މިއަދު ޑޮލަރުގެ އަގު ހުރި ހިސާބު ޚުދު ރައީސް މުއިއްޒަށް ވެސް އެނގިވަޑައިނުގަންނަވާ: ކުރީގެ މެންބަރު ޝިފާއު
8 އޯގަސްޓު 2026 | ހޮނިހިރު 14:48ރާއްޖޭގެ އިގްތިސާދީ ހާލަތު ގޯސްވެ ތަކެތީގެ އަގު އުފުލެމުންދާތީ، ސަރުކާރުގެ ސިޔާސަތުތަކަށް ފާޑުކިޔުމަށް އެމްޑީޕީން "ދަތިވެއްޖެ" ނަމުގައި މުޒާހަރާއެއް ބޭއްވުމަށް ވަނީ ނިންމައިފައި. މި މަހުގެ 13 ވަނަ ދުވަހު ބާއްވާ މި ހަރަކާތަކީ ރައްޔިތުންގެ އަސާސީ ހައްގުތަކާއި މާލީ ދަތިތަކާ ގުޅޭގޮތުން އަޑުއުފުލުމަށް ބާއްވާ އެއްވުމެއް ކަމަށް އެ ޕާޓީން ބުނޭ
"ދަތިވެއްޖެ" ޕިކަޕް ޖަލްސާގައި، ރައްޔިތުންގެ މަޖިލީހުގެ އިހަވަންދޫ ދާއިރާގެ ކުރީގެ މެންބަރު މުހައްމަދު ޝިފާއު ވާހަކަދައްކަވަނީ | ރާއްޖެއެމްވީ
މައްޗަށް ނުދާނެ ކަމަށް މި ސަރުކާރުން ތަކުރާރުކޮށް ބުނަމުންދާ ޑޮލަރުގެ އަގު ހުރި ހިސާބު ޚުދު ރައީސް ޑރ. މުހައްމަދު މުއިއްޒަށް ވެސް އެނގިވަޑައި ނުގަންނަވާ ކަމަށް ރައްޔިތުންގެ މަޖިލީހުގެ އިހަވަންދޫ ދާއިރާގެ ކުރީގެ މެންބަރު މުހައްމަދު ޝިފާއު ވިދާޅުވެއްޖެ އެވެ.
ހޮނިހިރު ދުވަހު އެމްޑީޕީ އިން ބޭއްވި "ދަތިވެއްޖެ" ޕިކަޕް ޖަލްސާގައި ވާހަކަ ދައްކަވަމުން ޝިފާއު ވިދާޅުވީ ރައީސް މުއިއްޒާއި އެމަނިކުފާނުގެ ސަރުކާރުން ދިވެހި މާލިއްޔަތު، ބޭނުން ގޮތަކަށް ބޭނުން މިންވަރަކަށް ލޫޓުވަމުން ދާއިރު ދިވެހި ރައްޔިތުން ތިބީ ވަރަށް ހާލުގައި ކަމަށެވެ. ޝިފާއު ވިދާޅުވީ ރައީސްއާ އެމަނިކުފާނަށް ރާއްޖޭގެ މާލިއްޔަތު މެނޭޖްކުރަން ވެސް އަދި އިގްތިސާދު މެނޭޖް ކުރަން ވެސް އެނގިވަޑައިނުގަންނަވާ ކަމަށާއި މިއަދު ފެންނަނީ އެ މަންޒަރު ކަމަށެވެ.
ޝިފާއު ވިދާޅުވީ މިއަދު ދިވެހީން އަމަލު ކުރަމުން މިދާ ގާނޫނު އަސާސީ ދިވެހި ރައްޔިތުން ހޯދީ ވަރަށް ބޮޑެތި އުއްމީދުތަކަކާއެކުގައި ކަމަށެވެ. އޭރު ދިވެހި ރައްޔިތުންނަށް ލިބިފަހުރި ބައިވަރު ހައްގުތާއި އެތައް ބައިވަރު ކުރިއެރުންތަކެއް ހޯދުމަށްޓަކައި އަދި ރައްޔިތުންގެ ވެރިކަމުގެ ނިޒާމަކަަށް ބަދަލުކޮށްގެން ހޯދި ގާނޫނު އަސާސީ އިން ކަށަވަރު ކޮށްދޭ ހައްގުތައް ދިވެހީން ހިމާޔަތް ކުރާނެ ކަމަށް ވެސް އޭނާ ވިދާޅުވި އެވެ.
ތަކެތީގެ އަގު މިއަދު ހުރީ އަތްފޯރާ ވަރަށް ވުރެ މާ މަތީގައި ކަން ފާހަގަ ކުރައްވާ ޝިފާއު ވިދާޅުވީ ޑޮލަރުގެ އަގު ހުރި ހިސާބު ޚުދު ރައީސް އަށް ވެސް އެނގިވަޑައިނުގަންނަވާ ކަމަށެވެ.
ޒުވާނުން ބިޑިއަށް ތިރިިކުރި ގޮތަކަށް ރައްޔިތުން މި ދަނީ ލޯ ނާށިގަނޑަށް ތިރި ކުރަމުން. މިއަދު ރައްޔިތުންނަށް އޮތީ، ނުފުދޭތީ، ލިބޭ އެއްޗަކުން އަނގަޔާއި އަތާ ދިމާ ނުވާތީ ނާށިގަނޑު ހިފައިގެން ސަލާމް ޖަހަން ނުކުތުން. ޑރ. މުއިއްޒު ދިވެހި ރައްޔިތުން މި ގެންދަނީ ޚުދުމުޚުތާރު، ނުބައި ނުލަފާ ވެރިއެއްގެ އަޅުވެތި ކުރުމުގެ ނިޒާމަށް. ރައްޔިތުންގެ އެންމެ އަސާސީ ކަންކަން ވެސް ލިބޭ އެއްޗަކުން ނުފުދި، ސިޔާސީ މީހުންގެ ކައިރިން ސަލާމް ޖަހަން މަޖުބޫރު ކުރުވައި އުސޫލުން މިއަދު ރައްޔިތުން ބައްޓަން ކުރަން ޑރ. މުއިއްޒު ބޭނުންފުޅު ވަނީމުހައްމަދު ޝިފާއު
ޝިފާއު ވިދާޅުވީ ތާރީޚުން ފެންނަ ގޮތުގައި ދިވެހިންނަކީ އަމިއްލަ ހައްގުތަށް ހޯދުމަށް ނުކުތުމަށް ހިތްވަރު ހުރި ބައެއްކަން އަބަދުވެސް ހާމަވެފައިވާ ކަމަށެވެ. ދިވެހީންގެ ހައްގުތައް ގެއްލި، ބަނޑުހައިހޫނުކަމުގައި ތިބެން ޖެހުނީމާ ގެތަކުގައި ނުތިބޭނެ ކަން ފާހަގަ ކުރައްވާ ޝިފާއު ވިދާޅުވީ އޮގަސްޓް 13 ވަނަ ދުވަހު މަގުތަކަށް ދިވެހީން ނުކުންނަނީ ހައްގުތައް ގެއްލިގެން ކަމަށެވެ.
ތަކެތީގެ އަގު އުފުލުމާއި ރައްޔިތުންނަށް ދިމާވަމުންދާ ދަތިތަކާއި ގުޅިގެން އަޑު އުފުލުމަށް "ދަތިވެއްޖެ" ނަމުގައި އެމްޑީޕީ އިން ކުރަން ނިންމާފައިވާ މުޒާހަރާ އޮންނާނީ 13 އޮގަސްޓް ވާ ބުރާސްފަތި ދުވަހުގެ ރޭ 8:30 ގައި ކަމަށް އެ ޕާޓީން ބުނެ އެވެ. އަދި މި މުޒާހަރާ ފެށުމަށް ހަމަޖެހިފައި ވަނީ ސޯޝަލް ސެންޓަރު ކުރިމަތިން މަޖީދީ މަގުންނެވެ.
