި ހާދިސާ ހިނގާފައިވަނީ ބެންކޮކާ އިންވެގެން އޮންނަ ނޮންތަބޫރީ ޕްރޮވިންސްގެ ބެންގް ކްރުއައި ޑިސްޓްރިކްޓްގައި ހުންނަ "ޑެބްސިރިން ނޮންތަބޫރީ ސްކޫލް" ގަ އެވެ.

ހަމަލާދިން މީހާ ސްކޫލް ތެރޭގައި އުޅެމުންދިޔަ ވަގުތު ފުލުހުން އެ ސަރަހައްދަށް ގޮސް ހަރަކާތްތެރިވަމުން ދިޔައިރު، އެތައް މިނެޓެއް ވަންދެން އެ ސަރަހައްދު އޮތީ ނުރައްކާތެރި ހާލަތެއްގަ އެވެ.

ހަމަލާދިން ކަމަށް ތުހުމަތުކުރެވޭ މީހާ އަމިއްލައަށް މަރުވެފައިވާ ކަމަށާއި، މި ހާދިސާގައި ޒަޚަމްވީ ޓީޗަރަކާއި ތިން ދަރިވަރުންނަށް ކަމަށް ނޮންތަބޫރީ ޕްރޮވިންޝަލް ޕޮލިސް ކޮމާންޑަރު ލެފްޓިނަންޓް ކާނަލް ދެޗްރަޕީ ކޮންގްޑީ ރޮއިޓާސްއަށް މައުލޫމާތު ދެއްވާފައިވެ އެވެ.

ހަމަލާ ބަދަލުކުރަމުންދިޔަ ވަގުތު، ރައްކާތެރި ތަންތަނުގައި ފިލައި ތިބުމަށާއި ކަމާބެހޭ ފަރާތްތަކުގެ އެހީތެރިކަމަށް މަޑުކުރުމަށް ފުލުހުން ވަނީ އިލްތިމާސްކޮށްފަ އެވެ. ފުލުހުން ފޭސްބުކް މެދުވެރިކޮށް ދިން އަދާހަމަ މައުލޫމާތުގައި ބުނެފައިވަނީ، ހަމަލާދިން މީހާ ހުރީ ސްކޫލުގެ ކޮމްޕިއުޓަރު ރޫމުގައި ކަމަށް ރިޕޯޓްތައް ލިބިފައިވާ ކަމަށެވެ.

ހާދިސާ ހިނގި ސަރަހައްދަށް އެމްބިއުލާންސްތައް ދިޔަ ވަގުތު، ބިރުން ސަލާމަތްވާން ދަރިވަރުން ސްކޫލުން ބޭރަށް ދުވާ މަންޒަރު ފެންނަ ފޮޓޯތައް ވަނީ އާންމުވެފަ އެވެ. މީގެ އިތުރުން، އެމްބިއުލާންސްގެ ބޭރުގައި ސްޓްރެޗަރެއްގައި މީހަކު ބާއްވާފައި އޮތްއިރު، ސިއްހީ އެހީތެރިއަކު އެހެން މީހަކަށް ފަރުވާދޭ މަންޒަރު ފެންނަ ފޮޓޯއެއްވެސް އާންމުވެފައިވެ އެވެ.

އުމުރުން 18 އަހަރުގެ ދަރިވަރަކު ބުނި ގޮތުގައި، ފުރަތަމަ އޭނާއަށް ހީވީ އެއީ ބަޑިބޭސް ކުޅޭ އެއްޗެއް ގޮވާ އަޑު ނުވަތަ މީހަކު އެއްޗެއްގައި ބާރަށް ޖަހާ އަޑު ކަމަށެވެ.

"ފުރަތަމަ އެއީ ބަޑިއެއް ކަމަކަށް ހީއެއް ނުކުރަން،" އޭނާ ރޮއިޓާސްއަށް ކިޔައިދިނެވެ. "ވަރަށް ގިނަ ފަހަރު ބަޑިޖެހި އަޑު އިވުނު. ދެން ހިމޭންވި. އޭގެ ފަހުން އަނެއްކާވެސް ބަޑިޖަހަން ފެށީ."

ލޯކަލް މީޑިއާ ރިޕޯޓްތައް ބުނާ ގޮތުގައި، ހަމަލާދިން ކަމަށް ތުހުމަތު ކުރެވެނީ އެ ސްކޫލުގެ ނުވަވަނަ ގްރޭޑްގައި ކިޔަވާ ދަރިވަރެކެވެ. 

މި ހާދިސާ ހިނގަމުންދިޔަ ވަގުތު، އެ މަންޒަރުތައް ލައިވްސްޓްރީމް ނުކުރުމަށް އާންމުންނާއި މީޑިއާތަކަށް ފުލުހުން އިލްތިމާސްކުރި އެވެ. އަދި ފުލުހުން ވަނީ ސްކޫލުގައި ތިބި ޓީޗަރުންނާއި ދަރިވަރުން އެތަނުން ނެރެ ރައްކާތެރި ސަރަހައްދުތަކަށް ބަދަލުކޮށްފަ އެވެ.

ހުކުރު ދުވަހު ހިނގި މި ހާދިސާއަކީ މިއަހަރު ތެރޭގައި ތައިލެންޑުގެ ސްކޫލެއްގައި ހިނގި ބަޑިޖެހުމުގެ ދެވަނަ ބޮޑު ހާދިސާއެވެ. މިދިޔަ ފެބްރުއަރީ މަހު، ސޮންގްކްލާ ޕްރޮވިންސްގެ ހަޓް ޔައި ޑިސްޓްރިކްޓްގައި ހުންނަ "ޕަޓޮންގްޕްރަތަންކިރިވަތު ސްކޫލް" އަށް 17 އަހަރުގެ ކުއްޖަކު ވަދެފައިވަނީ ފުލުހެއްގެ އަތުން ބަޑިއެއް ވަގަށް ނަގައިގެންނެވެ.

އެ ހާދިސާގައި އެ ދަރިވަރު ވަނީ ސްކޫލުގެ ޑިރެކްޓަރަށާއި އަންހެން ދަރިވަރަކަށް ބަޑިން ހަމަލާދީ، ބައެއް ޓީޗަރުންނާއި ދަރިވަރުން ރަހީނުކޮށްފަ އެވެ. އެ ހާދިސާގައި ސްކޫލް ޑިރެކްޓަރު މަރުވިއިރު، ހަމަލާދިން ކުއްޖާ ފަހުން ފުލުހުން ވަނީ ހައްޔަރުކޮށްފަ އެވެ.

ތައިލެންޑަކީ ބަޑި ގެންގުޅުމާ ބެހޭ ހަރުކަށި ގާނޫނުތަކެއް އޮންނަ ގައުމެކެވެ. އެގޮތުން ގަވާއިދާ ޚިލާފަށް ހަތިޔާރު ގެންގުޅޭ މީހުން 10 އަހަރަށް ޖަލަށްލުމުގެ އަދަބު ކަނޑައެޅިފައިވެ އެވެ. ނަމަވެސް، ޔުނިވާސިޓީ އޮފް ސިޑްނީގެ ސްކޫލް އޮފް ޕަބްލިކް ހެލްތުގެ ތަފާސްހިސާބުތައް ދައްކާ ގޮތުގައި، އެ ގައުމުގައި އާންމުންގެ އަތުގައި 10 މިލިއަނަށްވުރެ ގިނަ ބަޑި އޮވެ އެވެ. މިއީ އެ ސަރަހައްދުގެ ގައުމުތަކާ އަޅާބަލާއިރު އާންމުންގެ އަތުގައި އެންމެ ގިނައިން ބަޑި ހުރި އެއް ގައުމެވެ.