ބޮންޑު މުއާމަލާތުގެ މައްސަލައިގައި ޕެންޝަން އޮފީހުގެ މުވައްޒަފުން އިސްތިއުފާ ދިނުމަކީ ކަންބޮޑުވާންޖެހޭ ކަމެއް: ފައިސަލް

ބޮންޑު މުއާމަލާތުގެ މައްސަލައިގައި ޕެންޝަން އޮފީހުގެ މުވައްޒަފުން އިސްތިއުފާ ދިނުމަކީ ކަންބޮޑުވާންޖެހޭ ކަމެއް ކަމަށް ކުރީގެ ނައިބު ރައީސް ފައިސަލް ނަސީމް ވިދާޅުވެއްޖެ އެވެ.

ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ފައިސަލް ވިދާޅުވީ، ބޮންޑު މުއާމަލާތުގެ މައްސަލައިގައި ޕެންޝަން އޮފީހުގެ ބައެއް މުވައްޒަފުން މީގެ ކުރިން ވެސް އިސްތިއުފާ ދީފައި ވަނިކޮށް، އެކަމާ ދެކޮޅު ހެދުމުގެ ގޮތުން ޕެންޝަން އޮފީހުގެ މުވައްޒަފުންތަކެއް އަނެއްކާ ވެސް އިސްތިއުފާ ދިނުމަކީ ކަންބޮޑުވާންޖެހޭ ކަމެއްް ކަމަށެވެ. އަދި މިއީ ސަރުކާރުން ފައިސާ ޗާޕުކުރުމުގެ މުއާމަލާތް ކުރިއަށްގެންދަން ކުރާ މަސައްކަތާމެދު މާލީ ދާއިރާގެ އެތައް ބަޔަކު ކަންބޮޑުވުން ފާޅުކުރަމުން އަންނަ ވަގުތެއް ކަމުން ސަރުކާރުން މިކަމާމެދު ފުންކޮށް ވިސްނާ، އިނދަ ޖެހެމުންދާ އިގްތިސާދު ނަގާ ކޮޅަށް ޖެހުމަށްޓަކައި، ތަޖުރިބާކާރުންގެ ލަފަޔާއި އިރުޝާދު ހޯދަންޖެހޭ ކަމަށް ވަގުތު ކަމަށެވެ.

ފައިސަލް ވިދާޅުވީ، ދުވަހެއް ދުވަހަކަށް ގައުމުގެ އިގްތިސާދީ ހާލަތު ގޯސްވަމުންދާއިރު، 2.4 ބިލިއަން ރުފިޔާ ޗާޕުކުރުމުން ޑޮލަރުގެ އަގު މިހާރަށް ވުރެ ވެސް މަތިވެ، މުދަލުގެ އަގު އިންތިހާއަށް އުފުލި، އާންމު ރައްޔިތުންނަށް އެތައް ތަކުލީފުތަކެއް ދިމާވާނެ ކަމަށެވެ. އަދި މިފަދަ ކަންކަން ކުރުމުގެ ބަދަލުގައި ގައުމުގެ އިގްތިސާދު ރަނގަޅު ކުރުމަށް ވިސްނުންތެރިކަމާއެކު މަސައްކަތްކޮށް، ބުއްދި އިސްކުރެއްވުމަށް ވެސް ފައިސަލް ވަނީ ގޮވާލައްވާފަ އެވެ.

ފައިސަލްގެ އިތުރުން ކުރީގެ ފޮރިން މިނިސްޓަރު އަބްދުﷲ ޝާހިދު ވެސް ވަނީ މި ސަރުކާރުން ފައިސާ ޗާޕުކުރަން ނިންމުމާ ގުޅިގަން ކަންބޮޑުވުން ފާޅުކުރައްވާފަ އެވެ. ޝާހިދު ވިދާޅުވި ގޮތުގައި، ސަރުކާރުގެ ޓީ-ބިލްގައި އިންވެސްޓްކުރުމަކީ ސަރުކާރުން ސީދާ ފައިސާ ޗާޕްކުރުން ކަމަށާއި މިކަމުގެ ސަބަބުން އިންފްލޭޝަން މަތިވެ، ދިވެހި ރުފިޔާގެ އަގު އިތުރަށް ދަށްވުމުގެ އިތުރުން، ޑޮލަރު ލިބުން ދަތިވެ ޑޮލަރުގެ އަގު އިންތިހާއަށް މަތިވެގެންދާނެ ކަމަށެވެ. ޕެންޝަން އޮފީހުގެ ބޯޑު މެންބަރުންނާއި، ޕެންޝަން އޮފީހުގެ އިސް މުވައްޒަފުން އިސްތިއުފާ ދެމުންގެންދާ މި ދަނޑިވަޅުގައި އެކަމަށް ބެލުމެއްނެތި، 2.4 ބިލިއަން ރުފިޔާ ޗާޕު ކުރުމަކީ ރައްޔިތުންގެ މުސްތަގުބަލާއި މުޅި ގައުމުގެ މާލީ ނިޒާމު ހަލާކު ކޮށްލުން ކަމަށް ވެސް ޝާހިދު ވަނީ ވިދާޅުވެފަ އެވެ.

އިގްތިސާދީ މާހިރުން ވެސް ގެންދަނީ މި ސަރުކާރުގެ އިގްތިސާދީ ނިންމުންތަކަށް ކަންބޮޑުވުން ފާޅުކޮށް އެކަން އެގޮތަށް ނުކުރުމަށް ގޮވާލަމުންނެވެ.

މި މައްސަލައާ ގުޅިގެން މިއަދުގެ ވަގުތެއްގައި ޕެންޝަން އޮފީހުގެ ހެޑް އޮފް އިންވެސްޓްމަންޓްގެ މަގާމުގައި ހުންނެވި ހައިފާ އަހުމަދާއި އެ އޮފީހުގެ މެނޭޖްމަންޓް ލެވެލްގެ މަގާމެއްގައި ހުންނެވި ދެ ބޭފުޅަކު ވަނީ އިސްތިއުފާ ދެެއްވާފަ އެވެ. ތިން މުވައްޒަފަކު ކުއްލި ގޮތަކަށް މަގާމުން އިސްތިއުފާ ދެއްވި ސަބަބެއް ޕެންޝަން އޮފީހުން ރަސްމީކޮށް ހާމަކޮށްފައި ނުވި ނަމަވެސް، މި ތިން އިސްތިއުފާ ގޮސް ގުޅެނީ ބޮންޑު ގަތުމުގެ މުއާމަލާތާ ކަމަށް މިހާރު ވަނީ ޔަގީން ކުރެވިފަ އެވެ.

މި މައްސަލައިގައި މީގެ ކުރިން ވެސް ޕެންޝަން އޮފީހުގެ ސީއީއޯ އަދި ސީއެފްއޯގެ އިތުރުން ބޯޑުގެ ޗެއަރމަން އާއި ބައެއް މެންބަރުން ވެސް ވަނީ މަގާމުން އިސްތިއުފާދެއްވައިފަ އެވެ. މި މައްސަލައާ ގުޅިގެން ނުތަނަވަސްކަން އިންތިހާއަށް ބޮޑުވެފައި ވަނިކޮށް، މިކަމާ ގުޅޭ މައުލޫމާތު ހާމަކުރާ މުވައްޒަފުން ވަޒީފާއިން ވަކިކުރާނެ ކަމުގެ އިންޒާރު ދީ، މެނޭޖުމަންޓުން މިއަދު ވަނީ މެމޯއެއް ވެސް ނެރެފަ އެވެ. މައުލޫމާތު ލިބޭ ގޮތުގައި، ގިނަ ބައެއްގެ ކަންބޮޑުވުންތަކާ އެކު ވެސް، ޕެންޝަން އޮފީހުގެ އައު ބޯޑާއި ލީޑަރޝިޕުން އަންނަނީ މިއަދުގެ ވަގުތެއްގައި މި މުއާމަލާތް ނިންމުމަށް ފަހުގެ މަސައްކަތްތައް ކުރަމުންނެވެ.

ޕެންޝަން ފަންޑުން ގަނެފައިވާ 2.4 ބިލިއަން ރުފިޔާގެ ޓީ-ބިލުތަކެއް ވިއްކާލައިގެން ލިބޭ ފައިސާ ސަރުކާރުން ވިއްކާ، ދިގު މުއްދަތުގެ ބޮންޑަކަށް އިންވެސްޓުކުރަން އެ ފަންޑުން މިދިޔަ އަހަރުގެ ތެރޭގައި ހިންގަން އުޅުނު މުއާމަލާތް ކުރިއަށް ގެންދަން އެންމެ ފަހުގެ ތައްޔާރީތައް ވަމުންދާ ކަމުގެ އަޑުތަކެއް ފެތުރިފައިވާ ދަނޑިވަޅެއްގައި ޕެންޝަން އޮފީހުގެ ތިން މުވައްޒަފަކު މަގާމުން އިސްތިއުފާދެއްވުމަކީ ސަރުކާރުގެ އިގްތިސާދީ ސިޔާސަތުތައް އާންމުންނަށް ކަމުނުދާ ކަމުގެ އަލިގަދަ ހެއްކެކެވެ.

ރައީސް މުއިއްޒު ވެރިކަމާ ހަވާލުވެ ވަޑައިގަތީ ފައިސާ ޗާޕު ނުކުރައްވާނެ ކަމުގެ ވައުދާއެކުގައި ނަމަވެސް، މިއަދު ކަންކަން ކުރައްވަމުން ގެންދަވަނީ އޭރު ދެއްކެވި ވާހަކަފުޅާ ދިމާ މުޅިން އިދިކޮޅަށެވެ.