ރައީސް ޔާމީނުގެ ވެރިކަމުގައި ގިނަ ރޭރޭ ހޭދަކުރީ ތާސްކުޅުމުގައި، އޭރުގައި ދައުލަތް ހިންގީ ހައުސިންގ މިނިސްޓްރީ ތެރެއިން: މެންބަރު ޝުޖާއު
6 އޯގަސްޓު 2026 | ބުރާސްފަތި 17:53ރައީސް ޔާމީނުގެ ވެރިކަމުގައި ތަރައްގީގެ ހުރިހާ މަޝްރޫއުތަކެއް ހިންގަވާ މުޅި ދައުލަތް އޮޕަރޭޓްކުރެއްވީ އޭރުގެ ހައުސިންގ މިނިސްޓަރު ޑރ. މުއިއްޒު ކަމަށް ބާރަށު ދާއިރާގެ މެންބަރު ޝުޖާއު ވިދާޅުވެއްޖެ. އޭރު ޕާޓީ ހިންގުމުގެ ބަދަލުގައި އޮތީ މެޑަމް އޮފީހެއް ކަމަށް ވެސް ޝުޖާއު ވިދާޅުވި
މެންބަރު ޝުޖާއު ޕީއެންސީ ހަރުގެ ޖަލްސާގައި ވާހަކަދައްކަވަނީ | ޕީއެންސީ
ރައީސް ޔާމީނުގެ ވެރިކަމުގައި ގިނަ ރޭރޭ އެމަނިކުފާނު ހޭދަކުރެއްވީ ތާސްކުޅުއްވުމުގައި ކަމަށާއި އޭރު ދައުލަތް ހިންގީ ހައުސިންގ މިނިސްޓްރީ ތެރެއިން ކަމަށް ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އިބްރާހީމް ޝުޖާއު ވިދާޅުވެއްޖެ އެވެ.
ބުދަ ދުވަހު ރައީސް ޑރ. މުހައްމަދު މުއިއްޒުގެ ދެކަނބަލުން އއ. އުކުޅަހަށް ކުރެއްވި ދަތަރުފުޅުގައި، އެރަށުގައި ޕީއެންސީ ހަރުގެ ޖަލްސާއެއް ބާއްވާފައިވެ އެވެ. އެ ޖަލްސާގައި ވާހަކަ ދައްކަވަމުން ޝުޖާއު ވިދާޅުވީ ޔާމީންގެ ވެރިކަމުގައި ރަށްރަށުގެ ކައުންސިލްތަކުން ނުވަތަ އަތޮޅު ކައުންސިލްތަކުން ރައީސް ޔާމީނަށް ތަރައްގީގެ މަޝްރޫއުއަކާ ގުޅިގެން ވާހަކަ ދައްކަން ނުގުޅޭނެ ކަމަށެވެ. އަދި އެ ހުރިހާ ފަރާތްތައް ވެސް މިނިސްޓަރު މުއިއްޒު އަރިހަށް ވަޑައިގަތުމަށް ރައީސް ޔާމީން އެދިވަޑައިގެންނެވި ކަމަށް ވެސް ޝުޖާއު ވިދާޅުވި އެވެ.
އޭރު ރާއްޖޭގައި ތަރައްގީގެ މަޝްރޫއު ހިނގާ ނަމަ ހިންގަނީ ހައުސިންގ މިނިސްޓްރީގެ ދަށުން ކަމަށާއި މުޅި ދައުލަތުގެ ސިސްޓަމް އޮޕަރޭޓްވެގެން ދިޔައީ ހައުސިންގ މިނިސްޓްރީގެ ތެރެއިން ކަމަށް ޝުޖާއު ވިދާޅުވި އެވެ.
މިއީ ދޮގު ވާހަކައެއް ނޫން، މަލީހު މެންނަށް ނޭނގިދާނެ އަޅުގަނޑުމެންނަށް އެނގޭ، ޝާޑުއާއި މުހައްމަދު އިސްމާއީލަށް އެނގޭނެ، ޝިޔާމަށް އެނގިވަޑައިގަންނަވާނެ، މިތާ ތިއްބެވި އަޅުގަނޑުމެން ލީޑަރުންނަށް އެނގޭނެ އަޅުގަނޑު ދޮގެއް ނަހަދާނެ، އަޅުގަނޑު ސިޔާސީ ދޮގު ނަހަދާތާ ވަރަށް ދުވަސް ވެއްޖެ މިހާރު، ލޮބުވެތި ރައްޔިތުން މިއީ މިކަން ހިނގަމުން ދިޔަ ގޮތް އޭރު، ކޮންމެ ކަމެއްގައި ރޭގަނޑު ގުޅުއްވިޔަސް ގުޅުއްވަން ޖެހޭނީ ރައީސް މުއިއްޒަށް އޭރު، ތަރައްގީގެ މަޝްރޫއެއް ހިނގަމުން ދަންޏާ ދަނީ ހައުސިންގ މިނިސްޓްރީގެ ދަށުން، ހައުސިންގ މިނިސްޓްރީ އޮޕަރޭޓް ވަނީ ޓްވެންޓީ ފޯ އިންޓު ސެވަންއިބްރާހީމް ޝުޖާއު
ރައީސް ޔާމީންގެ ވެރިކަމުގައި ރާއްޖެ ތަރައްގީ ކުރެއްވި ވާހަކަ ޔާމީން ދައްކަވާއިރު، ހަގީގަތުގައި އެ ވެރިކަން ފުރިހަމަވީ ޕީއެންސީގެ އިސް ބޭފުަޅުންނާއެކު ކަމަށް ޝުޖާއު ވިދާޅުވި އެވެ.
މީގެއިތުރުން ރައީސް ޔާމީންގެ ވެރިކަމުގައި ޕާޓީ ނުހިންގާ ކަމަށާއި އޭރު އޮންނަނީ މެޑަމް އޮފީހެއް ކަމަށް ވިދާޅުވެ ޝުޖާއު ވަނީ ވަރަށް ބޮޑަށް ރައީސް ޔާމީނަށް ފާޑު ވިދާޅުވެފައި އެވެ.
ޝުޖާއުގެ މި ވާހަކަތަކާ އެކު އާންމު ރައްޔިތުން ދަނީ ޔާމީންގެ ވެރިކަމުގެ ދައުރުގައި ކޮރަޕްޝަންތައް ހިންގީ ރައީސް މުއިއްޒަށް އެނގިވަޑައިގެންތޯ ސުވާލު އުފައްދަފާއި އެވެ.
