ރައްޔިތުންނަށް ހަމަޖެހުމާއި ކުރިއެރުން ހޯދައި ދިނުމަށްޓަކައި ޤާނޫނުއަސާސީ އަށް އިސްލާހުތަކެއް ގެންނަން ޖެހޭ: ފައިސަލް

ރައްޔިތުންގެ ފުރިހަމަ އިތުބާރު އޮންނަ ހެޔޮވެރިކަމުގެ ނިޒާމެއް ޤާއިމުކޮށް، އިޤްތިޞާދީ ގޮތުން ފުދުންތެރި ޤައުމަކަށް ހަދައި، ރައްޔިތުންނަށް ހަމަޖެހުމާއި ކުރިއެރުން ހޯދައި ދިނުމަށްޓަކައި ޤާނޫނުއަސާސީ އަށް އިސްލާޙުތަކެއް ގެންނަން ޖެހޭ ކަމަށް ކުރީގެ ނައިބު ރައީސް ފައިސަލް ނަސީމް ވިދާޅުވެއްޖެ އެވެ. 

ގާނޫނު އަސާސީއަށް 18 އަހަރު ފުރުމާއި ގުޅިގެން ފައިސަލް "އެކްސް" ގައި ކުރެއްވި ޕޯސްޓެއްގައި ވިދާޅުވެފައި ވަނީ 2004 އިން 2008 ވަނަ އަހަރާ ދެމެދު، ގާނޫނު އަސާސީ އެކުލަވައިލުމަށްޓަކައި ކުރި މަސައްކަތުގައި ވަރަށް ފޮނި އުންމީދުތަކެއް ކުރެވުނު ކަމަށެވެ. ނަމަވެސް އެ އުއްމީދުތައް ރައްޔިތުންނަށް ހާސިލްވި މިންވާރާއި ދޭތެރޭ ވިސްނާލަން ޖެހޭ ކަމަށް ފައިސަލް ވިދާޅުވި އެވެ. 

Advertisement

ފެހި ގާނޫނު އަސާސީގައި އިންތައް ވަކި ކުރި ގޮތާ ޚިލާފަށް، އެއް ބާރުގެ ނުފޫޒު އަނެއް ބާރުގެ މައްޗަށް މިހާރު އިންތިހާ އެބައޮތް ކަމަށާއި މިކަމުގެ ސަބަބުން ގައުމު ދާންޖެހޭ މިސްރާބަށް ނުދިޔުމުގެ ކަންބޮޑުވުން ރައްޔިތުންގެ މެދުގައި ވަރަށް ބޮޑަށް އޮތް ކަމަށް ވިދާޅުވެ ފައިސަލް ވަނީ ގާނޫނު އަސާސީއަށް ގެންނަން ފެންނަ ކަމަށް ގަބޫލު ކުރާ 14 ބަދަލެއް މި ޕޯސްޓްގައި ލިޔުއްވާފައި އެވެ. 

އެގޮތުން، ރައްޔިތުންގެ މަޖިލީހުގެ އަދަދު 60 މެންބަރުންނަށް މަދުކޮށް، މުޅި އަތޮޅުން ވޯޓު ދީގެން މެންބަރުން އިންތިޚާބު ކުރާ ގޮތަށް ހެދުމާއި، ފަނޑިޔާރުގޭގެ މިނިވަންކަން ކަށަވަރު ކުރުމަށްޓަކައި، ޖުޑީޝަލް ސަރވިސް ކޮމިޝަން (ޖޭއެސްސީ) އަށް މެންބަރުން އައްޔަން ކުރާގޮތާއި، އުއްތަމަ ފަނޑިޔާރު އައްޔަން ކުރާ ގޮތް ބަދަލު ކުރުމާއި، މިނިވަން މުއައްސަސާތަކަށް މީހުން އައްޔަން ކުރުމުގައި ރައީސުލްޖުމްހޫރިއްޔާގެ އެއްވެސް ދައުރެއް ނޯންނަ ގޮތަށް، ރައްޔިތުންގެ މަޖިލީހަށް ނަން ހުށަހަޅައިގެން މަޖިލީހުން ފާސްކުރުމާއި، ޤާނޫނު އަސާސީގެ 115 ވަނަ މާއްދާ އިން ރައީސުލްޖުމްހޫރިއްޔާ އަށް އެއްވެސް އިމެއް އަދި މިނެއް ނެތި ދީފައިވާ ބާރުތައް އިސްލާހު ކުރުން އަދި ސަރުކާރު ހިންގުމަށްޓަކައި މިނިސްޓްރީތަކާއި އޮފީސްތަކާއި އަދި ކުންފުނިތަކަށް ސިޔާސީ މުވައްޒަފުން އައްޔަން ކުރެވޭނެ ވަކި އަދަދެއް ކަނޑައެޅުން ހިމެނެ އެވެ. 

މީގެއިތުރުން ފުރިހަމަ ލާމަރުކަޒީ ނިޒާމަކަށް އަތޮޅުތައް ހިންގުން ބަދަލުކޮށް، ރަށް ރަށަށް ބާރުތައް ދޫކޮށްލުމާއި، ދިވެހިރާއްޖޭގެ ދުރު ރާސްތާގެ ތަރައްޤީގެ ޕްލޭން ކަނޑައަޅައި، އެއާ އެއްގޮތަށް އަމަލު ކުރުން، އަދި ސަރުކާރު ބަދަލުވި ނަމަވެސް، ފަށާފައިހުރި ގައުމީ ތަރައްގީގެ މަޝްރޫއުތައް ހުއްޓުމެއް ނެތި ކުރިއަށްގެންދަން ލާޒިމު ކުރުމުގެ އިތުރުން ދިވެހިރާއްޖޭގެ ވިޔަފާރި އާއި ވަޒީފާގެ ބާޒާރުގައި ދިވެހިންނަށް ފުރުސަތު އިތުރު ކުރުމަށްޓަކައި ގެންނަން ޖެހޭ ބަދަލުތައް ގެންނަން ޖެހޭ ބަދަލުތަކެއް ވެސް ހިމަނާފައިވެ އެވެ.

ސަރުކާރު ހިންގުމަށްޓަކައި ރައްޔިތުންގެ ސީދާ ވޯޓަކުން ހޮވާ ރައީސުލްޖުމްހޫރިއްޔާއެއްގެ އިތުރުން، ދައުލަތުގެ އިސް ވެރިޔަކު ރައްޔިތުންގެ ވޯޓަކުން ހޮވާ ގޮތަށް ބަދަލު ގެނައުމާއި މީހުން ބިނާ ކުރުމުގައި، ގައުމަށް އެންމެ ބޭނުންވާ ދާއިރާތަކަށް އިސްކަން ދީގެން، ބައިނަލްއަގްވާމީ މިންގަނޑުތަކާ އެއްހަމަ ފެންވަރެެއްގައި މީހުން ބިނާ ކުރުމުގެ ޚާއްސަ މަޝްރޫއެއް ކުރިއަށް ގެންދިޔުމަށް ވެސް ފެންނަ ކަމަށް ފައިސަލް ހާމަކުރައްވާފައިވެ އެވެ. 

ފެހި ގާނޫނު އަސާސީއަށް 18 އަހަރު ފުރިގެން ދިޔައިރު، ވޭތުވެދިޔަ ވެރިކަންތަކުގެ ތެރެއިން ރާއްޖެއަށް ހެޔޮ ބަދަލުތަކެއް އައިސްފައިވާކަމަށް ވެސް ފައިސަލް ވިދާޅުވެފައިވެ އެވެ.