ތުޅާދޫ ދާއިރާގެ މެންބަރު ހަންނާނަކީ ދާއިރާގެ ރައްޔިތުންނަށް ހުރި ލަދެއް: ތުޅާދޫ އަދި ފެހެންދޫ ކައުންސިލް
7 އޯގަސްޓު 2026 | ހުކުރު 11:55ލާމަރުކަޒީ ގާނޫނަށް ސަރުކާރުން ހުށަހެޅި އިސްލާހުތަކާ ގުޅިގެން ކަންބޮޑުވުން ފާޅުކޮށް، އެ ބިލު އަނބުރާ ގެންދިއުމަށް ތުޅާދޫ އާއި ފެހެންދޫ ކައުންސިލުން ގޮވާލައިފި. މި އިސްލާހުތަކުގެ ސަބަބުން ރަށްރަށުގެ އިހުތިސާސްގައިވާ ބިންތައް ސަރުކާރަށް ނެގުމުގެ ބާރު ލިބި، ލާމަރުކަޒީ ނިޒާމު ރޫޅިގެންދާނެ ކަމަށް އެ ކައުންސިލްތަކުން ބުނޭ. އެހެންކަމުން، ރައްޔިތުންގެ ބާރުވެރިކަން ގެއްލޭ ގޮތަށް ހުރި މި ބަދަލުތައް ހުއްޓާލުމަށް އެ ދެ ރަށުން ވަނީ ބާރުއަޅާފައި
ރައްޔިތުންގެ މަޖިލީހުގެ ތުޅާދޫ ދާއިރާގެ މެންބަރު އަބްދުލް ހަންނާން އަބޫބަކުރު | ރައްޔިތުންގެ މަޖިލިސް
ރައްޔިތުންގެ މަޖިލީހުގެ ތުޅާދޫ ދާއިރާގެ މެންބަރު އަބްދުލް ހަންނާން އަބޫބަކުރު އަކީ އެ ދާއިރާގެ ރައްޔިތުންނަށް ހުރި ލަދެއް ކަމުގައި ބ. ފެހެންދޫ އަދި ބ. ތުޅާދޫ ކައުންސިލްގެ އިދާރާ އިން ބުނެފި އެވެ.
ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް ސަރުކާރުގެ ފަރާތުން ތުޅާދޫ ދާއިރާގެ މެންބަރު އަބްދުލް ހަންނާން އަބޫބަކުރު ވަނީ އިސްލާހުތަކެއް ހުށަހަޅުއްވާފަ އެވެ. އެ އިސްލާހުތަކުގައި ވަނީ ކައުންސިލްތަކުގެ އިހުތިސާސްގައި ހިމެނޭ ބިންތަކާއި ތަންތަން ސަރުކާރުގެ ތަރައްގީގެ މަޝްރޫއުތައް ހިންގުމަށްޓަކައި އެ ރަށެއް ނުވަތަ ސިޓީއެއްގެ އިހުތިސާސުން ވަކިކުރަން ސަރުކާރުން ނިންމާ ހާލަތެއްގައި އެ ތަންތަން ސަރުކާރަށް ނެގޭ ގޮތަށް ލާމަރުކަޒީ ގާނޫނު ބަދަލުކުރުމަށެވެ.
މިކަމުގެ ކަންބޮޑުވުން ފާޅުކޮށް، އެ އިސްލާހު އަނބުރާ ގެންދިއުމަށް ގޮވާލާ، ފެހެންދޫ އަދި ތުޅާދޫ ކައުންސިލްގެ ހުރިހާ މެންބަރުންގެ އިއްތިފާގުން ފާސްކޮށްފައިވާ ގަރާރުގައި ބުނީ އެ އިސްލާހުތަކަކީ، ގާނޫނު އަސާސީގެ 4 ވަނަ މާއްދާގައިވާ ރައްޔިތުންގެ ބާރާއި، 8 ވަނަ ބާބުގައިވާ ލާމަރުކަޒީ އުސޫލުން ދިވެހިރާއްޖޭގެ އިދާރީ ދާއިރާތައް ހިންގުމުގެ މަގްސަދާއި ބޭނުމާއި، ރާއްޖެ ހޯދާފައިވާ ޑިމޮކްރެޓިކް ހުރިހާ ކުރިއެރުންތަކަކާ ކަނޑައެޅިގެން ޚިލާފު އިސްލާހުތަކެއް ކަމުގައި ދެކޭ ކަމަށެވެ.
2007 ގައި ތަސްދީގު ކުރެވެނު ފެހި ގާނޫނު އަސާސީގެ ދަށުން ރާއްޖޭގެ ރަށްރަށަށް ލިބުނު އެންމެ ބޮޑު ކުރިއެރުމަކީ ރަށުގެ ކަންކަން ނިންމުމުގައި ބައިވެރިވެ އުޅުމާއި، ރައްޔިތުންގެ ވޯޓުން ރަށް ހިންގާ މީހުން ކަނޑައެޅުމުގެ ބާރު ލިބުމާއި، ރައްޔިތުންނަށް ޖަވާބުދާރީ ވަނިވި އުސޫލުން ރަށުގެ ތަރައްގީގެ ކަންކަން ހިނގާކަން ކަށަވަރު ކުރުން ކަމަށް ވެސް އެ ގަރާރުގައި ބުނެފައިވެ އެވެ.
ލާމަރުކަޒީ ނިޒާމު ތައާރަފްވި ފަހުން ލިބުނު އެންމެ ބޮޑު އެއް ކުރިއެރުމަކީ ރަށްރަށުގެ ގާނޫނީ އިހްތިސާސް ކަނޑައެޅި، ރަށްރަށަށް މިލްކުކޮށްދެވުން ކަމަށާއި އަދި މި އިހްތިސާސް ބޭނުންކުރާނެ ގޮތް ރައްޔިތުންގެ ފުރިހަމަ ބައިވެރިވުމާ ތާއީދާއެކު ކަނޑައެޅި ފާސްކުރެވިފައިވާ ކަމަށް ވެސް އެ ގަރާރުގައިވެ އެވެ.
އެހެން ނަމަވެސް އަލަށް މި ހުށަހެޅުނު އިސްލާހު ފާސްވެ ގާނޫނަކަށް ވެއްޖެ ނަމަ، ރަށްރަށުގެ އިހްތިސާސްގެ ތެރެއިން ބޭނުން ތަނެއް، ބޭނުން އިރަކު ބޭނުން ގޮތަކަށް މާލޭގައި ތިއްބަވާ މަރުކަޒީ ވެރިންނަށް އަތުލައިގަނެވުމުގެ ޖާގަ ފަހިވެ، ރަށު ރައްޔިތުން އަތުން އިހްތިސާސުގެ މިލްކުވެރިކަން ބީވީ ކަމަށް އެ ދެ ކައުންސިލުން ވަނީ ބުނެފަ އެވެ.
އޭގެ އިތުރުން މި ބިލުގައިވާ ކަމަކާ ދެކޮޅަށް ރައްޔިތުންގެ ފަރާތުން ބަހެއް ބުނެ ދެކޮޅު ހެދުމަކީ ވެސް ކުށްވެރިވާ މަނާ ކަމަކަށް ބަދަލުވީ ކަމަށާއި ރައްޔިތުން އިންތިޚާބު ކުރާ މަންދޫބުންނަށް ފިޔަވަޅު އަޅައި، ސަސްޕެންޑު ކޮށް، ވަކިކުރުމުގެ ބާރު ވެސް މަރުކަޒީ އިދާރާތަކަށް މާ ސާފުކޮށް ލިބިދެވުނީ ކަމަށް ވެސް އެ ގަރާރުގައި ވަނީ ބުނެފަ އެވެ. މިއީ ސީދާސާދާކޮށް ލާމަރުކަޒީ ނިޒާމު ރޫޅާލައި، ރައްޔިތުންނާއި ރަށުގެ ބާރުވެރިކަން އުވާލުމުގެ އިސްލާހެއް ކަމަށް ބުނެފައިވެ އެވެ.
އެހެންކަމުން ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅު ކަމުގައިވާ ލާމަރުކަޒީ ނިޒާމު ޗެމްޕިއަން ކޮށްދެއްވުމާއި، ގާނޫނު އަސާސީ އާއި ކަނޑައެޅިގެން ފުށު އަރާ ގޮތަށް އޮތް އިސްލާހު އަނބުރާ ގެންދިޔުމަށް އެ ދެ ރަށު ކައުންސިލުން ވެސް ވަނީ ގޮވާލާފަ އެވެ. އަދި އެ އިސްލާހު ހުށަހެޅުއްވި މެންބަރަކީ ތުޅާދޫ އަށް ނިސްބަތްވާ އެ ދާއިރާގެ މެންބަރު ކަމަށްވުމީ، ލަދުވެތިކަމެއް ކަމަށް ވެސް ބުނެފައިވެ އެވެ. ކުރިން ނޫސްވެރިކަމުގެ މިނިވަންކަމާ ދެކޮޅަށް އަދި މިފަހަރު ސީދާ ރަށްރަށުގެ ރައްޔިތުންގެ ބާރުވެރިކަމާ ދެކޮޅަށް މެންބަރު ހައްނާނު ސްޕޮންސަރ ކުރައްވައިގެން ހުންނަވާ މަސައްކަތް ކުރެއްވުމަކީ އެ ރަށްރަށާއި އެ ދާއިރާގެ ރައްޔިތުންނަށް ވެވޭ ޚިޔާނާތެެއް ކަމަށް ވެސް އެ ދެ ކައުންސިލްގެ އިދާރާ އިން ވަނީ ބުނެފަ އެވެ.
