ފޯޅަވަހީގެ މައްސަލަ ބައިނަލް އަގުވާމީ ކޯޓަށް ވެއްދޭނެ ތާރީޚެއް ނޭނގޭ: ބަންޑާރަނައިބުގެ އޮފީސް
6 އޯގަސްޓު 2026 | ބުރާސްފަތި 16:43ފޯޅަވައްސަކީ ދިވެހިންގެ ތަނެއްކަން ސާބިތުކޮށްދޭނެ ތާރީޚީ ހެކިތައް ހުރިކަމަށް ރައީސް ޑރ. މުއިއްޒު ވިދާޅުވި ނަމަވެސް، އެ މައްސަލަ ބައިނަލްއަގުވާމީ ކޯޓަށް ހުށަހެޅޭނެ ވަކި ތާރީޚެއް އަދި ކަނޑައެޅިފައި ނުވާކަމަށް ބަންޑާރަނައިބުގެ އޮފީހުން ބުނެފި. މި މައްސަލައިގައި ބައިނަލްއަގުވާމީ މާހިރުންނާއެކު މަޝްވަރާތައް ކުރިއަށްދާއިރު، މައްސަލަ ހުށަހެޅުމުގެ ޓައިމްލައިނެއް އެނގޭނީ އެ މަޝްވަރާތަކަށް ފަހުގައި ކަމަށްވެސް ބަންޑާރަނައިބުގެ އޮފީހުން ބުނި
2026 މާރިޗު 24 ވަނަ ދުވަހު، ފޯސް ރިކޮނަސަންސް ޕްލެޓޫންގެ 31 ވަނަ މެރިން އެކްސްޕެޑިޝަނަރީ ޔުނިޓަށް ނިސްބަތްވާ އެމެރިކާގެ މެރިން ސިފައިން ރިކޮނަސަންސް އެންޑް ސަވައިލަންސް ތަމްރީނުތައް ޑިއެގޯ ގާސިއާ ގައި ކުރިއަށް ގެންދަނީ | ގެޓީ އިމޭޖަސް
ދިވެހިންގެ ތަނެއް ކަމަށް ތަކުރާރުކޮށް ރައީސް ޑރ. މުހައްމަދު މުއިއްޒު ވިދާޅުވަމުން ގެންދަވާ ރާއްޖޭގެ ދެކުނުން އޮންނަ ފޯޅަވަހި ރާއްޖެ އަށް ހޯދުމުގެ މައްސަލަ ބައިނަލް އަގްވާމީ ކޯޓަށް ވެއްދޭނެ ތާރީޚެއް ނޭނގޭ ކަމަށް ބަންޑާރަނައިބުގެ އޮފީހުން ބުނެފި އެވެ.
ރައީސް ޑރ. މުއިއްޒު ވިދާޅުވެފައިވަނީ ފޯޅަވައްސަކީ ދިވެހިންގެ ތަނެއް ކަމީ "އެއްވެސް ޝައްކެއްވެސް އޮތް ކަމެއް ނޫން،" ކަމަށެވެ. ރައީސް ވިދާޅުވެފައިވަނީ، އެތަނަކީ ކުރީ ޒަމާނުގައި ދިވެހި ރައްޔިތުންގެ ތަނެއް ކަމަަށާއި، "ދިވެހިރާއްޖޭގެ ސަރަޙައްދުގެ ތެރޭގައި ހިމެނިފައި އޮތް ތަނެއްކަން އެއީ ފެންނާން އޮތް ޙަޤީޤަތެއް،" ކަމަށެވެ.
ރާއްޖެޓީވީގެ ސުވާލަކަށް އޮގަސްޓް މަހުގެ 6 ވަނަ ދުވަހު ލިޔުމުން ފޮނުވާފައިވާ ޖަވާބުގައި ބަންޑާރަނައިބުގެ އޮފީހުން ބުނެފައިވަނީ، ފޯޅަވަހީގެ މައްސަލައިގައި ބައިނަލްއަގްވާމީ މާހިރުން އައްޔަނު ކުރެވި އެ މައްސަލަ އާ ގުޅޭ ގޮތުން އެފަރާތްތަކާ މަޝްވަރާކުރެވުމުންދާ ކަމުގަ އެވެ.
އެހެން ނަމަވެސް އެ މައްސަލައިގައި ކުރިއަށްދާނެ ގޮތުގެ ޓައިމްލައިން އެއް އެނގޭނީ އެ ފަރާތްތަކާ އެކު ކުރިއަށް ގެންދެވޭ މަޝްވަރާތަކަށް ފަހުގައި ކަމަށެވެ.
ބަންޑާރަނައިބު އޮފީހުން އިތުރަށް ބުނެފައިވަނީ، އެ މަޝްވަރާތަކަށް ފަހު އެ މައްސަލަ ބައިނަލްއަގްވާމީ ކޯޓަށް ހުށަހެޅުމުގެ މަރުހަލާ ކުރިއަށް ގެންދެވޭނެ ކަމަށެވެ.
"މި ވަގުތު އެ މައްސަލައާ ގުޅޭ މަޝްވަރާ ކުރިއަށްދާތީ، އެ މައްސަލަ ބައިނަލް އަގްވާމީ ކޯޓަށް ވެއްދޭނެ ވަކި ތާރީޚެއް ކަނޑައެޅިފަ އެއް ނުވޭ."
މައްސަލަ ކޯޓަށް ވެއްދޭނެ ތާރީޚެއް ކަނޑައެޅިފައި ނެތް ކަމަށް ބަންޑާރަނައިބުގެ އޮފީހުން ބުނިއިރު، ރައީސް މުއިއްޒު ކުރިން ވިދާޅުވެފައިވާ ގޮތުގައި އެތަނަކީ ދިވެހިންނާ ގުޅުންހުރި ތަނެއްކަމުގެ ތާރީޚީ ހެކިތައް ފެންނަން އެބަހުއްޓެވެ. އޭގެ ހެއްކެއްގެ ގޮތުގައި އެމަނިކުފާނު ވިދާޅުވީ، ފޯޅަވަހީގެ ޗާޓަކާ އެކު 9 ވަނަ ޙަސަން ރަސްގެފާނު 16 ވަނަ ޤަރުނުގައި ލިޔުއްވާފައިވާ ސިޓީފުޅެއް އެބައޮތްކަމުގަ އެވެ.
ހުސްވި ހަފްތާގައި ޕީއެސްއެމް އިން ގެނެސްދިން "ނޭޝަންސް ޗެޓް" ޕްރޮގްރާމުގައި މުއިއްޒު ވިދާޅުވީ، ފޯޅަވަހި ލިބުން ހައްގުވެރި ޤައުމަކާ އެތަން ހަވާލުކުރާނަމަ، އެތަން ލިބެން ޖެހޭނީ ދިވެހިރާއްޖެއަށް ކަމަށެވެ. އެހެންނަމަވެސް ރައީސް މުއިއްޒު ވަނީ، މިހާރު ފޯޅަވަހި އޮތްގޮތަށް އިނގިރޭސި ސަރުކާރުގެ ބެލުމުގެ ދަށުގައި އޮތުން އެއީ އެންމެ ރަނގަޅު ކަމެއް ކަމަށެވެ.
ރައީސް މުއިއްޒު މިހެން ވިދާޅުވި އިރު، މިއަހަރަށް ރައްޔިތުންގެ މަޖިލީސް ހުޅުވުމަށް ބޭއްވި ޖަލްސާގައި ވިދާޅުވެފައިވަނީ، ދިވެހިންގެ ބިމުން އެންމެ ވެލިފުކެއްގެ މިންވަރު ވިޔަސް އަދި ރާއްޖޭގެ ސަރަހައްދުން އެންމެ އިންޗިއެއް ވިޔަސް ދޫކޮށް ނުލައްވާނެ ކަމަށެވެ.
ފޯޅަވަހި ދިވެހިރާއްޖެ އަށް ހޯދުމުގެ މައްސަލަ ހުށަހަޅަނީ ބައިނަލްއަގްވާމީ ކޮން ކޯޓަކަށް ކަމެއް ބަންޑާރަ ނައިބުގެ އޮފީހުން ބުނެފައެއް ނުވެ އެވެ.
ބައިނަލްއަގުވާމީ އަދުލު އިންސާފާ ބެހޭ ކޯޓު (އައިސީޖޭ) އިން 2019 ވަނަ އަހަރު ނިންމާފައިވަނީ، މޮރިޝަސްގެ އިހުތިސާސްގެ ތެރޭގައި ހިމެނޭ ޗާގޯސް އާކިޕެލަގޯ ނުވަތަ ފޯޅަވަހި، އެ ގައުމާ ވަކިކުރުމަށް އިނގިރޭސިވިލާތުން ނިންމި ނިންމުމަކީ ގާނޫނާ ހިލާފު ނިންމުމެއް ކަމަށާއި، އެ ރަށްތަކުގެ ކޮންޓްރޯލް އިނގިރޭސިވިލާތުން ދޫކޮށްލަންޖެހޭނެ ކަމަށެވެ. މި ނިންމުމާ ގުޅިގެން، ޗާގޯސްގެ ސިޔާދަތީ ބާރު މޮރިޝަސްއާ ހަވާލުކުރުމަށް އިނގިރޭސިވިލާތުން ވަނީ އެއްބަސްވެފަ އެވެ. ނަމަވެސް، މި އެއްބަސްވުމުގެ ދަށުން ޑިއޭގޯ ގާސިއާގައި ގާއިމުކޮށްފައިވާ އިނގިރޭސިވިލާތާއި އެމެރިކާގެ އަސްކަރީ މަރުކަޒު ހިންގުމަށްޓަކައި، އެ ރަށް 99 އަހަރުގެ މުއްދަތަށް އިނގިރޭސިވިލާތުން ކުއްޔަށް ހިފުމަށް ވަނީ ނިންމާފަ އެވެ.
އދ. ގެ އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އައިޓީއެލްއެސް) ގެ ފަނޑިޔާރުންގެ ބެންޗުން ވަނީ، އިނގިރޭސިވިލާތުގެ ކުރީގެ އިސްތިއުމާރީ ބާރުގެ ދަށުގައި އޮތް މޮރިޝަސްއާ އެ ސަރަހައްދު ހަވާލުކުރުމަށް އދ. ގެ އާންމު މަޖިލީހުގެ ބޮޑު އަގުލަބިއްޔަތަކުން ފާސްކުރި ގޮތަށް، 2019 ވަނަ އަހަރުގެ ޑިސެމްބަރު މަހުގެ ނިޔަލަށް އެކަން ކޮށްފައި ނުވާތީ އެކަމަށް ވަރަށް ބޮޑަށް ފާޑުވިދާޅުވެފަ އެވެ.
ޗާގޯސްގެ މައްސަލައިގައި ގާނޫނީ ލަފައެއް ހޯދުމަށް އދ. އިން އައިސީޖޭއަށް ހުށަހެޅުމުން، 2019 ވަނަ އަހަރު އެ ކޯޓުން ވަނީ އިނގިރޭސިވިލާތާ ދެކޮޅަށް އިއްތިފާގުން ހުކުމްކޮށްފަ އެވެ. އެ ހުކުމުގައި ބަޔާންކޮށްފައިވަނީ އިނގިރޭސިވިލާތުން ބައިނަލްއަގުވާމީ ގާނޫނުތަކާ ހިލާފުވެފައިވާ ކަމަށާއި، މޮރިޝަސްއާ ގުޅޭގޮތުން ކުރިއަށްދާ "އިސްތިއުމާރީ ބާރުތައް ދޫކޮށްލުމުގެ" މަރުހަލާ ނިންމުމަށްޓަކައި އިނގިރޭސިވިލާތުން ވަގުތުން ފިޔަވަޅު އަޅަންޖެހޭނެ ކަމަށެވެ.
